Abot-kayang swab test para sa mga biyahero, iwas-pekeng resulta

ni Ryan Sison - @Boses | July 19, 2021

Upang mahikayat ang mga biyahero na ituloy ang kanilang travel plans, nanawagan ang Department of Tourism (DOT) ng mas mababang price cap sa mga COVID-19 tests.

Ayon kay Tourism Secretary Bernadette Romulo-Puyat, masyadong mahal ang RT-PCR test na nagkakahalagang P5, 000 para sa mga biyaherong budget-conscious. Dagdag pa nito, mabigat ang P5, 000, lalo na sa malalaking pamilya na babiyahe nang magkakasama.

Gayunman, naniniwala ang kalihim na sisigla ulit ang economic activities at mabubuhay ang industriya kung sakaling mabawasan ang presyo ng RT-PCR test.

Hindi lamang aniya biyahero ang matutulungan nito kundi maging ang mga local government units (LGUs) dahil lalong matitiyak na masusunod ang kanilang test requirements.

Sa totoo lang, magandang mungkahi ito para mas sumigla ang industriya ng turismo. Pero tanong, kaya pa bang ibaba ang presyo nito?

Isa pa, kabilang sa mga dahilan kaya naging talamak ang pamemeke ng RT-PCR test result ay dahil mahal ang magpa-swab test. Kaya kung mabababaan pa ang presyo nito, malaking tulong din dahil masisigurado na lehitimo ang mga dokumentong ipipresinta ng mga biyahero. Kumbaga, win-win sa mga turista at LGUs.

Gayunman, oras na maipatupad ito, hangad nating tuluyan nang matigil ang pamemeke ng naturang dokumento. Hindi lang kaligtasan ng mga residente sa probinsiya ang naaapektuhan kundi maging ang mga negosyong nagsasara kapag mayroong hawaan sa isang lugar o tourist spot.

Tandaan na hindi dapat makompromiso o maisakripisyo ang kaligtasan ng iba pa nating kababayan habang sinisikap nating ibangon ang turismo at ekonomiya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Blended learning, kaya pa ba next year?

ni Ryan Sison - @Boses | July 17, 2021

Sa pagtatapos ng school year 2020-2021 sa ilalim ng distance learning setup kamakailan, naniniwala ang Department of Education (DepEd) na hindi nasayang ang taon para sa mga mag-aaral.

Kasabay nito, nagpasalamat ang ahensiya sa mga magulang, guro at mag-aaral sa kanilang pagsisikap upang maitaguyod ang distance learning.

Gayunman, lumabas sa online survey ng Movement for Safe, Equitable, Quality and Relevant Education (SEQuRE) na maraming estudyante ang hindi nakapag-aaral nang tama sa ilalim ng distance learning

Base sa survey, 86.7% ng mga mag-aaral sa ilalim ng modular learning, 66% sa ilalim ng online learning at 74% sa blended learning ang nagsabing hindi sila natututo sa alternative modes ng pagtuturo kumpara sa face-to-face setup bago ang pandemya. Habang 5.4% lamang sa mag-aaral ng blended learning at 9.1% sa online learning ang nagsabing sila ay mas natuto.

Nasa 24.8% ng mag-aaral sa ilalim ng online learning, 20.7 % sa blended learning at 7.6% sa ilalim ng modular learning ang naniniwalang mas maraming natutunan kumpara sa normal na pag-aaral bago ang pandemya.

Bagama’t naniniwala ang DepEd na naging matagumpay ang nagdaang school year, hindi maitatangging maraming naging problema, lalo na sa simula ng taon.

Nariyan ang aberya sa online class, sablay na modules at mga estudyanteng hirap sumabay sa mga pagbabago. Matatandaang sa kalagitnaan pa lamang ng school year, suko na ang ilang mag-aaral dahil hirap talaga.

Gayunman, magsisimula na sa Setyembre 13, 2021 ang school year 2021-2022 matapos aprubahan ni Pangulong Rodrigo Duterte ang petsang inirekomenda ng DepEd.

Kaya ang tanong, handa na ba ang lahat sa panibagong taon ng distance learning?

Samantala, hangad nating mas madali nang masolusyunan ang mga nagdaang problema at mas maging epektibo ang mga paraang ito upang mas matuto ang maraming mag-aaral.

Tandaan na ang layunin ng pagsusulong ng distance learning ay patuloy na mabigyan ng edukasyon ang kabataan sa gitna ng pandemya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Magulang na gustong ipasyal ang mga anak, doble-ingat!

ni Ryan Sison - @Boses | July 16, 2021

Matapos ang mahigit isang taon nang ipatupad ang community quarantine sa bansa, nagsimula nang makalabas ang mga batang nasa edad 5 pataas sa mga lugar na nasa modified general community quarantine (MGCQ) at general community quarantine (GCQ).

Kaugnay nito, kamakailan ay dinagsa ang ilang parke sa Metro Manila dahil pinayagan na ng pandemic task force ang mga batang edad 5 na mamasyal outdoor areas tulad ng mga parke, playground, outdoor tourist site, non-contact sports courts at mga kainan sa al fresco.

Kabilang sa mga dinagsang pasyalan ang Intramuros, Quezon Memorial Circle, kung saan ayon sa ilang mga namasyal, ikinatuwa ng kani-kanilang mga anak ang pagpayag na makalabas habang may pandemya.

Matatandaang bago ang pandemya, nasa 14,000 katao ang pumupunta sa Intramuros kada araw, pero ngayon, nasa 500 hanggang 1,000 na lang ito, na malaking bagay pa rin para sa mga naghahanapbuhay sa tourism sector.

Samantala, bukas na rin ang iba pang pasyalan sa Quezon City tulad ng Ninoy Aquino Parks and Wildlife Center, Urban Farming Area ng City Hall, Amoranto Stadium at 15 pang parke sa lungsod.

Ayon naman sa Metropolitan Manila Development Authority (MMDA), magpapasa ang mga alkalde ng resolusyon para matukoy ang mga parkeng puwedeng pasyalan.

Sa totoo lang, nakatutuwa na bagama’t limitado ang puwedeng puntahan ng mga bata, masasasabing puwede na talaga silang lumabas ng tahanan. ‘Yun nga lang, nangangailangan ito ng kooperasyon ng mga magulang.

Kaya naman, pakiusap kina nanay at tatay, kung ipapasyal ang mga bata, tiyaking alam din nila ang mga umiiral na health protocols dahil ayon sa mga awtoridad, kailangan ding sumunod ng mga ito sa ilang pag-iingat para maiwasan ang hawaan.

‘Ika nga, kung noon ay todo-ingat tayo, ngayon ay doblehin pa ang pag-iingat dahil nakalalabas na ang mga bata.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com