Contact tracers, kailangan pa more vs. Delta variant

ni Ryan Sison - @Boses | July 22, 2021

Malaking bahagi ng ating laban kontra COVID-19 ang mga contact tracers.

Sila ang tumutunton sa mga close contact ng COVID-19 positive at suspected patients, bagay na hindi madaling gawin, lalo na kung kailangan itong gawin nang mabilis at limitado lamang ang contact tracers na naka-deploy sa iisang lugar.

Gayunman, sa susunod na buwan, karamihan sa kontrata ng contact tracers ang nakatakdang magtapos, kaya naman hiniling ng Metro Manila mayors na palawigin pa ang mga kontrata ng mga ito.

Naniniwala ang mga opisyal na malaki ang naitulong 5,775 contact tracers sa pagbaba ng mga bagong kaso ng COVID-19 sa Metro Manila kada araw.

Gayunman, hanggang Agosto 15 na lang ang contact tracers ng Department of the Interior and Local Government (DILG) na pumapalo sa 15,000 nationwide kung saan 2,381 ang naka-deploy sa Metro Manila.

Ayon kay Labor Secretary Silvestre Bello III, bagama’t limitado na ang pondo ng Department of Labor and Employment (DOLE), pipilitin nitong maglaan ng P200 milyon na pondo para sa 2 buwang kontrata ng contact tracers.

Dahil ubos na ang pondong nakuha ng DILG sa Bayanihan 2, ganundin ang sariling pondo, humihingi ang kagawaran ng P1.7 bilyon sa Office of the President para palawigin ang kontrata ng contact tracers hanggang Disyembre 2021.

Nakita natin ang kahalagahan ng pagkakaroon ng contact tracers habang kinahaharap ang pandemya.

At kung bigla na lang silang mababawasan o tuluyang mawawala dahil sa kawalan ng pondo, malaking hamon ito, lalo pa’t may binabantayan tayong Delta variant, na pinaniniwalaang mas mabagsik.

Kaya panawagan sa pamahalaan, galaw-galaw para mapanatili ang bilang ng ating contact tracers. Hindi puwedeng mabawasan ang contact tracers na bahagi ng maraming aspeto ng COVID-19 response.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga bagets, bawal uli lumabas

ni Ryan Sison - @Boses | July 21, 2021

Dahil sa banta ng Delta COVID-19 variant sa bansa, nais ng Metro Manila mayors at Metropolitan Manila Development Authority (MMDA) na muling pagbawalang ang paglabas ng mga batang edad 5.

Paliwanag ni MMDA Chairman Benhur Abalos, nagbotohan ang mga alkalde at hinihiling sa Inter-Agency Task Force (IATF) na suspindehin ang naturang polisiya sa rehiyon. Dagdag pa ng opisyal, posibleng maging super spreader ang mga bata dahil hindi pa rin nababakunahan ang mga ito.

Sa kasalukuyan, 35 kaso ng Delta variant ang naitala sa bansa, kung saan 11 ang local cases at dalawa sa 11 kaso ang nasa Metro Manila.

Gayunman, nilinaw ng opisyal na handa ang Metro Manila mayros sa Delta variant.

Unang hinikayat ng OCTA Research group ang pamahalaan na muling ipatupad ng bubble policy sa NCR Plus, gayundin ang pagbabawal sa paglabas ng mga menor-de-edad.

Samantala, matatandaang pinayagan ng gobyerno ang mga batang edad 5 pataas na makalabas sa mga lugar na nasa general community quarantine (GCQ) at modified general community quarantine (MGCQ).

Kung hindi pa maituturing na ligtas ang mga menor-de-edad sa virus, dapat lang na manatili ang mga ito sa kani-kanilang tahanan.

Ang panibagong variant na ito ay mas matindi at kung dededmahin lamang natin, panibago itong problema.

Tutal, ang mga lokal na pamahalaan ang may alam kung anu-ano ang makabubuti sa kani-kanilang nasasakupan, pagbigyan natin ang kanilang hiling dahil para naman ito sa ikabubuti ng nakararami.

‘Ika nga, mas mabuti nang maghigpit ngayon kaysa umabot sa punto na saka lang tayo kikilos kapag malala na ang sitwasyon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Sapat na PUVs sa Metro Manila, kailangan na

ni Ryan Sison - @Boses | July 20, 2021

Kasabay ng pagpapatuloy ng suspensiyon ng number coding scheme ang pagtindi ng trapik sa Metro Manila.

Ang sitwasyon tuloy sa EDSA, tila magpa-Pasko na at sa dami ng pribadong sasakyan sa lansangan, tila bumalik na sa pre-pandemic ang bigat ng trapik.

Dahil dito, ipinanawagan sa Metropolitan Manila Development Authority (MMDA) na ibalik ang number coding scheme sa Metro Manila nang sa gayun ay mabawasan ang mga sasakyan sa EDSA, na nagdudulot ng mabigat na trapik, ngunit hindi pa pabor dito ang ahensiya.

Gayunman, panawagan ng transport advocacy group sa MMDA, dapat magdagdag ng pampasaherong sasakyan o maglaan ng mass transport bago ibalik ang number coding scheme sa Metro Manila.

Paliwanag ng grupo, marami pa ring manggagawa ang hindi nakararating sa tamang oras sa kani-kanilang trabaho. Dagdag pa nito, masyadong premature para muling ibalik ang number coding sa Metro Manila. At kung sakaling maipatupad agad ang number coding, babalik umano ang mahahabang pila ng mga pasahero ng MRT, LRT, PNR at EDSA bus Carousel.

Dalawang bagay ang kalaban ng mga komyuter sa araw-araw na pagbiyahe at ‘yan ay ang trapik at limitadong transportasyon. Kaya naman pakiusap natin sa gobyerno, isip-isip pa ng solusyon para sa ikagiginhawa ng ating mga kababayan.

Gayunman, kung hindi pa kakayaning ibalik ang number coding at magdaragdag ng PUVs, magiging sanhi rin ito ng mas mabigat na trapiko. Kung daragdagan naman ang kapasidad ng sa mga sasakyan, hindi ito gaanong ligtas sa hawaan.

Tila araw-araw na sinusubok ng pandemya ang ating pasensiya at ngayon, talagang hamon pa rin ang pagbiyahe, lalo na sa mga manggagawa.

Kaya kung nais nating mabigyan ng mas maayos at maginhawang pagbiyahe ang ating mga komyuter, tiyaking hindi ito makaapekto sa sitwasyon ng trapik at masisiguradong hindi magiging sanhi ng hawaan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com