Mga pahirap sa komyuter, mas dapat tutukan kaysa paghiwalay ng mga bakunado at hindi

ni Ryan Sison - @Boses | July 25, 2021

Dahil sa patuloy na banta ng Delta variant sa bansa, isinusulong ng isang opisyal ang hiwalay na public bus sa mga bakunado.

Giit ni Presidential Adviser for Entrepreneurship Joey Concepcion, inaasahan din na lalo pang darami ang mga manggagawa habang niluluwagan ang quarantine protocols.

Pabor dito ang Provincial Bus Operators Association of the Philippines, pero dapat umanong mabakunahan muna ang mayorya ng mga drayber at kondoktor.

Gayunman, bukas sa ideya ang Land Transportation Franchising and Regulatory Board (LTFRB), pero hindi pa umano nakararating sa kanila ang pormal na hiling ng opisyal. Dagdag pa ng ahensiya, maganda ang objective, pero kailangang pag-aralan kung paano ipatutupad, lalo na sa mga bus route.

Hindi pa man naipatutupad, tulad ng inaasahan ay marami na agad pumalag at nagpahayag ng kani-kanilang opinyon. Giit ng iba, ayos lang na ihiwalay na ang mga bakunado sa pampublikong transportasyon, pero dapat puwede nang may katabi. Naniniwala naman ang iba na magiging ugat lang ito ng diskriminasyon sa mga walang access sa bakuna. Isa pa, kinuwestiyon din kung paano mabeberipika kung talagang bakunado ang biyahero.

Dagdag pa rito, paano kung hindi ang taumbayan ang may dahilan kung bakit marami pang hindi nababakunahan? ‘Yung iba sa kanila, gusto nang magpabakuna, pero dahil sa kakulangan ng suplay, tengga muna at nakikipagsapalaran sa bagsik ng virus.

Sa totoo lang, masyado pang maaga para sa ganitong panukala. Kaya imbes na tutukan ito, magpokus muna tayo sa mga kasalukuyang problema.

Matatandaang kamakailan ay dumaraing pa rin ang mga komyuter dahil sa kakulangan ng pampublikong sasakyan. Kaya kung ipatutupad ang hiwalay na sasakyan para sa mga bakunado at hindi, sasapat ba ang mga ito?

Panawagan natin sa mga kinauukulan, pag-aralan kung talagang uubra ito at kung ipatutupad, tiyaking handa ang lahat, lalong-lalo na ang taumbayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Saklolo ng iba pang gov’t agencies, kailangan na

ni Ryan Sison - @Boses | July 24, 2021

Kahapon, Hulyo 23, pormal nang inanunsiyo ng Department of Health (DOH) ang pagkakaroon ng local transmission ng Delta variant, kung saan habang isinusulat ang artikulong ito ay nasa 47 ang naitalang kaso sa bansa.

Una nang sinabi ng DOH na kayang makahawa ng Delta variant hanggang walong katao “in one sitting” ng COVID-19, bagay na mas nakahahawa sa iba pang variants of concern dahil mas agresibo at nakamamatay ito kumpara sa karaniwan.

Gayunman, tiniyak ng Philippine National Police (PNP) na mag-deploy sila ng kanilang mga tauhan sa mga local government units bilang contact tracers bunsod ng Delta variant ng COVID-19.

Ayon kay PNP Chief Gen. Guillermo Eleazar, may mga tauhan sila na sanay sa contact tracing at nakikipag-ugnayan na sila sa Department of the Interior and Local Government (DILG) at DOH kung ilang contact tracers ang kanilang kakailanganin.

Dahil sinasabing mas agresibo at mabilis makahawa ang naturang variant, dapat lang na paigtingin pa ang contact tracing nang sa gayun ay mabilis matunton ang mga nakahalubilo ng mga tinamaan ng Delta variant.

At kung may kakayahan namang tumulong ang iba pang ahensiya ng gobyerno, dapat lang sumaklolo ang mga ito sa lalong madaling panahon.

Ngayon higit na kailangan ng bansa ang inyong tulong dahil kung mas mabilis itong matutugunan, mas mapipigilan ang hawaan.

Kaya panawagan sa pamahalaan at iba pang ahensiya, galaw-galaw pa more para mapigilan agad ang pagkalat ng mas mabangis na variant sa ating bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga fully vaccinated, ‘wag makampante sa Delta variant

ni Ryan Sison - @Boses | July 23, 2021

Hindi porke fully vaccinated na kontra COVID-19 ay 100% nang ligtas sa virus.

Ito ang paulit-ulit na paalala ng mga eksperto sa publiko, ngayong kapansin-pansing dumarami nang nagrerelaks at umaastang wala nang virus dahil marami nang hindi nagsusuot ng facemask at face shield, gayundin, dedma na sa health protocols.

Dahil dito, nanawagan ang Philippine Medical Association (PMA) sa publiko, lalo na sa mga bakunado na huwag maging kampante ngayong narito na ang mas nakahahawang Delta variant ng COVID-19.

Giit ng PMA, ang pagsunod ng publiko sa minimum health standards ay paraan para mapigilan COVID-19 surge sa mga ospital na nauwi sa paghirit nila noon ng timeout.

Samantala, nangangamba na si IATF technical advisory group member at pediatric infectious diseases expert Dr. Anna Ong-Lim na mangyari rin sa Pilipinas ang sitwasyon ngayon sa Indonesia.

Batay sa karanasan sa ibang bansa, mas mataas ang tsansang makaligtas sa Delta variant at iba pang mutation ng COVID-19 ang mga fully vaccinated. Nakaranas lang umano ng mild symptoms ang mga fully vaccinated na nagpositibo sa COVID-19 variants.

Bagama’t hindi pa sinasabi na mayroon nang community transmission ng Delta variant, dapat ngayon pa lang ay naghahanda na aniya ang pamahalaan sa posibleng malalang sitwasyon.

Kung mananatiling pasaway ang marami nating kababayan at ikonsidera pang mas mabangis ang variant na ito, posibleng lumala pa ang sitwasyon sa ating bansa.

Paalala sa taumbayan, hindi lang gobyerno ang dapat kumilos para mapigilan ang pagkalat ng virus dahil tayong mamamayan ay may dapat ding gawin.

Kaya pakiusap sa lahat — bakunado man o hindi — mag-ingat sa lahat ng pagkakataon.

Huwag nating hintayin na magkaroon pa ng local transmission ng panibagong variant bago tayo mag-ingat.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com