House-to-house vaccination habang ECQ, oks!

ni Ryan Sison - @Boses | August 02, 2021

Upang ligtas na makapagbakuna ng mamamayan laban sa COVID-19, pabor ang Department of Health (DOH) sa pagsasagawa ng house-to-house vaccination habang naka-enhanced community quarantine (ECQ) ang National Capital Region (NCR) mula Agosto 6 hanggang Agosto 20, 2021.

Ayon kay DOH Undersecretary Maria Rosario Vergeire, makatutulong din ang house-to-house vaccination para masigurong bakunado ang mga komunidad.

Dagdag pa ng opisyal, mas ligtas ito dahil may mga tao na lamang na iikot at magbabahay-bahay sa halip na sila pa ang pumunta sa vaccination sites at pumila. Sa ganitong paraan, maiiwasan ang pagkukumpul-kumpol ng mga tao.

Gayundin, isinusulong ng ahensiya ang pagkakaroon ng iba pang ligtas na paraan sa pagbabakuna tulad ng pag-iskedyul ng bakuna at pagkakaroon ng mas malalaking vaccination sites upang matiyak na mayroong physical distancing.

Kung maisusulong ang house-to-house vaccination sa kabila ng mahigpit na quarantine restriction, malaking tulong ito sa target ng Metro Manila mayors na makapagbakuna ng 250, 000 katao kada araw sa rehiyon.

Nakatutuwa na may mangilan-ngilang tayong solusyon sa kasalukuyang problema na pinalala pa ng panibagong lockdown. ‘Yun nga lang, dapat ding matiyak na may sapat na proteksiyon laban sa virus ang mga taong mag-iikot para magbakuna.

Sa ilang araw na natitira bago muling isailalim sa ECQ ang Metro Manila, pag-aralang mabuti kung paano magkakaroon ng maayos na sistema ang planong house-to-house vaccination. Kung tutuusin, dalawang lingo lamang ito, ngunit kung matitiyak na magiging matiwasay at walang aberya ang pagbabakuna, malaking bagay ito sa national vaccination program.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Magkakaibang protocols sa mga fully vaccinated at hindi, makakagulo lang

ni Ryan Sison - @Boses | August 01, 2021

Hindi sapat na suplay ng bakuna.

Ito ang nakikitang dahilan ng Department of Health (DOH) upang hindi ipatupad ang utos ni Pangulong Rodrigo Duterte na pagbawalang lumabas ng tahanan ang mga residenteng hindi pa nababakunahan kontra COVID-19.

Paliwanag ng ahensiya, hindi pa sapat ang suplay ng bakuna para magkaroon ng magkaibang protocols sa mga fully vaccinated at hindi. Dagdag pa rito, mayroong ayaw talagang magpabakuna, pero may mga nais nang maturukan, ngunit wala pang suplay ng bakuna.

Gayundin, sinasabi ng mga eksperto na posibleng magkaroon ng legal na isyu pagdating sa ganitong usapin.

Matatandaang sa ngayon, prayoridad ng pamahalaan na mabakunahan ang medical workers, senior citizens, persons with comorbidities, manggagawa sa essential industries at indigents, at tinitingnan pa kung mababakunahan na rin ang mga batang 17-anyos pababa.

Kamakailan, sinabi ng Pangulo sa barangay officials na i-monitor ang vaccination status sa kanilang nasasakupan at pagbawalang lumabas ang mga hindi ba nababakunahan. Sa kabila nito, igniit ng mga eksperto na ang fully vaccinated ay posible pa ring maging carrier at mahawaan ng virus.

Kung mga eksperto na ang nagsabi, matuto tayong makinig dahil malamang ay para ito sa ikabubuti ng nakararami.

Siguro nga, mas mabuting magpokus tayo sa mga mas makatotohanan at epektibong solusyon upang maiwasan ang hawaan. Isa pa, kung posible lang itong makagulo at pagmulan ng iba pang problema, ‘wag na nating tangkain pa.

Tandaan na pandemya ang ating kalaban dito at hindi ang ibang tao.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

COVID-19 vaccination, ‘di dapat matigil

ni Ryan Sison - @Boses | July 31, 2021

Bukod sa pagsunod sa mga umiiral na health protocols, kabilang sa mga mabisang panlaban sa COVID-19 ang bakuna.

Bagama’t milyun-milyong Pilipino na ang nabakunahan at marami nang ‘fully vaccinated’ o nakatanggap ng dalawang dose ng bakuna, mas marami pa ang hindi nababakunahan.

Dahil dito, ipinag-utos ni Pangulong Rodrigo Duterte na bilisan ang pagbabakuna dahil sa pagkalat ng Delta variant ng COVID-19, na apat na beses na mas agresibo at nakahahawa.

Ayon sa Pangulo, ang pinakamabisang panlaban sa Delta variant ay ang mas mabilis na pagbabakuna sa mamamayan. Dagdag pa rito, ipinaalala nito sa mga fully vaccinated na huwag maging kampante at ‘wag nang hintayin ang nangyari sa Indonesia, Malaysia at Thailand kung saan marami na ang namatay at parang bumalik sa unang araw ng pandemya.

Sa totoo lang, napakaraming hamon sa pagbabakuna nitong mga nakaraang linggo.

Nariyan ang kakulangan ng suplay ng bakuna, binabahang vaccination centers at kawalan ng sistema sa ilang vaccination sites, na nagdulot ng pagkalito sa mga residente.

Kaya naman hirit ng publiko, solusyunan ang mga problemang ito dahil sa halip na maturukan na nga sila ay nagkakaaberya pa.

Kung tutuusin, dapat lang naman na mapabilis ang pababakuna sa taumbayan, lalo pa’t dumarami na nga ang bilang ng tinamaan ng Delta variant sa bansa.

Ngunit ngayong isasailalim sa enhanced community quarantine (ECQ) ang Metro Manila mula Agosto 6, paano ang pagbabakuna?

Panawagan sa mga kinauukulan, gawan ng paraan para maipagpatuloy ang pagbabakuna sa kabila ng mahigpit na quarantine restriction.

Kung naniniwala tayong hindi na dapat hintayin pang lumala ang sitwasyon, galaw-galaw na upang mabakunahan ang lahat sa lalong madaling panahon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com