Rolling community pantry, oks para iwas-pila at hawaan

ni Ryan Sison - @Boses | August 07, 2021

Sa ikatlong pagkakataon ng pagpapatupad ng Enhanced Community Quarantine (ECQ) sa Metro Manila, muling nag-aalala ang marami nating kababayan kung saan kukuha ng pang-araw-araw na pangangailangan.

Ibig sabihin, wala na namang hanapbuhay at asa na lang ulit sa anumang tulong na maiaabot ng gobyerno tulad ng tulong-pinansiyal.

Gayunman, upang patuloy na makapaghatid ng tulong sa higit na nangangailangan, nakatakdang magsagawa ng rolling pantry at house-to-house distribution ng ayuda ang mga community pantry na tumutulong sa mga pamilyang apektado ng lockdown.

Ayon kay Ana Patricia Non, organizer ng unang community pantry sa Quezon City, nagkaroon ng meeting ang community pantry organizers at magkakaroon ng ilang pagbabago upang mas maipamahagi nang ligtas ang mga ayuda, gayundin, para makaiwas sa Delta variant. Aniya, magkakaroon ng rolling pantry, house-to-house distribution at ang ibang community pantry ay tututok sa mga pamilyang naka-quarantine.

Sa kabila ng ilang pagbabago sa community pantry, binigyang-linaw ni Non na hindi sila magpapapila ng mga tao upang makakuha ng ayuda.

Bukod sa pagbabahay-bahay, puwede ring i-drop off ng mga nais mag-donate ang kanilang donasyon na ire-repack ng volunteers saka ihahatid sa mahihirap na pamilya.

Sa kabila ng pagsisikap ng nasyunal at lokal na pamahalaan na maitawid ang tulong sa mga pamilyang higit na apektado ng panibagong lockdown, nakatutuwa na todo-kilos din ang ilan nating kababayan para makatulong sa kapwa.

At kung matutuloy ang mga pagbabagong ito, malaking tulong para sa mga residenteng wala talagang mapagkukunan ng kanilang pangangailangan.

Ngunit kasabay ng layuning makapagpaabot ng tulong, hindi dapat mawala ang mga karagdagang pag-iingat. Kung kinakailangan, makipag-ugnayan sa mga lokal na pamahalaan para magkaroon ng sapat na alalay at maiwasan ang anumang aberya.

Tandaan na kung nais nating makatulong sa pamamagitan ng paghahatid ng pangunahing pangangailangan, hindi dapat makompromiso ang kanilang kaligtasan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pamamahagi ng ECQ ayuda, dapat mas maayos na

ni Ryan Sison - @Boses | August 05, 2021

Matapos tiyakin ng Palasyo na makapagbibigay ng tulong-pinansiyal ang pamahalaan sa mga indibidwal na apektado ng muling pagpapatupad ng enhanced community quarantine (ECQ), sinabi ni Interior Secretary Eduardo Año na posible nang simulang ipamahagi sa Biyernes ang ayuda.

Ito ay matapos ilagay ng Inter-Agency Task Force for the Management of Emerging Infectious Diseases sa pinakamahigpit na lockdown o ECQ ang National Capital Region (NCR) mula Agosto 6 hanggang 20.

Ayon kay Año, P11.2 bilyon ang nakalaan para sa financial aid ng 10.7 milyon katao sa NCR, na tatanggap ng tig-P1,000. Dagdag pa ng kalihim, mahalagang maipamahagi sa lalong madaling panahon ang ayudang ito sa mga benepisaryo na dedepende sa ilalabas na listahan ng lokal na pamahalaan.

Gayundin, nakasalalay umano sa LGUs ang diskarte kung sa paano ipamamahagi ang ayuda tulad ng pagtatakda ng distribution points, house-to-house o money remittance centers.

Kung kakayanin nang maipamigay ang ayuda sa linggong ito, good news ito para sa benepisaryo.

Hindi biro ang dalawang linggong walang hanapbuhay para sa mga ordinaryong pamilya, kaya hindi na dapat patagalin pa ang distribusyon.

Tutal hindi naman na ito ang unang pagkakataon para mamahagi ng ayuda ang mga lokal na pamahalaan, hangad nating magkaroon ng maayos na sistema. Isa pa, sana lahat ng dapat makatanggap ay may matanggap.

‘Ika nga, sa pagkakataong ito, dapat mas handa at may kaalaman na tayo sa mga hakbang na ating ginagawa para sa ating mga kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Suplay ng bakuna at mga magpapabakuna, tiyaking handa sa 24/7 operasyon ng vaccination sites

ni Ryan Sison - @Boses | August 04, 2021

Upang mas marami pang residente ng National Capital Region (NCR) ang mabakunahan, ikinukonsidera ng pamahalaan ang ideya na gawing 24/7 na bukas ang COVID-19 vaccination facilities sa rehiyon.

Para matiyak na hindi maaapektuhan ng enhanced community (ECQ) ang pagbabakuna sa NCR, sinabi ni Interior Secretary Eduardo Año na maaaring palawigin ang operation hours ng mga vaccination sites.

At kung sakaling matuloy ito, magpapadala aniya sila ng karagdagang law enforcement officers upang matiyak ang kaayusan sa mga lugar.

Dahil sa banta ng mas nakahahawa at agresibong Delta variant, dapat lamang na sabayan ng patuloy na pagbabakuna sa mga residente ang ipatutupad na ECQ dahil isa ito sa mga hakbang upang maiwasan ang mabilis na hawaan.

Gayunman, sa kabila ng panawagang bilisan ang pagbabakuna dahil sa banta ng Delta variant, inamin ni Pangulong Rodrigo Duterte na kulang pa rin ang nakukuhang suplay ng bakuna para mabigyan ang lahat ng mga Pilipino.

Giit pa ng Pangulo, hindi nakalilimot ang gobyerno sa tungkulin nito na protektahan ang mga Pilipino at tiniyak na darating ang panahon na maaabutan ng bakuna ang bawat lugar sa bansa.

Habang patuloy ang paghahanap ng diskarte upang maprotektahan ang taumbayan, ang tanong natin, kakayanin ba ang ganitong operasyon?

May sapat na bilang ba ng nagbabakuna, may sapat na suplay at handang magpabakuna ang mamamayan? Matatandaang sa kabila ng pag-iral ng vaccination program ng pamahalaan, marami pa ring takot magpabakuna, partikular ang senior citizens.

Ilan lang ‘yan sa mga kailangan nating paghandaan sa oras na maipatupad ang 24/7 operasyon ng vaccination sites upang masiguradong walang oras at bakunang masasayang.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com