Drayber ng pribado at pampublikong sasakyan, dapat sampolan ‘pag lumabag sa health protocols

ni Ryan Sison - @Boses | August 10, 2021

Dahil sa mga ulat na siksikan ang mga komyuter sa pampublikong sasakyan at hindi nasusunod ang 50% kapasidad ng mga pasahero, nagbigay-babala ang Philippine National Police (PNP) na sasampolan ang mga drayber na lalabag .

Ayon kay PNP Chief P/Gen. Guillermo Eleazar pagsasabihan ng kapulisan ang mga driver na sumunod sa safety and health protocols sa gitna ng matinding banta ng Delta variant at pagpapatupad ng Enhanced Community Quarantine (ECQ) sa Metro Manila.

Dagdag pa ng opisyal, bagama’t bukas ang pampublikong transportasyon sa kabila ng ECQ, dapat pa ring sumunod sa panuntunan ang mga driver at huwag maging pasaway.

Ani Eleazar, dapat manaig ang kooperasyon ng bawat isa at sumunod sa mga alituntunin para hindi na kumalat pa ang Delta variant.

Sa totoo lang, hindi lang drayber ng pampublikong transportasyon ang dapat sampolan. Kung may mga pribadong sasakyan na puno, sitahin din ang mga ito dahil kung may parehong health protocols ang pribado at pampublikong sasakyan, dapat managot ang lahat ng dapat managot.

Samantala, hindi lamang ang mga tsuper ang responsable rito dahil tayong mga pasahero ay dapat magkusang sumunod sa health protocols. ‘Pag nakitang wala nang pagitan ang mga nakasakay sa PUV, ‘wag nang makipagsiksikan.

Minsan, hindi na napapansin ng drayber ang bilang ng sumasakay at bumababa, kaya plis lang, tulungan din natin silang ‘wag lumabag.

Sa kabilang banda, ‘yung iba ay napipilitang sumuway dahil anila, sayang ang kikitain. Gayunman, paalala lang, tulad ninyo, ang mga komyuter na ito ay kumakayod din, kaya hindi dapat malagay sa panganib ang kanilang kalusugan.

Pare-pareho lang tayong naghahanapbuhay sa gitna ng pandemya, kaya plis lang, ikonsidera natin ang isa’t isa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Gobyerno at publiko, dapat seryosohin ang epekto ng Delta variant

ni Ryan Sison - @Boses | August 09, 2021

Makaraang makapagtala ng mahigit 10,000 bagong kaso ng COVID-19 sa nakalipas na dalawang araw, sinabi ng isang opisyal ng Department of Health (DOH) na dama na ang epekto ng Delta variant sa Pilipinas.

Sa mga nakalipas na linggo, pumalo sa higit 8,000 ang mga bagong kaso at noong Biyernes at Sabado ay sumipa sa higit 10,000 ang mga kaso, kung saan ayon sa DOH, possible pang tumaas ang mga ito.

Noong Biyernes, umabot na sa 450 ang naitalang nagkaroon ng Delta COVID-19 variant sa bansa.

Matatandaang ang naturang variant na unang na-detect sa India ang itinuturong dahilan ng pagbagsak ng healthcare system ng ilang parte ng Asya.

Paliwanag ng opisyal, bagama’t hindi pa nakikita kung kailan hihinto ang paglobo ng mga kaso, kailangan pa rin aniyang ipagpatuloy ang mga paghihigpit habang sinusubukang palakasin ang healthcare system.

Samantala, itinaas ng ahensiya ang inaasahang bilang ng mga aktibong kaso sa Metro Manila sa katapusan ng Setyembre kahit magpatupad pa ng mahigpit ng community quarantine classification.

Sa totoo lang, nakababahala dahil patuloy ang pagtaas ng bagong kaso ng COVID-19 sa bansa, gayundin ang Delta variant.

Alam nating mas nakahahawa at agresibo ang variant na ito, kaya pakiusap sa lahat, ‘wag dedmahin ang sitwasyon, dagdagan pa ang pag-iingat at iwasang magpasaway.

Ngayon tayo dapat magseryoso dahil hindi na biro ang kinahakarap ng ating bansa.

Isa pa, tumataas ang bilang ng mga batang nagkakasakit, kaya panawagan sa mga magulang, bantayang maigi ang mga anak at ‘wag hayaang makalabas ng tahanan.

Samantala, pakiusap naman sa gobyerno, bukod sa mga kasalukuyang hakbang tulad ng mahigpit na quarantine classification, palakasin din ang healthcare system ng bansa.

Ang mga health workers natin, kaya pa bang mag-duty? Kung patuloy na tataas ang mga kaso araw-araw at unti-unting napapagod ang ating medical frontliners, paano natin lalabanan ang mga hamon na dala ng pandemya?

‘Ika nga, lahat tayo ay may obligasyon sa laban na ito, at kung lahat tayo ay kikilos, kaya natin itong lampasan.

Sa ngayon, makinig at sumunod tayo sa mga hakbang na ginagawa ng gobyerno dahil ang lahat ng ito ay para sa ikabubuti natin.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Bilang ng available na bakuna, dapat alam ng madlang pipol

ni Ryan Sison - @Boses | August 08, 2021

Upang maiwasan ang pagdagsa ng mga tao sa vaccination sites, hinimok ng isang mambabatas ang Department of Health (DOH) na maging malinaw hinggil sa bilang ng dose ng bakuna kontra COVID-19 ang available sa isang lugar.

Ito ay matapos mag-viral ang mga video kung saan makikita ang maraming tao sa labas ng vaccination sites sa Metro Manila at ilang kalapit-lugar, isang araw bago ang muling pagpapatupad ng enhanced community quarantine (ECQ).

Base sa video, daan-daang residente ang pumila upang magpabakuna kontra COVID-19, ngunit marami ang nadismaya at pinauwi na lamang dahil maagang napuno ang slots para sa bakuna.

Gayunman, paliwanag ng mambabatas, hindi lamang ang bilang ng una at pangalawang dose na naibigay sa mga vaccinees ang dapat iulat kundi maging ang bilang ng doses na available.

Dagdag pa rito, dapat din aniyang malaman ng publiko kung gaano karaming bakuna ang naideliber sa espesipikong LGU, barangay at probinsiya.

Kung maiuulat sa publiko kung gaaano karaming bakuna ang kayang iturok, mas mabuti ito para hindi na rin umasa ang iba. Kumbaga, hindi aksaya sa oras at enerhiya, gayundin, walang exposure sa ibang tao.

Marami pa rin kasi ang nagbabakasakali na maturukan, kaya kahit sinabing limitado lamang ang mababakunahan, todo-pila pa rin para lang mabakunahan.

Bagama’t nakikita natin ang lahat ng pagsisikap at sakripisyo ng maraming lokal na pamahalaan mula nang pumutok ang pandemya, tingnan at pag-aralan kung kakayanin natin itong gawin.

Mas maganda nang maging tapat at magpakatotoo kung para naman ito sa publiko kesa puro pramis tayong makakapagbakuna, pero kulang naman pala ang suplay.

Kung makatutulong ito upang maiwasan ang mahahabang pila at pagdagsa ng mga nais mabakunahan, subukan nating gawin.

‘Ika nga, wala namang masama kung susubukan, lalo na’t kung para naman ito sa ikabubuti ng taumbayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com