Galawan ng mga kawatan, naging mas madali dahil sa teknolohiya

ni Ryan Sison - @Boses | August 21, 2021

Dahil sa COVID-19 pandemic at upang maging mas madali ang mga transaksiyon, mas marami tayong kababayang gumagamit ng e-wallet at bank account.

Sa ganitong paraan kasi, ilang pindot o click lang, maaari ka nang makapagpadala ng pera o makapagbayad ng bills nang hindi lumalabas ng tahanan, kumbaga, maginhawa para sa lahat.

Pero paano kung ang kapalit pala ng kaginhawaang ito ay ginhawa rin para sa mga kawatan?

Kaugnay nito, kapansin-pansing tumaas ang krimen sa cyberspace sa mga pinansiyal na transaksiyon gamit ang bank accounts at e-wallets sa panahon ng pandemya.

Giit ng isang mambabatas, tumaas ang kaso ng phishing o pagnanakaw ng bank o data accounts at cash mules o mga indibidwal na tumanggap, nag-acquire o naglipat ng ninakaw na mga salapi mula sa phishing o iba pang uri ng cybercrime.

Dahil dito, sinimulan nang talakayin at repasuhin ng House Committee on Banks and Financial Intermediaries ang House Bill 9615 o ang Bank Account at E-Wallet Regulation Act upang magpataw ng mas mabigat na parusa sa ganitong uri ng ilegal na gawain.

Sa totoo lang, nakalulungkot isipin na ang bahagyang ginhawa na dulot ng teknolohiya ay may kaakibat na panganib sa krimen.

Ang nakababahala pa, parami nang parami ang nabibiktima at hindi basta-bastang halaga ang nalilimas ng mga kawatan.

Totoo na pati ang mga kawatan ay high-tech na. Ang masaklap pa, naging mas madali ang pagtangay ng pera dahil ilang click lang, tapos na ang krimen.

Kaya naman, panawagan sa mga kinauukulan, sana lang ay matugunan din ang mga gawaing ito at dapat matiyak ang ligtas ang cyberspace sa lahat ng pagkakataon, lalo na ngayong may malaki itong pakinabang sa ating kasalukuyan sitwasyon.

At kayong mga kawatan d’yan, hintay-hintay lang dahil may kalalagyan din kayo.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Lockdown at pagtaas ng COVID-19 cases, hamon sa vaccination program

ni Ryan Sison - @Boses | August 19, 2021

Bagama’T tuloy ang national vaccination program sa kabila ng mahigpit na quarantine restrictions, kapansin-pansin ang ilang pagbabago sa takbo ng pagbabakuna.

Mapapansing bumagal ang pagbabakuna kontra COVID-19 sa nakalipas na linggo kahit tumataas na bilang ng nahahawaan at mas mahigpit na quarantine restrictions.

Base sa datos ng gobyerno, 475,304 lang ang average na naiturok na COVID-19 vaccine doses kada araw mula Agosto 9 hanggang 15, na mas mababa kumpara sa 516,601 noong Agosto 2 hanggang 8.

Gayunman, ito ang ikalawang sunod na linggo na nakapagtala ng pagbagal sa pagbabakuna kahit target ng gobyernong sulitin ang pagpapatupad ng mga lockdown sa ilang bahagi ng bansa sa pamamagitan ng pagpapatuloy ng vaccinations.

Samantala, paliwanag ni vaccine czar Secretary Carlito Galvez Jr., bukod sa pagbabakuna, abala rin ang maraming lokal na pamahalaan sa pagtugon sa tumataas na mga kaso ng COVID-19 at pamimigay ng ayuda sa mga residenteng apektado ng lockdown.

Tulad sa sa Navotas City, pansamantalang isinara ang isa sa pitong vaccination sites dahil may ilang personnel na nagpositibo sa COVID-19 o naging close contact. Habang sa Marikina, nasa 10,000 muna ang target bakunahan ng unang dose hanggang mula sa target na 15,000 katao noong nakaraang linggo.

Sa Las Piñas, iniakyat sa 8,000 ang target bakunahan kada araw mula sa dating 5,000 at sa Maynila, nananatili sa humigit-kumulang 35,000 doses kada araw ang nababakunahan.

Sa higit 42.5 milyong COVID-19 vaccine doses na dumating sa Pilipinas, 28.3 milyon ang naiturok na, kung saan nasa 12.7 milyong indibidwal na ang fully vaccinated sa bansa, habang 15.5 milyon naman ang partially vaccinated.

Bagama’t nauunawaan natin ang mga karagdagang problema na dala ng pandemya, wala naman tayong choice kundi harapin ang mga ito upang patuloy ding matugunan ang mga pangunahin nating suliranin.

At siyempre, ang unang problema ay ang kakulangan ng suplay ng bakuna. Ngunit sa linggong ito, may inaasahang doses ng bakuna at sana lang ay mabilis itong maipamahagi sa mga lokal na pamahalaan at maiturok sa publiko.

Hangad nating maipagpatuloy ang national vaccination program sa kabila ng mga problemang ito dahil sa ngayon, ito ang inaasahan nating panlaban sa virus.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mahuhuling nagpa-booster shot, turuan ng leksiyon!

ni Ryan Sison - @Boses | August 18, 2021

Aprub kay Department of the Interior and Local Government (DILG) Secretary Eduardo Año ang panawagan sa mga alkalde na bumuo ng mga polisiya na magpaparusa sa mga taong nagpapa-booster shot ng COVID-19 vaccines.

Ito ay dahil hindi pa aniya ito inirerekomenda at kulang pa ang suplay ng bakuna sa bansa. Dahil dito, inatasan niya ang Philippine National Police (PNP) na imbestigahan ang mga ulat hinggil sa umano’y pagpapaturok ng ikatlong shot ng COVID-19 vaccine ng dalawang indibidwal sa Quezon City.

Matatandaang noong nakaraang linggo, dalawang fully vaccinated individual ang sinampahan ng kaso ng QC government dahil sa COVID-19 vaccination fraud.

Ang mga ganitong ilegal na aksiyon aniya ang nagiging sanhi upang mapagkaitan ng bakuna ang iba pang mamamayan na hindi pa nakatatanggap ng bakuna.

Sa totoo lang, nakadidismaya na may mga ganitong insidente sa kabila ng kakulangan ng suplay ng bakuna sa bansa. Kumbaga, masyadong makasarili ang mga gumagawa nito dahil habang naka-tengga ang iba sa kahihintay na magkaroon ng iskedyul at suplay ng bakuna, ang ilan nating kababayan ay sobra-sobra na pala ang nakukuhang bakuna.

Bukod sa pagpaparusa sa mga nagpapa-booster shot, kinakailangan ding magkaroon ang nasyunal na pamahalaan ng master list ng mga nabakunahan sa bansa.

Sa ganitong paraan, mas madaling mabeberipika kung nakatanggap na ng COVID-19 vaccine o hindi pa ang isang nais magpabakuna. Isa pa, matitiyak na maituturok sa nangangailangan ang bakunang ito.

Bagama’t nauunawaan nating lahat tayo ay gustong maprotektahan ang ating sarili laban sa virus, ‘wag naman tayong gahaman. Marami tayong kababayan na naghihintay na maturukan kaya plis lang, ‘wag kalimutan ang sinasabi nating “We heal as one”.

Kaya naman, panawagan sa mga kinauukulan, galaw-galaw upang matutukan din ang ganitong isyu at masiguradong natuturuan ng leksiyon ang mga gumagawa nito.

Tandaan na ang pandemyang ito ay laban nating lahat, kaya utang na loob, hayaan nating makatanggap ng bakuna ang iba pa ating mga kababayan at iwasang maging makasarili.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com