Socmed platforms, simulan nang linisin vs. maling impormasyon sa COVID-19

ni Ryan Sison - @Boses | August 27, 2021

Kaugnay ng patuloy na paglaganap ng maling impormasyon tungkol sa COVID-19, minabuti ng video sharing website na YouTube na tanggalin ang napakaraming videos na naglalaman ng anila’y ‘dangerous coronavirus misinformation’.

Ayon sa website, higit isang milyong videos na naglalaman ng maling impormasyon hinggil sa virus ang kanilang natanggal.

Sa pahayag ng Google, ang hakbang na ito ay dahil sa mga banat ng opisyal ng mga bansa sa kabiguang mapigilan ang pagkalat ng mga mali at nakasasamang impormasyon tungkol sa COVID-19.

Gayundin, ang pag-alis ng mga videos ay base sa opinyon ng mga eksperto mula sa iba’t ibang health organizations, kasama ang US Centers for Disease Control at World Health Organization (WHO).

Minamadali na umano ng Google ang pagtanggal sa mga videos na may maling impormasyon at kasabay nito ang pagbibigay ng tama at angkop na impormasyon tungkol sa COVID-19.

Kung tutuusin, good news ito dahil kung mapipigilan ang pagkalat ng maling impormasyon tungkol sa COVID-19, mas malalaman ng tao kung ano ang mga dapat at hindi dapat paniwalaan.

Sa panahon ngayon, napakahalaga at dapat na tamang impormasyon lamang ang maibahagi sa publiko para sa kanilang kaligtasan, gayundin sa kanilang pamilya.

At ngayong ginagawa ng media platforms ang kanilang trabaho upang labanan ang pagkalat ng mga ‘ika nga ay fake news, sana tayo ay ganundin. Kumbaga, dapat responsable rin tayo.

Bago mag-post, tiyakin munang galing sa beripikadong account ang impormasyon. At bago maniwala sa mga kumakalat na balita, alamin kung tunay ito o hindi.

Isa pa, kapag alam nang fake news at hindi naman makatutulong sa sitwasyon, ‘wag nang i-post dahil perhuwisyo lang.

Gayunman, panawagan natin sa mga kinauukulan, sana’y maging mabilis ang aksiyong ito at tuluyang maparusahan ang mga gumagawa at nagpapakalat ng maling impormasyon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

May ngipin na batas vs. nagpapakalat ng fake news sa COVID-19 vaccination

ni Ryan Sison - @Boses | August 26, 2021

Para malabanan ang pagkalat ng maling impormasyon laban sa national vaccination program, hinikayat ng isang medical professional ang mga mambabatas na magpasa ng batas laban sa mga nagpapakalat ng maling impormasyon hinggil sa COVID-19 vaccination.

Giit ng eksperto, ang maling impormasyon ay naging dahilan ng hindi pagtanggap ng ilang Pilipino ng kanilang unang dose ng bakuna, at karamihan sa target ng impormasyong ito ay ang mga nakatatanda.

Ang panawagang ito ay matapos lumabas ng statement ng isang doktor na ang COVID-19 vaccines ay nagpo-produce diumano ng toxins sa loob ng katawan ng tao. Kaya paliwanag ng eksperto, ang mga ganitong pahayag ay tila nagsasabing walang proteksiyon na makukuha ang isang tao na nabakunahan kontra sa virus.

At sa halip na maging kakampi sa laban kontra pandemya, dagdag-problema pa ang ilan nilang kahanay. Dahil doktor din ang mga ito, ang anumang post o statement ng mga ito ay madaling pinaniniwalaan ng taumbayan. Ang ending, nalilito ang marami at aatras na lang sa pagpapabakuna.

Isa pa, matatandaang dumagsa ang mga nais magpabakuna sa ilang vaccination sites matapos makatanggap ng balitang hindi makatatanggap ng ayuda ang mga hindi bakunado. Ang nangyari, hindi nakontrol ang dami ng tao at nalabag ang social distancing.

Sa totoo lang, nakalulungkot dahil imbes na magkusa tayong tumigil sa pagpapakalat ng maling impormasyon, heto at kailangan na yata ng batas upang matigil ang gawaing ito.

Gayunman, dapat lang patawan ng mabigat na parusa ang mga taong sangkot dito dahil malaki ring perhuwisyo sa lipunan ang dala nito.

‘Ika nga, ang pandemya ay hindi lamang laban ng medical frontliners at gobyerno. Tayong mamamayan, netizens at ang media ay kasama rin dito, kaya utang na loob, gawin natin ang kani-kanyang responsibilidad upang mabawasan ang problemang kinakaharap ng bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Madlang pipol, ‘di dapat magdusa sa kakulangan ng bakuna

ni Ryan Sison - @Boses | August 25, 2021

Kung noon ay isinusulong na magkaroon ng hiwalay na pampublikong sasakyan ang mga bakunado at hindi, ngayon ay humihirit na rin ng mas maluwag na protocols ang mga negosyante para sa mga indibidwal na fully vaccinated.

Sa panukala ng mga negosyante, bukod sa puwedeng lumabas ng bahay para magtrabaho ang mga bakunado, puwede rin silang pumunta sa malls at iba pang establisimyento na pinapayagang mag-operate ng gobyerno. Gayundin, papayagang mag-dine in sa mga restoran ang mga ito.

‘Yun nga lang, tulad ng inaasahan, hindi lahat ay pabor dito. Marami tayong kababayan na nagpahayag ng kani-kanyang opinyon at suhestiyon, habang si Health Secretary Francisco Duque naman, mayroon ding agam-agam dahil puwede aniyang kuwestiyunin ang legalidad nito.

Sa totoo lang, nauunawaan naman natin ang layuning kahit paano ay patuloy na makapag-negosyo, pero sa totoo lang, marami pang dapat pag-aralan at ikonsidera bago ito ipatupad.

Nariyan ang posibilidad na magkaroon ng diskriminasyon at posibleng maging dahilan ito upang malimitahan ang pagkilos ng ating mga kababayan.

Bagama’t walang pilitan ang pagpapabakuna, para na rin nating sinasabing i-require na ito para mas malayang makakilos ang bawat isa.

Hindi natin nilalahat, pero desisyon ng iba na hindi talaga magpabakuna, pero marami rin tayong kababayan na naghihintay lamang na maturukan. At siyempre, dahil pa rin ‘yan sa kakulangan ng suplay ng bakuna, kaya hindi dapat taumbayan ang magdusa kung bakit hindi pa sila nababakunahan.

Mabuti na lang, may ilang lungsod sa pumapayag nang magbakuna sa mga ilang taga-karating-lugar dahil makatutulong ito upang matugunan ang mabagal na roll out ng bakuna sa ibang lungsod.

‘Ika nga, roon tayo sa mas epektibo at makatotohanang solusyon. Kumbaga, dapat win-win sa lahat at walang kawawa.

Kaya malaking hamon sa gobyerno ang pagbangon ng ekonomiya habang hinaharap ang iba pang mga problemang dala ng pandemya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com