Bakuna muna para sa lahat, iprayoridad bago booster shots

ni Ryan Sison - @Boses | August 30, 2021

Bagama’T hindi isinasara ng Department of Health (DOH) ang pintuan sa usapin ng pagkakaroon ng booster shots, iginiit nitong mawawalan ng pagkakataong makapagpabakuna ang ilang Pilipino kung matutuloy ang pagbibigay ng booster shots ngayon.

Ito ay dahil pa rin umano sa unstable na suplay ng COVID-19 vaccine sa bansa.

Paliwanag ng opisyal ng ahensiya, ikinukonsidera nila ang pagkakaroon ng ‘equity’, kasabay ng pagsasaalang-alang ng kaligtasan ng ating mga kababayan.

Bukod pa rito, wala pa aniyang pinal na rekomendasyon ang vaccine experts sa bansa hinggil sa kung sino ang dapat mabigyan ng booster shots, kung gaano ito kadalas dapat ibigay at kung ano’ng mga brands ang dapat bilhin.

Samantala, mayroon na umanong naipong pera para sa booster shots sa susunod na taon kung sakali at nakalagay ito sa kanilang panukalang pondo na tinatalakay naman sa Kamara.

Siguro nga, sa ngayon ay imposible pang magkaroon ng booster shots ang mga nabakunahan na kontra COVID-19, kaya naman panawagan natin sa mga awtoridad, tiyaking mababakunahan muna ang mga Pilipinong hindi pa nakatatatanggap ng unang dose sa mga darating na araw.

Ang importante ngayon ay ang mabakunahan ang mayorya ng mga Pilipino nang sa gayun ay makamit natin ang ‘herd immunity’ sa unang quarter ng susunod na taon.

‘Ika nga, isa-isa lang dahil mahina ang kalaban. Pero hangad nating maisakatuparan muna ang mga plano na mabakunahan ang marami nating kababayan.

Malaking tulong ito bilang panlaban sa malalang epekto ng virus. At kapag mayorya na ng Pilipino ang bakunado, saka natin pagtuunan ng pansin ang pagkakaroon ng booster shots.

Pero sa ngayon, tumutok muna tayo sa mga pangunahing problema at kung paano sosolusyunan at tutugunan ang mga ito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Bgy. officials na nagnanakaw ng ayuda, mahiya naman kayo!

ni Ryan Sison - @Boses | August 29, 2021

Sa gitna ng patuloy na pakikipaglaban sa pandemya, talagang hindi papaawat ang ilan nating kababayan sa panlalamang sa mga higit na nangangailangan.

Isa na nga rito ang pagkubra ng ayuda na hindi naman para sa kanila. Ang masaklap, ang sangkot ay mga opisyal at dati nang nagsilbi sa barangay.

Kaugnay nito, isang barangay chairman at tatlong iba pa ang arestado sa pagnanakaw ng ayudang nakalaan para sa social amelioration program (SAP).

Nag-ugat ang pagkakaaresto sa mga ito matapos makatanggap ng ulat ang mga awtoridad mula sa mga residente na pumunta sa claiming area at nalamang may kumuha na ng perang nakalaan sa kanila.

Ayon sa isang biktima, sinabi ng social worker na na-claim na niya ang ayuda pero iginiit nitong wala pa siyang nakukuha. Nang makita ng social worker ang litrato ng nag-claim, nalaman na ginamit lamang nito ang pangalan ng biktima at bago pa man siya makarating, may naunang pumunta at pineke ang kanyang ID gamit ang kanyang pangalan.

Dahil dito, agad na nakipag-ugnayan ang Manila Department of Social Welfare sa MPD Special Mayor’s Reaction Team at napag-alamang taga-barangay mismo ang mga kawatan.

Ang mga suspek ay dating opisyal ng Bgy. 608 ng Sta. Mesa at dating tanod, habang kasama rin ang barangay chairman at isang kagawad.

Ang siste, si kagawad ang gumawa ng certification habang ang kapitan naman ang pumirma.

Nahaharap sa mga reklamong malversation of public funds at falsification of public documents ang mga suspek.

Sa totoo lang, nakadidismaya dahil tila walang kadala-dala ang mga opisyal na ito. ‘Yung tipong hindi na madaan sa mga paalala at babala kaya todo-gawa pa rin ng ilegal.

Ang masaklap pa, pinag-iinteresan ang kakarampot na pera na inaasahan ng marami nating kababayan.

Para sa mga opisyal na ginagamit lamang ang puwesto para sa pansariling interes, mahiya naman kayo. Ngayon, kayo kailangan ng taumbayan pero kung hindi ninyo magagampanan ang inyong tungkulin, pasensiyahan na lang. Dapat lang kayong turuan ng leksiyon at managot sa inyong mga kapabayaan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagbabakuna sa mayorya ng Pilipino, ‘wag puro pramis!

ni Ryan Sison - @Boses | August 28, 2021

Sa Enero 2022, target ng pamahalaang mabakunahan ang lahat ng Pilipino kontra COVID-19.

At para maisakatuparan ito, sinabi ng Department of Finance (DOF) na may tiyak nang suplay ng bakuna. Ayon kay Finance Sec. Carlos Dominguez III, na-secure o tiyak nang may 194.89 milyong doses ng bakuna, na kayang maiturok sa higit 150 milyong katao. Aniya, galing ang mga naturang bakuna mula sa donasyon, binili ng pribadong sektor at binili ng gobyerno.

Gayunman, sa susunod na buwan, may inaasahan pang darating na 42.11 milyong doses at karagdagang 103.59 milyong doses mula Oktubre hanggang Disyembre.

Samantala, base sa ulat ni vaccine czar Sec. Carlito Galvez Jr., nasa mahigit 42 milyong doses ng COVID-19 vaccines sa 48.8 milyong doses na nakuha ng gobyerno ang na-deploy na sa iba’t ibang vaccination sites sa bansa.

Sa ngayon, nasa 13.3 milyong mga Pilipino na ang fully vaccinated, habang nasa higit 18 milyon ang nakatanggap ng unang dose ng bakuna.

Kung magkakaroon ng sapat na suplay ng bakuna kontra COVID-19 bago matapos ang taon hanggang Enero 2022, good news ito para sa lahat. Ibig sabihin, mas marami nang matuturukan, pero ang tanong, lahat ba ay handa nang magpabakuna?

Hindi maitatangging marami pa ring desisido na hindi talaga magpabakuna at mayroon ding nagdadalawang-isip pa dahil napangungunahan ng takot. Kaya panawagan sa mga kinauukulan, tutukan pa rin ang pagpapalakas ng tiwala ng taumbayan sa bakuna.

Baka kasi bili tayo nang bili at tuloy nga ang pagbabakuna, pero ang ending ay masasayang lang ang mga ito dahil ayaw magpaturok ng iba.

Sana ay hindi na ito hanggang pangako na lang. Sa pagkakataong ito, dapat makita at maramdaman ng taumbayan na may ginagawa kayo para tugunan ang kanilang mga hinaing.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com