‘Di lang madlang pipol ang tutol sa ‘bakuna bubble’

ni Ryan Sison - @Boses | September 03, 2021

Sa patuloy na pagsusulong ng mga negsosyante na magpatupad ng ‘bakuna bubble’, kung saan magkakaroon ng prebilehiyo ang mga indibidwal na fully vaccinated na makapasok sa ilang establisimyento at transportasyon, mayroong ibang opinyon ang mga eksperto at gobyerno.

Kaugnay nito, tutol ang World Health Organization (WHO) at Department of Health (DOH) sa isinusulong na ‘bakuna bubble’.

Ayon sa WHO, kalaunan ay sasabog ang “bubble” dahil hindi garantisadong ligtas sa COVID-19 ang mga bakunadong indibidwal. Kaya sa halip na ipatupad ito, hinimok ng mga eksperto ang gobyerno na palakasin ang pagbabakuna ng mga senior citizen at mga taong may comorbidity.

Gayunman, tutol din ang DOH sa bakuna bubble dahil magkakaroon pa rin ng dine-in sa mga restoran na hindi mairerekomenda, lalo’t nariyan ang banta ng mas nakahahawang Delta variant.

Matatandaang sa ilalim ng panukala na naunang pinaboran ng mga negosyante, papayagang makapasok ang mga baknado sa mga restoran, salon at gym at bigyan din sila ng hiwalay na transportasyon.

Kung tutuusin, hindi lamang ang mga kinauukulan ang tutol sa panukalang ito dahil ang taumbayan ay ganundin.

Giit nila, maituturing itong diskriminasyon, lalo pa’t napakarami pang hindi nababakunahan at pahirapan ang pagpapabakuna sa ilang lugar.

Isa pa, hindi naman sila ang dahilan kaya marami pang hindi bakunado, kaya tulad ng palagi nating sinasabi, hindi dapat magdusa ang taumbayan sa kakulangan ng bakuna.

Bagama’t nauunawaan nating napakarami nang negosyo na nalugi dahil sa pandemya, at marami ring nagsisikap na makabawi kahit kaunti, pero ang problema, maraming dapat ikonsidera upang mapanatiling ligtas ang lahat, lalo na ang mga kustomer.

Bakunado man o hindi, lahat tayo ay nahaharap sa banta ng COVID-19. Kaya pakiusap sa lahat, ‘wag nang ipilit ang ganitong mga panukala kung hindi talaga uubra. Baka kasi sa halip na makatulong sa mga negosyo ay pagmulan pa ng ibang problema.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Solusyon sa Delta variant, ‘wag puro lockdown!

ni Ryan Sison - @Boses | September 02, 2021

Sa dami ng dinarapuan ng Delta variant, na dahilan din ng malaking pagtaas ng mga bagong kaso ng COVID-19, sinabi ng World Health Organization (WHO) na Delta variant na ang dominant variant sa bansa.

Ayon kay WHO Country Representative Dr. Rabindra Abeyansinghe, higit 70% ng samples na isinailalim sa pinakahuling sequencing ang nagpositibo sa naturang variant.

Dagdag pa ng opisyal, sa ganitong uri ng transmission, masasabing mayroon nang community transmission o pagkalat sa mga komunidad ng Delta variant, bagay na hindi na umano nakagugulat sa karanasan ng Pilipinas.

Matatandaang nauna nang sinabi ni Dr. Rontgene Solanta, infectious disease specialist, na posibleng kalat na ang Delta variant sa bansa dahil na rin sa nakikitang hawaan ng COVID-19 sa mga magkakapamilya o magkakasama sa bahay.

Samantala, kinumpirma ni Health Usec. Maria Rosario Vergeire na tukoy na ang Delta variant sa lahat ng rehiyon sa bansa, maliban na lamang sa BARMM. Habang ang pinakamaraming kaso nito ay naitala sa Region IV-A, III at National Capital Region (NCR).

Tulad ng nabanggit, hindi na ito nakagugulat kung magkaroon ng mas maraming hawaan ng Delta variant sa bansa.

Sa dami ba naman ng pasaway nating kababayan, talagang hindi maiiwasan ang hawaan.

Isa pa, punuan na rin ang maraming quarantine facilities, kaya ang ending, nagho-home quarantine na lang ang ibang nagpopositibo sa sakit at ang masaklap, sa bahay nangyayari ang hawaan.

Ngayong kumpirmado nang Delta variant ang naging dominante sa bansa — ang tanong, paano natin ito lalabanan?

Nandoon na tayo sa mas nakahahawa ang variant na ito at ‘ika nga, nariyan na ang virus at wala na tayong magagawa kundi mamuhay nang kasama ito kaya ano nang solusyon, lockdown na naman ba?

Pakiusap sa mga kinauukulan, isip-isip pa more ng mga paraan upang mapigilan ang mas nakahahawang variant na ito. Hindi na ubra ang puro lockdown, kaya plis lang, galaw-galaw.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Booster shots, mas kailangan ng health workers

ni Ryan Sison - @Boses | September 01, 2021

Booster shots para sa health workers.

Ito ang mungkahi ng isang eksperto kung saan nais nitong rebyuhin ang batas hinggil sa pagbibigay ng booster shots para sa health workers na mas madalas ma-expose sa virus.

Paliwanag ng eksperto, base sa mga datos, ang immunity mula sa COVID-19 vaccines na gawa ng Sinovac Biotech ay nababawasan pagkalipas ng anim na buwan.

Base umano sa kanyang obserbasyon, sa mga ospital na kanyang pinapasukan, may “moderate number” ng health workers na tinamaan ng sakit sa kabila ng pagkakaroon ng full immunity. At kahit mild cases lamang ang mga ito, maaari aniyang maapektuhan ang healthcare services sa bansa.

Dagdag pa nito, bagama’t nabawasan ang severe COVID-19 cases dahil sa bakuna, posibleng hindi ito sapat upang protektahan ang isang tao laban sa symptomatic infection.

Karapat-dapat lang mabigyan ng karagdagang proteksiyon ang ating health workers laban sa virus dahil tulad ng sinabi ng eksperto, posibleng bumagal ang serbisyo sa taumbayan kung patuloy na tatamaan ng sakit ang medical frontliners. Kung mapipilay ang health workforce, paano na ang laban natin sa pandemya?

Lalo pa ngayong nakaamba ang mass resignation ng mga health workers dahil sa naantalang sahod at benepisyo na ipinangako ng gobyerno.

Kulang na nga sa benepisyo, pati pa ba ang proteksiyon kontra virus ay ipagdadamot natin?

Kaya naman, pakiusap sa kinauukulan, ikonsidera ang kaligtasan ng ating frontliners.

Hindi lamang ito para sa kanilang sarili kundi para rin sa ikabubuti ng nakararami.

Isa pa, ngayon ang pagkakataon para makinig at sumunod tayo sa suhestiyon ng mga eksperto. At walang masama kung mag-a-adjust tayo, alang-alang sa ating magigiting na medical frontliners.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com