COVID-19 response, kailangan nang i-level up

ni Ryan Sison - @Boses | September 06, 2021

Patuloy na pagdami ng pasyenteng nagpopositibo sa COVID-19 at mga pasyenteng namamatay sa labas ng emergency room habang naghihintay na ma-admit.

Ilan lang ‘yan sa kasalukuyang nangyayari habang patuloy na hinaharap ng bansa ang COVID-19 pandemic.

Kaugnay nito, kamakailan ay nagpahayag ng pagkadismaya ang isang medical group hinggil sa paraan ng pagresponde ng gobyerno sa pandemya.

Giit ng eksperto, may mga sitwasyon sa ilang ospital sa Laguna at Cebu kung saan kinakailangan nang mamili ng health workers kung sinong mga pasyente ang puwedeng gumamit ng respirator, bagay na labag sa kalooban nila dahil lahat ng pasyente ay nais nilang maisalba.

Dahil sa mga nangyayari sa bansa, iginiit din nitong ito na ang ‘wake up call’ sa gobyerno, lalo pa’t patuloy ang pagkalat ng Delta variant ng COVID-19, na mas nakahahawa at agresibo.

Matatandaan ding kamakailan ay kinumpirma ng WHO na mayroon nang community transmission ng naturang variant.

Babala pa ng eksperto, kung hindi magkakaroon ng pagbabago sa pagtugon ng gobyerno sa pandemya, posibleng bumagsak ang health care system sa bansa, tulad ng nangyari sa India sa kabila ng pagkakaroon ng Delta surge.

Isa pa, pinuna rin nito ang intensive care unit (ICU) utilization rate at occupancy rate sa Department of Health (DOH) bulletin. Aniya, hindi tugma ang datos sa nakikita ng mga tao at ang talagang nangyayari sa mga pagamutan.

Base sa DOH, 72% ng ICU beds sa bansa ang okupado, habang 71% naman ng ward beds ang ginagamit ng pasyente.

Tulad ng palagi nating sinasabi, hindi lamang laban ng gobyerno ang kinakaharap nating pandemya dahil laban din ito ng frontliners. Kaya naman pakiusap lang, pakinggan natin ang mga suhestiyon at opinyon ng eksperto.

Kung nais nating makapagbigay ng de-kalidad na serbisyo sa publiko, dapat nating seryosohin ang babala ng mga eksperto.

Ngayong nakita natin ang kahalagahan ng health care system, kailangan itong pangalagaan para sa ikabubuti ng lahat.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Face shield bilang dagdagproteksiyon vs. COVID-19,epektibo ba talaga?

ni Ryan Sison - @Boses | September 05, 2021

Kabilang ang Pilipinas sa ilang bansa na nagre-require ng paggamit ng face shield sa mga pampublikong lugar.

Ito ay dahil naniniwala ang pamahalaan na nagbibigay ito ng karagdagang-proteksiyon kontra COVID-19. At kahit marami tayong kababayan na hindi naniniwalang nakatutulong ito, no choice kundi sumunod.

Gayunman, matapos sabihin ng World Health Organization (WHO) na kailangan pa ng maraming ebidensiya upang mapatunayan kung talagang epektibo kontra COVID-19 ang face shield, naninindigan ang Malacañang na hindi dapat ipatigil ang paggamit nito.

Ayon kay Presidential Spokesman Harry Roque, mas makabubuting hintayin na lamang ang WHO na maglabas ng expert opinion kung mabisa o hindi ang paggamit ng face shield.

Dagdag pa ng opisyal, ang pag-oobliga sa paggamit ng face shield sa bansa ay base na rin sa rekomendasyon ng medical experts.

Palaisipan pa rin sa marami nating kababayan kung talagang epektibo ang paggamit ng face shield bilang karagdagang proteksiyon kontra COVID-19.

At sa kabila ng mga panawagang ‘wag na itong ipatupad, tuloy pa rin ang umiiral na protocols kaugnay nito.

Sa totoo lang, maraming duda kung talagang nakatutulong ang face shield bilang dagdag-proteksiyon laban sa virus, gayundin, dagdag-gastos at dagdag-kalat lang umano ang mga ito.

Kaya ang tanong, ano ang totoo, may dagdag-proteksiyon ba talaga o dagdag-gastos lang?

Kung kinakailangang pag-aralan pa ang karanasan ng Pilipinas para mapatunayang epektibo nga ito, gawin na. Kapag napatunayan namang nakatutulong ito, ituloy ang pagpapatupad, pero ‘pag hindi, stop na.

Huwag na nating hayaan ang ating mga kababayan na lalo pang mahirapan dahil sa mga ganitong hakbang.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga kawatan ngayong ‘ber months’, parang virus na nag-aabang ng biktima

ni Ryan Sison - @Boses | September 04, 2021

Para sa ligtas na Kapaskuhan, ipinag-utos ni Philippine National Police (PNP) chief Police General Guillermo Eleazar ang pagpapaigting ng police visibility sa mga pampublikong lugar lugar ng malls at shopping centers.

Kadalasan kasing tumataas ang crime rate sa tuwing sumasapit ang ‘ber months’, na hudyat ng pagsisimula rin ng mahabang Kapaskuhan at pagdagsa ng mamimili sa mga shopping centers.

Bagama’t limitado ang kilos dahil sa ipinatutupad na quarantine restrictions, hindi umano dapat maging kampante ang mga mamimili laban sa pananamantala ng ilang indibidwal.

Ayon pa sa opisyal, dahil hindi pangkaraniwan ang mga panahong ito dahil sa pandemya, dapat mas maging maingat, lalo pa ngayong dumarami ang mga variant ng virus.

Titiyakin aniya nila ang seguridad ng bawat mamimili at mga nasa lansangan laban sa mga kawatan habang ipinatutupad ang health protocol.

Dahil dito, nananawagan ang PNP sa publiko na makipagtulungan sa pamamagitan ng pagsunod sa mga umiiral na health protocols kapag lalabas ng bahay.

Malaking tulong ang mga nakakalat na pulis sa lansangan upang maiwasan ang krimen.

Gayunman, pakiusap lang sa lahat, iwasang maging kampante dahil kahit maraming kapulisan sa paligid, hindi natin alam kung kailan sasalakay ang mga kawatan.

Panawagan naman sa ating kapulisan, tiyaking mapananatili ang peace and order sa lahat ng lugar, lalo na ngayong nalalapit ang Kapaskuhan.

Kung tutuusin, hindi na bago sa atin ang pagtaas ng bilang ng krimen tuwing holiday season at tulad ng nabanggit, hindi pangkaraniwan ang panahon dahil nahaharap tayo sa pandemya na dala ng COVID-19, kaya hindi lamang sa virus tayo dapat mag-ingat kundi pati sa mga kawatan.

Tulad ng virus, nariyan lang din sila at nag-aabang ng mga mabibiktima.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com