Mga sundalo at militar, dapat magpokus sa trabaho

ni Ryan Sison @Boses | Dec. 1, 2024

Sa kabila ng mga kaguluhan at isyu sa pulitika, dapat na manatiling nakapokus ang mga sundalo sa kanilang misyon at mandato na protektahan ang sambayanang Pilipino, tiyakin ang seguridad ng bansa at ipagtanggol ang ating teritoryo.  

Ito ang naging pahayag ni Pangulong Ferdinand “Bongbong” Marcos Jr. sa pagbisita niya sa Southern Luzon Command (SOLCOM) sa Camp General Guillermo Nakar sa Quezon.

Sinabi ni PBBM na ang trabaho ng mga sundalo ay panatilihin ang kapayapaan sa ating bansa at protektahan ang mga mamamayan.

Binigyang-diin naman ng Pangulo na buo ang suporta ng administrasyon sa mga nasa hanay ng Armed Forces of the Philippines (AFP), Philippine National Police, at lahat ng kawani sa ilalim ng SOLCOM.

Sinabi rin ni PBBM na sa kabila ng kasalukuyang estado ng pulitika sa bansa. kailangan na ang mga sundalo at militar ay manatiling nakatuon sa kanilang mandato na tiyakin ang kapayapaan, seguridad, at kaligtasan ng mga mamamayan at teritoryo ng Pilipinas. 

Hindi aniya dapat sila ma-distract o maapektuhan sa ingay sa pulitika habang ang kanilang pansin ay dapat na nakasentro sa kapakanan ng publiko.

Pinasalamatan naman ng Pangulo ang mga ito sa kanilang dedikasyon at serbisyo, lalo na ang kanilang mabilis at epektibong pagtugon sa magkakasunod na bagyong tumama sa bansa, kung saan kinikilala na ngayon ang Pilipinas bilang eksperto sa disaster response.

Marahil, mas makabubuti kung itutuon na lamang ng ating mga sundalo at militar, mga nasa law enforcement at iba pang katulad nito sa kani-kanilang trabaho upang hindi na sila magambala pa.

Kumbaga, huwag na nilang pansinin o makisawsaw pa sa pulitika at hayaan na lamang nila ang mga pulitiko mismo na magresolbahan sa kanilang problema.

Gawin na lamang nilang maging mahusay sa kanilang piniling propesyon upang hindi na madagdagan pa ang nangyayaring gulo sa ating bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Tulong at pagkalinga, ibigay sa mga abused women

ni Ryan Sison @Boses | Nov. 30, 2024

Higit na kailangan ng pag-aaruga at pagkalinga natin sa mga kababaihan na naging biktima ng karahasan at pang-aabuso. 

Ito ang ginawa ng Department of Social Welfare and Development (DSWD), kung saan tinulungan ang 12,055 indibidwal na mga victim-survivor ng violence against women and children (VAWC) mula 2021 hanggang 2023.

Ayon kay Social Welfare Officer Carol Nuyda, alinsunod sa Republic Act 9262 o ang Anti-VAWC Act of 2004, dapat na kinikilala natin ang karapatan ng mga biktima ng karahasan. Dahil dito, dapat natin silang bigyan ng naaayon, available, at accessible na mga serbisyo. 

Aniya, ang DSWD ay nagbigay ng comprehensive assistance sa mga survivor o nakaligtas sa karahasan sa pamamagitan ng Residential and Non-Residential Care Services, Recovery and Reintegration Program for Trafficked Persons (RRPTP), at iba’t ibang community-based services.

Kabilang sa mga intervention ng kagawaran ang psychosocial care o counseling; psychological o psychiatric testing; pagkakaloob ng mga professional na serbisyong pangkalusugan; referral para sa medico-legal na eksaminasyon; at mga mekanismo para sa proteksyon laban sa mental, emosyonal, pisikal, at sekswal na pang-aabuso, pati na rin ang ibang anyo ng pagsasamantala.

Sinabi pa ng opisyal na nagbibigay din sila ng mga damit at personal na gamit, nag-aalok ng legal at paralegal assistance, at isinasaayos ang mga referral o paglilipat ng mga ito sa mga local government units (LGUs) o mga rehistrado at lisensyadong private residential care facility para sa pansamantalang tirahan o proactive custody.

Binigyang-diin ni Nuyda na maaaring ituring ang isang babae na biktima kung siya ay asawa ng salarin, dating asawa, o kung siya ay nagkaroon ng sekswal o dating relationship sa salarin. Naaangkop din aniya ito sa sinumang babaeng nakikihati sa isang bata sa salarin, lehitimo man ang bata o hindi lehitimo, at anuman ang kanilang sitwasyon sa buhay.

Nakalulungkot isipin na napakarami pala sa ating mga kababaihan ang naging biktima ng karahasan at pang-aabuso.

Sila iyong mga victim-survivor o nakaligtas matapos ang naranasang kalupitan sa buhay, subalit tiyak na matinding dagok naman ito para sa kanila sa kabuuan ng kanilang pagkatao.

Hindi kasi madali na kalimutan na lamang ang lahat ng nangyari dahil buhay nila ang nawasak at higit na mahirap ito para sa kanila. Kaya tama naman na pagtuunan natin ng pansin ang kanilang kalagayan upang sila ay makarekober sa sakit na nararamdaman.

Mabuti nga may mga programang ganito ang gobyerno upang sila ay alagaan at tulungan para muling makabangon.

Hiling lang natin sa kinauukulan na bukod sa pagsuporta sa mga naturang abused women, dapat na patawan ng mabigat na parusa ang mga taong gumawa ng kawalanghiyaan sa kanila. Ikulong at pagbayarin ang mga ito sa ginawa nilang kasalanan, nang sa gayon ay hindi na dumami pa ang maging biktimang kababaihan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Presyo ng mga bilihin, ‘wag na sanang magtaas

ni Ryan Sison @Boses | Nov. 29, 2024

Marami sa ating mga kababayan ang nangangamba na bigla na lamang magtaas ang mga bilihin gaya ng pagkain, lalo’t nalalapit na rin ang Kapaskuhan. 

Kaya naman tiniyak ng Department of Trade and Industry (DTI) na walang pagtaas ng presyo sa mga pangunahing bilihin hanggang sa katapusan ng taon.

Ayon kay DTI Secretary Maria Cristina Aldeguer-Roque, para sa mga presyo ng basic goods, walang price increase sa mga ito hanggang sa katapusan ng taon, at para sa Noche Buena, mahigit 50 porsyento ay mananatili ang presyo gaya noong nakaraang taon. Gayunman, may mga iba na tumaas lang, pero wala pa itong limang porsyento.

Nilinaw naman ng kalihim na ipinatutupad ang bahagyang pagtaas ng presyo para sa ilang mga commodities.

Sinabi niya na ang pagtaas ng presyo na ito ay kumakatawan sa mga unang adjustment mula pa noong nakaraang taon.

Ipinaliwanag din ni Roque na ang mga naturang increase ay kinakailangan upang matugunan ang pagtaas ng mga gastusin, partikular na sa mga imported goods. Subalit aniya, ang mga adjustment ay pinananatiling minimal upang matiyak na hindi ito labis

na magpapabigat sa mga konsyumer.

Binigyang-diin niya na walang price increase mula noong nakaraang taon, kaya naman ang presyo na ang ilan ay mga imported products ay tumaas na. 

Batay sa Noche Buena Price Guide nito, sinabi ng DTI na ang pagbili ng 102 sa 236 na stock keeping units ay mas malaki ang gastos kumpara noong nakaraang taon.

May kabuuan namang 121 Noche Buena items ang napanatili ang kanilang mga presyo, habang 13 product line ang nakitaan ng mga pagbawas sa presyo.

Tama lang ang desisyon ng kinauukulan na hindi na magtaas ng presyo ng mga pangunahing bilihin hanggang sa katapusan ng December ngayon taon dahil talagang malaking tulong ito sa mga kababayan.

Kahit papaano ay mababawasan ang alalahanin ng mga konsyumer na hirap pagkasyahin ang kinikita para pambili ng mga pagkain at pangangailangan, at iba pang mga gastusin.

At kung sakaling may pagtaas man, sana ay bahagya lamang upang hindi naman ito maging mabigat sa mga mamamayan. Kumbaga, panatilihin muna ang presyo at abot-kaya dahil siguradong makabubuti ito para sa lahat.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com