Overtime pay ng mga manggagawa ngayong holiday, ‘wag kalimutan

ni Ryan Sison @Boses | Dec. 4, 2024

Isa sa mga inaabangan ng maraming manggagawa kapag holiday season, bukod sa 13th month pay at bonus, ay ang makatanggap sila ng mga overtime pay.

Kaya naman naglabas na ang Department of Labor and Employment (DOLE) ng pay guidelines para sa holidays bilang paalala sa mga employer at manggagawa sa pribadong sektor hinggil tamang sahod para sa December 8, 24, 25, 30, at 31.

Batay sa Labor Advisory No. 14, ang mga empleyado na magre-report sa duty at kanilang trabaho sa December 8, Feast of the Immaculate Concepcion; December 24, Christmas Eve, at December 31, huling araw ng taon, lahat ito ay itinuturing na special non-working holidays kaya naman dapat silang bayaran alinsunod sa ipinatutupad na mga panuntunan ng kagawaran.

At para sa mga manggagawa na magtatrabaho sa regular holidays sa December 25, Pasko, at December 30, Rizal Day, ay nararapat din naman silang bayaran sa kanilang overtime.

Tama lamang ang ginawang ito ng kinauukulan na mag-isyu nang maaga ng pay guidelines hinggil sa mga overtime para sa lahat ng employees. 

Ito rin kasi ang pinakahihintay ng mga masisipag at dedicated nating mga kababayang manggagawa na magkaroon ng dagdag sa kanilang mga take home pay dahil sa maraming holiday na kanilang ipapasok, sa kabila na dapat ay kasama nila ang buong pamilya. 

Kumbaga, sakripisyo ang gagawing ito ng bawat empleyado na sa halip na makasalo ang mga kamag-anak sa mga reunion at makapagpahinga ng kaunti ay nakatutok pa rin sa kanyang trabaho.

Kaya sa mga kababayang employer at mga boss ng kumpanya ay huwag naman sanang kalimutan itong ibigay sa inyong mga empleyado, nang sa gayon ay mas sipagin pa sila sa pagtatrabaho.

At kung kakayanin, sana ay maibigay na rin ng maaga ang kanilang mga bonus para mas maging masaya rin ang kanilang Kapaskuhan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Publiko, ‘wag matigas ang ulo, dapat umiwas sa mga paputok

ni Ryan Sison @Boses | Dec. 3, 2024

Tiyak na mas marami ang nagre-ready hindi lang sa nalalapit na kapaskuhan, kundi pati na rin sa pagsalubong ng Bagong Taon. 

Kaya naman sinimulan na ng Bureau of Fire Protection (BFP) ang kanilang kampanya na ‘iwas paputok’ para sa holiday season kung saan nag-iikot na ang kagawaran sa Pasig City.

Paalala ng BFP, dahil sa kabi-kabilang selebrasyon at mga party na ang gagawin dapat na maging maingat ng taumbayan at iwasan na lamang ang paggamit ng mga mapanganib at malalakas na paputok na maaaring magdulot ng sunog at disgrasya.

Makatutulong ito upang mabawasan ang mga tinatawag na fire-cracker related injury na naitatala bawat taon.

Pahayag pa ng BFP, maaaring salubungin ang Bagong Taon sa pamamagitan ng paggamit ng mga pampaingay na kaldero, torotot at iba pa.

Mabuti at habang maaga ay naglabas na ng abiso ang kinauukulan hinggil sa pag-iwas natin sa mga paputok.

Subalit, may iba talaga na sadyang matitigas ang ulo na nagsisimula na ring mag-ipon ng kanilang mga paputok at itinatago pa ito paisa-isa sa kanilang tahanan.

Sa ganang akin, kung gusto talaga nating mag-ingay sa pagsalubong sa New Year na nakaugalian na rin nating mga Pilipino, dahil sa itinuturing itong pampasuwerte sa atin, ay gumamit na lamang ng ibang paraan. Puwedeng paingayin ang ating mga radyo, buksan ang mga sasakyan at magbusina, gumamit ng mga tambol, at marami pang iba.

At sa halip na isipin natin ang bumili ng mga paputok ay ilaan na lamang sa pagkain na ating pagsasalu-saluhan.

Alalahanin natin na mahirap na maputulan ng daliri, kamay, paa at iba pang parte ng ating katawan o posibleng ito rin ang maging mitsa ng ating buhay.

Mas mabuting magdiwang ng Pasko at Bagong Taon na kumpleto at maayos at kasama ang ating pamilya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Operasyon ng LRT-1, 2 at MRT-3, i-extend sana hanggang midnight

ni Ryan Sison @Boses | Dec. 2, 2024

Tiyak na matinding kalbaryo na ang mararanasan ng mga komyuter lalo’t papalapit na ang kapaskuhan.

Kaya naman hinimok ng isang mambabatas ang Department of Transportation (DOTr) na i-extend hanggang hatinggabi ang operating hours ng Light Rail Transit 1 (LRT-1), LRT-2 at Metro Rail Transit 3 (MRT-3). 

Iginiit ni Akbayan Partylist Rep. Perci Cendaña na hindi sapat ang mass transit lines para maserbisyuhan ang mga komyuter, partikular na ang mga nasa Business Processing Office (BPO) at iyong mga night shift employee sa National Capital Region.

Maliban dito, dahil sa nagsisimula na rin ang Christmas rush ay siguradong marami na ang mga kababayan na nagkukumahog sa pamimili kaya aniya, dapat na gawing hanggang alas-12 ng hatinggabi ang operasyon ng LRT-1, LRT-2 at MRT-3 mula sa kasalukuyan na hanggang alas-10:30 ng gabi lamang.  

Sa ngayon, ang LRT-1, LRT-2 at MRT-3 ang rail lines na nag-o-operate sa Metro Manila na nagseserbisyo sa humigit-kumulang na 323,000, 140,000 at 357,000 (batay sa pagkakasunud-sunod) ng mga mananakay kada araw. 

Sinabi pa niya na isipin na lamang na ngayong panahon ng holiday season ay tiyak na magiging masikip ang daloy ng trapiko at dagdag-parusa ito sa mga komyuter, kaya ibigay na lamang natin ito sa kanila bilang maagang pamasko.

Mainam nga siguradong palawigin ang operasyon ng mga naturang rail lines para maging maginhawa naman ang pagbiyahe ng ating mga kababayan.

Hindi rin kasi kinakaya ng mga mass transport ang napakaraming pasahero lalo na kapag nagkasabay-sabay na sa kanilang pagpasok at pag-uwi. 

Gayundin, malaking tulong ito sa mga kababayang nagtatrabaho na panggabi at mga nasa BPO dahil kahit paano ay mayroon silang masasakyan kahit dis-oras na ng gabi.

Dapat din sigurong dagdagan ang mga security personnel ng LRT-1, LRT-2 at MRT-3 para matiyak ang seguridad ng lahat ng mga pasahero.

Hiling natin sa kinauukulan na sana ay ikonsidera nila ang pakiusap na ito na i-extend ang operating hours ng ating mga train na sadyang pakinabang din naman para sa mga kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com