Pagtatayo ng mga permanenteng evacuation center, madaliin

ni Ryan Sison @Boses | Dec. 7, 2024

Matapos lagdaan ni Pangulong Ferdinand “Bongbong” Marcos, Jr. ang Ligtas Pinoy Centers Act at ang Student Loan Payment Moratorium During Disasters Emergencies Act, pinamamadali na nito ang pagtatayo ng mga permanenteng storm-resilient evacuation centers.

Kaya naman inatasan na niya ang Department of Public Works and Highway (DPWH) hinggil dito upang isagawa sa mga lugar na itinuturing na prone disaster areas sa iba’t ibang bahagi ng ating bansa. 

Ayon kay PBBM, kailangang masiguro na ang mga evacuation center ay sapat na tumutugon sa mga pangangailangan ng mga mamamayan na naapektuhan ng mga kalamidad at iba pang mga emergency. Mahalaga rin aniya na magkaroon ng mga permanenteng evacuation center upang hindi na gamitin pa ang mga paaralan.

Aminado si PBBM na matagal nang suliranin ang paggamit ng mga eskwelahan para gawing evacuation center na nakakaapekto sa mga mag-aaral at nakahahadlang sa kanila upang maitaguyod ang kanilang pagkatuto at pagiging malikhain nila.  

Pinatitiyak naman ng Pangulo sa DPWH na ang mga itatayong evacuation centers ay dapat naaayon sa required minimum standards, kabilang dito ang National Building Code at kinukonsidera ang pangangailangan ng mga LGU.

Siniguro rin niya sa Department of Education (DepEd) na ang mga paaralan ay magiging sentro na lamang ng pagpapabuti at kapakanan ng mga mag-aaral.

Kaugnay sa isang pang batas, iniutos na ng Pangulo sa Commission on Higher Education (CHED) at Technical Education and Skills Development Authority (TESDA) na ibigay ang lahat ng uri ng tulong sa mga estudyante para matiyak na ang kanilang mga problemang pinansyal ay hindi magiging hadlang upang makapagtapos sila sa kanilang pag-aaral.

Salamat at ganap nang batas ang tungkol sa pagpapatayo ng mga permanenteng evacuation center sa iba’t ibang lugar sa ating bansa.

Dahil dito ay hindi na magiging mahirap at mabigat para sa ating mga kababayan sakali mang dumating ang mga emergency, sakuna at matinding kalamidad. 

Kumbaga, hindi na sila magtitiis pa na manuluyan sa mga paaralan na pansamantalang evacuation sites o mga tent lamang kapag nanalasa na ang bagyo sa kanilang lugar.

Magkakaroon na sila ng maayos at matinong matitirhan sa panahon na kailangang-kailangan nilang lumikas sa kanilang mga tahanan.

Sa kinauukulan, sana ay patuloy na unahin ang kapakanan ng mga mamamayan bago ang sariling interes, nang sa gayon ay mapabuti naman ang kanilang kalagayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mas mabigat na parusa sa mga sangkot sa ‘online baby selling’

ni Ryan Sison @Boses | Dec. 6, 2024

Kung sa inaakala natin na napigilan na ang tinatawag na “online baby selling”, hindi pa pala dahil may muntik na uling mabiktimang sanggol ng mga kawatan.

Isang 7-buwang gulang na baby na ibinebenta sa halagang P35,000 sa social media ang nasagip ng pulisya sa Rizal. 

Ayon sa mga otoridad, ibinenta ng suspek ang sanggol sa isang undercover agent sa pamamagitan ng legal adoption chat group. Isang operasyon naman ang isinagawa noong November 6 para iligtas ang baby, kung saan agad ding naaresto ang suspek.

Sinabi ni National Authority for Child Care (NACC) Undersecretary Janella Estrada na hindi katanggap-tanggap at nakababahala ang online baby selling dahil sa hindi nakasisiguro kung napupunta ang bata sa mabuting kamay lalo na sa panahong seryosong usapin ang online child sexual abuse, trafficking in person, organ donation at iba pang uri ng exploitation o pagsasamantala. 

Matatandaang noong May ng taong ito, anim na bata na ang nailigtas ng mga otoridad dahil sa karagdagang mga surveillance, 14 na Facebook group at accounts na sangkot sa ilegal na bentahan ng mga sanggol at ilegal na pag-aampon ang tinanggal na.

Pahayag naman ni Department of Social Welfare and Development (DSWD) Assistant Secretary Irene Dumlao, tinitiyak din nila na mai-report ang mga ito sa mga law enforcement agency para ma-track down ang mga nasabing grupo at maparusahan ang mga may kagagawan nito.

Aniya pa, bukod sa pag-aalaga sa mga nasagip na mga bata, nakikipag-ugnayan na rin

ang DSWD sa mga magulang ng mga ito.

Hindi talaga tumigil ang mga walang konsensyang kawatan at sinubukan uli ang ganitong uri ng masamang gawain.

Mabuti na lang at hindi natuloy ang bentahan dahil nailigtas ang baby sa tiyak na kapahamakan.

Hindi ba may mga batas naman tayo patungkol dito, pero bakit tila hindi natatakot ang mga masasamang-loob na ito na lumabag at ginagawang magbenta pa rin ng mga bata gamit ang online.

Dapat siguro ay mas mabigat na parusa ang ipataw sa mga mapapatunayang salarin, gaya ng pagkakakulong ng 15 hanggang 20 taon at pagmultahin din ng daan-daang libong piso o kahit na iyong mga sangkot lamang, upang magtanda at hindi na ulitin pa ang ganyang klase ng krimen.

Sa kinauukulan, huwag sanang mapagod at tumigil sa pagtugis sa mga kriminal na ito nang sa gayon ay mapagbayad sila sa kanilang mga kasalanan.   

At para sa mga kababayan nating pinagbabalakan na ibenta ang kanilang mga anak na posibleng dahil sa hirap ng buhay ay huwag na itong gawin, habang pairalin ang ating konsensya. Isipin sana natin na isang malaking kasalanan ito hindi lang sa ating batas, kundi mas higit sa Poong Maykapal. 

Lagi rin sana nating alalahanin na ang ating mga anak ay nagmula sa Kanya at biyayang ibinigay sa atin para alagaan at mahalin.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Murang bigas, mabibili na rin sa public market, LRT at MRT

ni Ryan Sison @Boses | Dec. 5, 2024

Isa sa mga inaabangan ng maraming manggagawa kapag holiday season, bukod sa 13th month pay at bonus, ay ang makatanggap sila ng mga overtime pay.

Kaya naman naglabas na ang Department of Labor and Employment (DOLE) ng pay guidelines para sa holidays bilang paalala sa mga employer at manggagawa sa pribadong sektor hinggil tamang sahod para sa December 8, 24, 25, 30, at 31.

Batay sa Labor Advisory No. 14, ang mga empleyado na magre-report sa duty at kanilang trabaho sa December 8, Feast of the Immaculate Concepcion; December 24, Christmas Eve, at December 31, huling araw ng taon, lahat ito ay itinuturing na special non-working holidays kaya naman dapat silang bayaran alinsunod sa ipinatutupad na mga panuntunan ng kagawaran.

At para sa mga manggagawa na magtatrabaho sa regular holidays sa December 25, Pasko, at December 30, Rizal Day, ay nararapat din naman silang bayaran sa kanilang overtime.

Tama lamang ang ginawang ito ng kinauukulan na mag-isyu nang maaga ng pay guidelines hinggil sa mga overtime para sa lahat ng employees. 

Ito rin kasi ang pinakahihintay ng mga masisipag at dedicated nating mga kababayang manggagawa na magkaroon ng dagdag sa kanilang mga take home pay dahil sa maraming holiday na kanilang ipapasok, sa kabila na dapat ay kasama nila ang buong pamilya. 

Kumbaga, sakripisyo ang gagawing ito ng bawat empleyado na sa halip na makasalo ang mga kamag-anak sa mga reunion at makapagpahinga ng kaunti ay nakatutok pa rin sa kanyang trabaho.

Kaya sa mga kababayang employer at mga boss ng kumpanya ay huwag naman sanang kalimutan itong ibigay sa inyong mga empleyado, nang sa gayon ay mas sipagin pa sila sa pagtatrabaho.

At kung kakayanin, sana ay maibigay na rin ng maaga ang kanilang mga bonus para mas maging masaya rin ang kanilang Kapaskuhan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com