Publiko, iwasan ang EDSA para ‘di maperhuwisyo

ni Ryan Sison @Boses | Dec. 10, 2024

Dapat na sigurong magbaon ng maraming pasensya bago umalis ng bahay at pumasok ng maaga dahil tiyak na nakakatakot ang trapik na kakaharapin.

Mas mabigat na trapik na kasi ang susuungin ngayon kapag bumagtas na sa Epifanio Delos Santos Avenue (EDSA). Ito ay dahil ang volume ng mga sasakyan na dumaraan sa naturang highway ng Metro Manila ay tumaas sa 464,000 araw-araw, na halos doble sa kapasidad ng EDSA na 250,000 na mga sasakyan. 

Ayon kay Metropolitan Manila Development Authority (MMDA) Chairman Romando Artes, ang bulto ng mga sasakyang bumibiyahe sa EDSA ay tuwing alas-6 hanggang alas-9 ng umaga at alas-4 hanggang alas-9 ng gabi na rush hours.

Aniya, ang naturang bilang ay maaaring tumaas pa itong buong linggo dahil sa payday weekend habang marami ang mga mamimili ng mga pangregalo bago mag-Pasko.

Panawagan ng MMDA chairman sa mga mamamayan na planuhin mabuti ang kanilang pagbiyahe lalo na ngayong weekend dahil sa matinding trapik na siguradong mararanasan.

Ang araw-araw na dami ng mga sasakyan sa EDSA, na nag-uugnay sa north at south district ng kabisera, ay lumampas na sa kapasidad ng naturang highway mula pa noong 2012.

Binigyang-diin naman ng opisyal na matindi rin ang kini-create na trapik kapag nag-mall wide sale at napakaraming malls na nasa EDSA, C5 na major thoroughfares na kapag nabarahan ay nagiging cause ng major traffic. Subalit aniya, hindi nila ipinagbabawal ang sale, huwag lamang mall wide dahil pag-mall wide, ito ay dinudumog ng napakaraming tao.

Marahil, kailangan na maghanap na lamang ng mga alternatibong ruta ng ating mga kababayan kaysa magdusa sa trapik sa pagbagtas sa EDSA. Mabuting iwasan natin na dumaan sa naturang highway kung may dala tayong sasakyan.

Nag-extend na rin naman ang operasyon ng LRT-1, 2 at MRT-3, kaya maaari na ring mag-commute sa pagpasok natin sa trabaho o sa eskwela.

Isa pa na puwede nating gawin ay mag-book sa mga ride-hailing services o motorcycle taxis para mabilis-bilis din ang ating biyahe.

Kumbaga, tamang diskarte lang ang kailangan para hindi tayo maperhuwisyo sa trapik.

Sa kinauukulan, mag-isip sana ng magandang paraan para talagang maresolbahan ang mabigat na trapik na nararanasan hindi lang sa EDSA kundi sa iba pang lugar, lalo na sa Kamaynilaan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Kapulisan, todo-bantay na sa buong bansa

ni Ryan Sison @Boses | Dec. 9, 2024

Dahil sa mga kaganapan para sa nalalapit na Pasko at Bagong Taon, at bilang antisipasyon sa kabi-kabilang mga rally kaugnay sa impeachment case laban kay Vice President Sara Duterte, mas pinahigpit ang mga security operation ng Philippine National Police (PNP).

Ayon sa kagawaran, ang kanilang mga unit sa buong bansa ay inatasan na paigtingin ang visibility sa pamamagitan ng regular na pagpapatrulya at pagtatalaga ng karagdagang tauhan sa mga lugar na may mataas na antas ng trapiko.

Binigyang-diin ng PNP chief na ang paghihigpit sa seguridad ay para maiwasan ang mga hindi inaasahang krimen sa mga lansangan. Gayundin aniya, ang presensya ng mga uniformed personnel sa mga pampublikong lugar gaya ng malls, palengke at transport hubs ay upang matiyak ang kaligtasan ng taumbayan na bahagi ng misyon ng PNP.

Dagdag pa niya, ito ay para rin sa posibleng mga planong rally ng ilang mga grupo dahil sa patuloy na usapin sa impeachment cases kay VP Sara.

Kabilang pa sa mga gagawing operasyon ng pamunuan ng PNP ay ang pagdaragdag ng mga nakatalaga sa on-ground security, paghihigpit sa operations against cybercrime, at preparasyon para sa mga emergency operation.  

Naka-standby na rin ang quick response teams para agad na matugunan ang anumang insidente.

Maganda ang gagawing ito ng ating mga kapulisan na mas palakasin ang seguridad sa buong kapuluan para sa safety na rin ng ating mga kababayan.

Kesa naman magtututulog lang sila at hindi kumikilos habang naririyan at naglipana na ang mga kawatan. Mas mabuting tugunan at aksyunan nila ang anumang nangyayaring krimen.

Paalala lang sa ating police force na dapat nilang paghandaan ang posibleng mga rally sa maraming lugar, kung saan nagpahayag na rito ang isang religious organization na magpoprotesta upang labanan ang mga hakbang sakaling i-impeach ang bise presidente.

Sa ganang akin, tama lamang na todong magbantay ang mga kapulisan para sa lahat dahil ito rin ang kanilang sinumpaang tungkulin na paglingkuran at protektahan ang mga mamamayan at ating bayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Dagdag-personnel sa PCG, mas tatatag ang seguridad ng bansa

ni Ryan Sison @Boses | Dec. 8, 2024

Mahalaga ang pagprotekta sa seguridad ng bansa at pagsuporta sa mga kababayan tuwing may sakuna o kalamidad subalit nangangailangan ito ng mas maraming uniformed personnel.

Kaya naman inaprubahan na ng Department of Budget and Management (DBM) ang 4,000 karagdagang posisyon sa Philippine Coast Guard (PCG) para makatulong sa pagpapahusay at mapalakas pa ang operational capability ng kagawaran.

Batay sa DBM, ang libu-libong bagong posisyon ay binubuo ng 819 PCG officers at 3,181 non-officers. Habang ang pag-apruba sa mga bagong posisyon, anang kagawaran ay makatutulong sa PCG sa pagtupad nila ng kanilang mandato, partikular na sa maritime safety administration, marine environmental protection, maritime security at law enforcement, at maritime search and rescue. 

Sa pahayag naman ng kalihim ng DBM, umaasa sila na ang karagdagang 4,000 personnel ng PCG ay magpapalakas pa sa ginagawa nitong monitoring at pagpanatili ng kapayapaan sa West Philippine Sea (WPS). Kaya anito, kaisa sila sa pagbuo ng mas matatag at tumutugon na PCG workforce.

Una nang hiniling ng PCG ang karagdagang personnel bilang bahagi ng 2024 target nito sa ilalim ng pitong taong recruitment plan.

Sa ilalim ng naturang plano, inaasahang aabot sa 37,869 ang kabuuang manpower ng kagawaran pagsapit ng 2026.

Marapat lamang na magkaroon ng mas maraming tauhan ang PCG upang maging mas malakas at matatag ang seguridad ng ating bansa bukod pa sa pagtulong sa mga kababayan sa panahon ng emergency.

Sa tindi ba naman at paulit-ulit na ginagawa sa atin ng China na hindi napapagod sa pambu-bully ay isang halimbawa lamang ng pangha-harass ng ibang bansa sa atin, kaya tamang lumikha ng mga posisyon na talagang sasanayin upang ipagtanggol at protektahan din tayo at soberanya ng bansa.

Gayundin, kapag maraming katulad nilang magbabantay sa atin hindi na tayo mangangambang sakupin ang ating mga teritoryo habang mayroon agad na reresponde sa pangangailangan ng mamamayan lalo na sa panahon ng kalamidad o anumang sakuna.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com