Gobyerno, dpat paghandaan ang posibleng pagbabago sa US policy

ni Ryan Sison @Boses | Nov. 12, 2024

Dapat sigurong maghanda na ng ating gobyerno para sa posibleng pagbabago sa mga polisiya ng United States sa ilalim ng administrasyon ni President-elect Donald Trump.

Ito ang panawagan ni Senadora Imee Marcos, partikular aniya na kailangang paghandaan ang mga maaaring makaapekto sa immigration, defense at geopolitical interests. 

Binigyang-diin ni Sen. Imee ang pangangailangang maprotektahan ang humigit-kumulang 200,000 undocumented Filipinos sa Amerika na nanganganib sa potensyal na mass deportations sa pamamagitan ng pagpapalawak ng mga reintegration program, kabilang ang skills training, livelihood support, at direct assistance para sa mga deportees mula sa Department of Social Welfare and Development (DSWD), Department of Labor and Employment (DOLE) at Department of Foreign Affairs (DFA).

Aniya, kailangan ng plano para sa mga naturang pamilya na maaaring mapilitang umuwi sa ating bansa. 

Ganito rin ang naging pahayag ni Senate President Francis “Chiz” Escudero, kung saan sinabi niyang si Donald Trump ay isang pangunahing macroeconomic assumption, mula sa trade hanggang sa security hanggang sa immigration. Kung ano ang sinabi niyang planong gawin, ang ilan sa unang araw ng kanyang administrasyon, ay tiyak na makakaapekto naman sa atin.

At kung itutuloy ni Trump ang kanyang deklarasyon na magsagawa ng mass deportations, ayon kay Senate President Chiz, maaaring maapektuhan ang tinatayang 300,000 Pinoy sa US.

Ipinaliwanag pa ng senador na mangangailangan ng napakaraming malalaking eroplano para mailabas ang 1 porsyento ng mga kababayan natin mula sa Amerika.

Batay sa datos na nakalap ng GMA Integrated News ay nagpapakita na mayroong 4,640,313 Pinoy sa US noong nakaraang taon, ayon ito sa latest figures ng US Census Bureau.

Habang maaga pa at kakaupo ni Trump, kailangang umaksyon na ang pamahalaan para ma-secure ang mga kababayan natin sa Amerika, palakasin ang ating depensa at tiyaking preparado tayo para sa anumang pandaigdigang pagbabago.

Kumbaga, kumilos na ngayon para hindi tayo nagkukumahog sa maaaring maging bagong polisiya ng US. 

Alalahanin sana natin na malaking bansa ang Amerika at itinuturing na isa rin sa mga mayayamang bansa sa buong mundo, at anumang patakaran na ibababa nito sa ilalim ng pamamahala kanilang bagong pangulo ay tiyak naman na labis tayong maapektuhan, kaya kailangang maghanda na tayo bago pa mahuli ang lahat.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga kandidatong walang “K”, out

ni Ryan Sison @Boses | Nov. 11, 2024

Mas mainam na sigurong mga kandidatong may kakayahan at kaalaman sa batas ang makilahok sa eleksyon sa susunod na taon.

Nasa 47 indibidwal kasi ang idineklara ng Commission on Elections (Comelec) na nuisance candidate para sa 2025 senatorial polls. Ipinost naman ng poll body ang listahan sa kanilang social media account.

Matatandaang noong nakaraang buwan ay nakatanggap ang Comelec ng 183 certificates of candidacy (COCs). 

Pagkatapos ay naglabas ito ng paunang listahan ng 66 indibidwal na ang mga pangalan

ay maaaring maisama sa official ballot.

Ayon sa Comelec, ito’y “walang pagkiling sa desisyon ng Division o En Banc sa mga petisyon na ideklara bilang mga nuisance candidate na inihain ng Law Department.”

Gayundin, nalutas ng komisyon, “na kumpirmahin ang awtoridad ng Law Department na simulan sa ngalan ng Commission ang motu proprio na paghahain ng mga petisyon para ideklara bilang mga nuisance candidate laban sa mga pinangalanang 117 aspirante”.

Batay naman sa Omnibus Election Code, ang Comelec ay maaaring magdeklara ng isang aspirante bilang isang nuisance candidate kung ang COC ay naihain, “to put the election process in mockery or disrepute or to cause confusion among the voters by the similarity of the names of the registered candidates or by other circumstances or acts [that] clearly demonstrate that the candidate has no bona fide intention to run.”

Nauna na ring ipinahayag ni Comelec Chairman George Garcia na plano nilang resolbahin ang lahat ng nuisance candidate petitions sa katapusan ng November. 

Mabuti at naglabas na rin ng listahan ang kinauukulan ng mga idineklarang nuisance candidate para maging mas maayos ang ating halalan.

Batid naman natin na hindi lahat ng mga naghain ng COC ay itinuturing na bonafide o tunay ang kanilang intensyon na tumakbo sa eleksyon, kung saan posibleng malagay lamang sa kasiraan o kaya ay maging sanhi ng kalituhan sa mga botante.

Kumbaga, nagiging ‘panggulo’ lang ang mga ito para sa mga totoo at nais na kumandidato na may kakayahan, marunong sa batas, at may alam sa pamamahala ng nasasakupan. 

Kaya tama lamang na pakasalain maigi ang mga aspiranteng gustong maupo sa gobyerno. Iyon bang mga walang kakayahan o kaalaman talaga ay huwag ng payagan pa na makapuwesto.

Paalala lang natin lagi sa mga kababayan na maging matalino sa pagpili ng ating magiging lider. Huwag mapagdalus-dalos at isiping mabuti ang ibobotong kandidato na may puso at tapat na maglingkod sa mga mamamayan at sa bayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Publiko, mag-ingat sa sakit na dulot ng ashfall

ni Ryan Sison @Boses | Nov. 10, 2024

Dahil sa nag-aalburotong Mt. Kanlaon, dapat na mag-ingat ang mga kababayan nating residente sa Negros Occidental at Negros Oriental sa posibleng ashfall at iwasan din ang matagal na pagkaka-expose sa sulfur dioxide na mula sa naturang bulkan. 

Pahayag ng National Disaster Risk Reduction and Management Council (NDRRMC), inaasahang tutumbukin ng ashfall ang hilagang-kanlurang bahagi ng Bulkang Kanlaon.

Batay naman sa monitoring ng Philippine Institute of Volcanology and Seismology (PHIVOLCS) ay nakapagtala ng pagsingaw na may panaka-nakang ashfall ang Mt. Kanlaon habang tinatayang 7,378 tonelada ng asupre ang ibinuga nito na may taas na 750 metro.

Ayon sa PHIVOLCS, maaaring mairita ang mga mata, lalamunan, at respiratory tract dahil sa exposure o pagkalantad dito kaya mahigpit na pinag-iingat ang mga indibidwal

na may mga health condition sa paghinga.

At kung magkaroon na ng ashfall na maaaring makaapekto sa mga komunidad, dapat takpan ng malinis na basahan o dust mask ang ilong at bibig kapag tuluyang nalanghap ito. 

Pinaalalahanan na rin ang civil aviation authorities na mag-abiso sa mga piloto na huwag munang magpalipad ng aircraft malapit sa tuktok ng bulkan upang makaiwas sa panganib na dulot ng ashfall at sulfur dioxide at sa posibleng biglaang pagputok nito.  

Ayon sa PHIVOLCS, nananatiling nakataas sa Alert Level 2 ang Bulkang Kanlaon dahil sa “increased unrest” nito kasunod ng naging pagsabog noong June.

Kailangang maging alerto ng ating mga kababayan sa mga lugar na malapit sa Bulkang Kanlaon dahil anumang oras ay maaaring sumabog ito. 

Walang iniwan iyan sa nangyaring pagsabog noon ng Bulkang Taal, kung saan napakaraming mamamayan ang labis na naapektuhan. 

Ang masaklap pa nagkasakit-sakit na ang mga residente dahil sa mga naibugang abo at sulfur dioxide na talagang mapanganib sa ating kalusugan.

Kaya naman payo natin sa mga kababayan doon na sakaling magpatupad na ng force evacuation ang kinauukulan ay agad na sumunod upang hindi na umabot na masakripisyo pa ang inyong buhay at pamilya. 

Gayundin, palaging bantayan ang mga anunsyo ng pamahalaan upang malaman ang sitwasyon sa lugar at lagay ng nasabing bulkan. Maging mapagmatyag at maingat tayo upang hindi mapahamak.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com