Mga paslit, iwasang regaluhan ng collectible toys

ni Ryan Sison @Boses | Dec. 13, 2024

Ilang araw na lamang ay ipagdiriwang na natin ang Pasko, na panahon ng pagbibigay natin ng mga aginaldo para sa ating pamilya, kamag-anak at mga inaanak.

Kaya naman pinaalalahanan ng Food and Drug Administration (FDA) ang mga mamamayan hinggil sa mga collectible toy o laruan na nagdudulot ng panganib, partikular na sa mga maliliit pang bata.

Ayon sa FDA, habang nagiging popular ang ganitong items lalo na sa panahon ng bigayan ng mga regalo, dapat suriin ang mga laruan na bibilhin.

Sinabi ng kagawaran na target ng mga naturang produkto ay mga nasa hustong gulang, subalit ang mga makukulay na miniature replicas ng mga iconic character, sasakyan, at object ay nakakaakit sa mga maliliit na bata.

Paliwanag ng FDA, kadalasang ginagawa ng maraming paslit ang tinatawag na hand-to-mouth activity, kung saan ang mga naturang laruan ay may maliliit na sukat at mga small parts na maaaring humantong sa hindi nila sinasadyang paglunok ng mga bagay na ito. 

Payo ng FDA sa mga magulang, guardians at iba pa na iwasan ang magbigay ng collectible toys na may maliliit na detachable parts o natatanggal na bahagi ng laruan sa mga batang wala pang 3-taong gulang.

Gayundin anang kagawaran, dapat suriin ang label ng mga collectible toys sa inirerekomendang age group at mga instruction sa paggamit kung hindi angkop ang mga ito para sa maliliit na bata. 

Dapat ding alamin kung gawa ang mga ito mula sa non-toxic, lead-free, at phthalate-free na mga materials.

Mas makabubuti sigurong huwag na tayong magbigay ng mga ganitong klase ng regalong laruan sa mga maliliit na bata upang hindi tayo magkaroon ng problema o kaya naman ay may madisgrasya. 

Puwede kasing malunok nila ang mga maliliit na bagay at ma-choke sila na tiyak ospital ang ating kahahantungan.

May mga laruan din na may lead na sadyang nakakalason, at ang pagkakalantad sa mas maraming lead ay maaaring makapinsala sa ating utak, atay, kidney at buto. Ang mga plastic na laruan ay may mga synthetic chemical compound na mapanganib din sa ating kalusugan.

Marahil, iregalo na lamang natin sa ating mga inaanak na maliliit pa ay damit, sapatos, medyas o kaya ay pagkain na may pakinabang pa sa kanila.

Isipin natin na hindi lang sila magiging masaya sa aginaldo na ating ibibigay, safe din sila habang kasama natin na nagdiriwang ng Kapaskuhan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Insentibo para sa mga guro, mas mataas na

ni Ryan Sison @Boses | Dec. 12, 2024

Sa wakas napagtuunan din ng pansin ang mga guro dahil sa magandang insentibo na naghihintay para sa kanila.

Kaya naman labis ang pasasalamat ng Department of Education (DepEd) sa naging direktiba ni Pangulong Ferdinand “Bongbong” R. Marcos Jr. sa kanila at sa Department of Budget and Management (DBM) na magbigay ng P20,000 Service Recognition Incentive (SRI) para sa mga public school teacher at non-teaching personnel.

Ayon kay DepEd Secretary Sonny Angara, inatasan sila ng Pangulo na itaas ang SRI mula P18,000 ay gawing P20,000, kung saan magbebenepisyo rito ang tinatayang 1,011,800 DepEd personnel.

Nangako ang DepEd secretary na makikipagtulungan nang husto kay DBM Secretary Amenah Pangandaman upang matiyak ang mabilis at matagumpay na implementasyon ng pinataas na SRI para sa mga guro habang sumusunod sa tinatawag na fiscal policies.

Sinabi pa ni Angara na malaking tulong ito sa mga guro at kawani para sa kanilang paghahanda sa Kapaskuhan at pagsalubong sa Bagong Taon. Aniya, napakagandang regalo ito ng administrasyon na kinikilala ang sakripisyo at serbisyo ng mga guro.

Binigyang-din naman ni Pangandaman, na tinitingnan na niya at ng DBM ang kinakailangang mga funding mechanism upang i-finalize ang proseso ng pagpapatupad at pagpapalabas ng mga pondo ng SRI. Gayundin, magkakaroon pa ng pag-aaral ang dalawang kagawaran hinggil dito.

Ang SRI ay taunang financial incentives na ibinibigay sa mga empleyado ng gobyerno bilang pagkilala sa dedikasyon sa pagbibigay ng serbisyo sa publiko. 

Salamat at matutumbasan na natin kahit paano ang dedikasyon at pagmamalasakit ng mga guro at non-teaching personnel sa pamamagitan ng pagbibigay sa kanila ng mas mataas na insentibo.

Kung tutuusin, matagal na rin ang pinaghintay ng mga guro na madagdagan man lang ang kanilang mga SRI sa gitna ng mga hirap at sakripisyong nararanasan, lalo na ang walang humpay na taas-presyo ng mga bilihin at bayarin. Pero dahil sa hakbang na ito ay mapapangalagaan din ang kapakanan ng mga guro.

Sa kinauukulan, sana ay laging alalahanin na unahin ang mga pangangailangan ng ating mga guro na silang humuhubog sa kinabukasan ng mga kabataan at ng ating bayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagsabog ng Mt. Kanlaon, may banta sa kalusugan, ingat!

ni Ryan Sison @Boses | Dec. 11, 2024

Matapos ang pagsabog ng Mt. Kanlaon sa Negros Occidental, posibleng magdulot ito ng panganib sa kalusugan ng mga kababayan sa naturang lugar.

Kaya naman agad na binalaan ng Department of Health (DOH) ang mga naninirahan malapit sa bulkan laban sa tinatawag na respiratory illness at potensyal na health risks na maaaring makaapekto sa mga tao dahil sa ashfall.

Sinabi ng DOH na ang volcanic ash ay maaaring magdulot ng iritasyon sa respiratory tract, lalo na sa mga indibidwal na may pre-existing conditions, gaya ng asthma o hika at chronic obstructive pulmonary disease.

Ang mga ash particles ay maaaring magdulot naman ng pamumula, pangangati, at pananakit sa mata, at ang matagal na pagkakalantad sa abo ay posibleng humantong sa pagkakaroon ng mga pantal sa balat. 

Gayundin, maaaring magkaroon ng kontaminasyon sa tubig habang pinapataas ng ashfall ang banta ng mga waterborne disease. 

Pinaalalahanan na rin naman ng DOH ang kanilang Centers for Health Development (CHDs) o regional offices na tiyaking may sapat na suplay ng N95 masks, eye protection o goggles, water purification tablets o filters, mga gamot, hand sanitizers at antiseptic wipes para sa mga residente na naroroon.

Dapat na mas maging alerto ng ating mga kababayang malapit sa Mt. Kanlaon dahil anumang oras ay maaaring pumutok muli ang bulkan na magdulot ng lahar sakaling makatagpo ng tubig ang tinatawag na pyroclastic density currents. 

Hindi rin dapat kalimutan na magsuot ng mask at goggles at iba pang proteksyon laban sa pagkalat ng ashfall.  

Mas magiging ligtas din tayo kung mananatili na lang muna sa bahay, lalo na iyong mga may sakit sa paghinga dahil tiyak na mapanganib ito sa kalusugan. Pero kung nag-abiso na ang lokal na pamahalaan na kailangan nang lumikas sa lugar ay agad naman tayong sumunod sa kanila. 

Sa ganitong sitwasyon, kailangang mag-ingat tayo nang husto at alagaan ang sarili dahil siguradong matinding epekto ang mararanasan natin kung paiiralin ang kapabayaan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com