Nag-aalay ng bulaklak sa mga puntod, kaunti na lang

ni Ryan Sison @Boses | Nov. 2, 2024

Kapag dumarating ang ganitong panahon, marami sa atin na kadalasang inilalagay sa mga puntod ng mga mahal sa buhay ay sari-saring mga bulaklak na sasamahan ng makukulay na mga kandila, pero ngayon tila kakaiba ang makikita dahil kakaunti lamang ang mga may bitbit nito.  

Naging matumal kasi ang bentahan ng iba’t ibang klase ng bulaklak, hindi tulad ng mga nakaraan na bisperas pa lamang ay halos wala nang mabili ang mga kababayan. 

Ang malakas na pag-ulan at labis na suplay ay nagpababa ng mga presyo ng bulaklak sa Baguio City bago pa lamang ang Undas, kung saan ang mga local vendor ay nahihirapang ibenta ang kanilang mga stock dahil nananatili ring kakaunti ang mga kostumer.

Apaw-apaw ang mga flower stall dahil hindi madala ang karamihan sa suplay ng bulaklak sa mga rehiyon tulad sa Bicol at Metro Manila sanhi ng masamang panahon.

Isa sa mga flower vendor ang nagsabing marami ang suplay, oversupply, pero kakaunti naman ang namimili.

Gayunman, dahil sa 24-oras na ang operasyon ng mga flower stalls sa Baguio City, umaasa ang mga vendor na tataas naman ang kanilang benta. 

Nagsagawa na rin ng pag-iikot ang Department of Trade and Industry (DTI)-Benguet para i-monitor ang mga presyo ng bulaklak. Ayon kay Ralph Altiyen, consumer protection supervisor ng DTI Baguio-Benguet, ginagawa nila ito para matiyak na magiging makatwiran ang presyo ng mga bulaklak. 

Anang kagawaran, ang Malaysian mums ay ibinebenta ng P200 kada bundle, ang Anthuriums ay nasa P250 hanggang P500 kada dosena, ang Radus na P200 kada bundle, at Asters, P75 kada bundle, habang ang mga rose ay nananatiling stable sa P30 hanggang P35 kada tangkay.

Sa Dangwa, Manila, marami pa rin ang mga namimili ng bulaklak subalit hindi kagaya noong mga nakaraang Undas na puno ang mga kalsada at wala nang malakaran.

Ang sinasabing dahilan ng mga flower vendor ay karamihan sa mga umaangkat sa kanila ng mga bulaklak na mula sa mga probinsya ay hindi na lumuwas pa dahil marami sa mga ito ang labis na naapektuhan ng bagyo.

Ilang mamimili naman roon ang inaasahang tataas ang presyo ng mga bulaklak subalit lumalabas na mas mababa ang presyo nito kumpara noong mga nakaraang Undas, kaya naman pagkakataon na rin para sa mga re-seller na bumili at itinda ang mga bulaklak sa kanilang flower shop sa ibang lugar.

Malaki talaga ang naging epekto ng nakalipas na mga bagyo sa ating mga kababayan.

Ultimo mga nag-aangkat para ibenta sa kanilang lugar at bumibili ng mga bulaklak ay kumonti na lamang kahit pa sabihing nananatili ang presyo o stable, o kaya naman ay mababa ang presyo ng mga ito.

Marahil, naisip ng mga kababayan na magtipid na muna, na sa halip na bumili ng bulaklak ay pagkain na lamang para sa kanilang pamilya.

Kumbaga, ipagdasal na lang ang mga yumaong kamag-anak at magtirik ng kandila dahil tiyak na naiintindihan din nila ito. 

Ang mahalaga ay naalaala natin sila at binigyan ng panahon, habang lagi mananatili sa ating puso at isip ang kanilang pagmamahal.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga kaso ng tuberculosis sa buong mundo, mas dumami

ni Ryan Sison @Boses | Nov. 1, 2024

Nakakabahala ang mga report hinggil sa pagtaas ng bilang ng mga kaso ng tuberculosis sa buong mundo. 

Batay sa datos ng Global Tuberculosis Report 2024 ng World Health Organization (WHO) umaabot na sa 8.2 milyon ang bagong TB cases, kung saan ito na ang pinakamataas mula noong 1995.

Kahit na bumaba ang bilang ng mga namamatay sanhi ng tuberculosis mula sa 1.32 milyon noong 2022 ito ay naging 1.25 milyon lamang noong 2023. Pero, ang bilang naman ng mga nahawaan ng naturang sakit ay tumaas mula sa dating 7.5 milyon ay

naging 8.2 milyon.

Gayunman, hindi lahat ng mga bagong kaso ay nasuri ng WHO, at naniniwala sila na umabot sa humigit-kumulang 10.8 milyong katao ang nagkasakit ng TB sa buong mundo noong nakaraang taon, kung saan mga bata at young adolescents o kabataan ang bumubuo sa 12 porsyento ng mga kaso nito.

Nananatili naman ang Pilipinas sa limang nangungunang mga bansa na umabot sa mahigit kalahati ng mga kaso ng tuberculosis worldwide. 

Ayon sa WHO, ang limang bansa na bumubuo ng 56% ng global TB burden ay ang India (26 porsyento), Indonesia (10 porsyento), China (6.8 porsyento), Pilipinas (6.8 porsyento) at Pakistan (6.3 porsyento).

Kaya naman nanawagan na si WHO chief Tedros Adhanom Ghebreyesus sa mga bansa na mas paigtingin ang laban kontra sa tuberculosis.

Talagang alarming ang mga naitatalang kaso ng TB, dahil nagawa nitong muli na nangungunang nakakahawang sakit na pumapatay, na lumagpas pa sa COVID-19 mula 2020 hanggang 2022.

Kaya dapat nating alagaan nang husto ang ating pangangatawan, umiwas sa mga bisyo para hindi tayo madaling mahawaan ng naturang sakit.

Sa mga kababayan na tinamaan na ng tuberculosis, may mga paraan at gamutan na ibinibigay ang mga health center at mga ospital.

Hindi rin naman nagkukulang ang Department of Health (DOH) sa mga paalala na kung nakakaramdam ng mga sintomas ng sakit ay magpakonsulta agad sa mga doktor.

Lagi natin sanang alalahanin na mahirap magkasakit kaya mabuting pagtuunang mabuti ang ating kalusugan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga pasaherong uuwi sa probinsya, ingat!

ni Ryan Sison @Boses | Oct. 31, 2024

Good news sa mga pasaherong uuwi sa kani-kanilang mga lalawigan, lalo na sa mga operator at driver ng provincial buses ngayong ginugunita natin ang All Saints’ Day at All Souls’ Day. 

Pinapayagan na kasi ng Metropolitan Manila Development Authority (MMDA) ang mga provincial bus na dumaan sa EDSA 24/7 sa kasagsagan ng Undas break. 

Sa isang advisory ng MMDA, aprub na sa kanila ang passage o pagdaan ng mga bus sa EDSA mula October 29 hanggang alas-5 ng madaling-araw ng November 4 para ma-accommodate ang inaasahang pagdagsa ng mga pasahero.

Ayon sa ahensya, ang mga provincial bus na magmumula sa north Luzon ay papayagang tumigil sa terminals sa Cubao, Quezon City. Habang ang mga naturang bus naman na manggagaling sa south Luzon ay makakabiyahe lamang hanggang Parañaque Integrated Terminal Exchange (PITX) sa Pasay.

Una rito, sinabi ng Land Transportation Franchising and Regulatory Board (LTFRB) na hindi bababa sa 1,200 pampasaherong bus at utility vehicles ang nabigyan na ng special permit alinsunod sa Undas traffic. Ito ay bilang bahagi ng Oplan Undas 2024 ng MMDA.

Kaugnay nito, patuloy naman ang regular na operasyon ng Metro Rail Transit Line 3 (MRT-3).

Nais ng pamunuan ng MRT-3 na makapagserbisyo sa mga pasahero sa mga nasabing araw, kabilang ang mga magsisiuwian sa kanilang mga probinsya para sa Undas.

Ang unang biyahe ng tren ay aalis mula North Avenue Station ng alas-4:30 ng madaling-araw habang ang unang biyahe ng tren naman mula Taft Avenue Station ay aalis ng alas-5:05 ng madaling-araw.

At para sa huling biyahe ng tren mula North Avenue Station ay alas-9:30 ng gabi habang ang huling biyahe ng tren naman mula Taft Avenue Station ay alas-10:09 ng gabi.

Kinumpirma ito ng Department of Transportation (DOTr), kung saan mananatiling epektibo ang regular operations sa October 31 hanggang November 2.

Mabuti naman na magiging maganda ang pagbiyahe ng mga pasahero pauwi sa mga lalawigan dahil na rin sa mahusay na plano ng kinauukulang mga ahensya ng gobyerno.

Maagap ang ginawa nilang paghahanda para sa Undas, na batid naman natin na dahil ilang araw ang bakasyon ay hindi mapipigilan ang pagdagsa ng mga kababayan na nagnanais na dalawin ang mga puntod ng kanilang mga mahal sa buhay at makapiling din ang mga pamilya nila nasa mga probinsya man o sa lungsod. Kumbaga, may maayos naman pala na sistema na ipinatutupad pagdating sa ating transportasyon.

Hiling lang natin sa mga otoridad na mag-deploy ng maraming tauhan at itodo ang kanilang pagbabantay sa mga lansangan dahil tiyak na nagkalat na ang mga kawatan, na kung minsan sila iyong mga sumasampa sa mga bus at nagdedeklara ng holdap.

Kaawa-awa naman ang mga pasaherong walang kalaban-laban, pati na rin ang mga driver at konduktor. Dapat na mahuli agad ang mga ito at maparusahan para wala nang mabibiktima pa na mga kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com