Unified ID system, tugon sa nagkalat na pekeng PWD ID

ni Ryan Sison @Boses | Dec. 20, 2024

Upang matugunan ang paglaganap ng mga pekeng identification card (IDs) ng mga persons with disability (PWDs) ipapatupad na ang planong unified ID system sa bansa.  

Ito ang kinumpirma ng Department of Social Welfare and Development (DSWD), kung saan lilikha sila ng naturang sistema na magagamit ng mga business establishment o mga negosyo para agad na matukoy ng mga ito kung lehitimo ang iprinisentang ID sa kanila.

Ayon sa kagawaran, ang unified ID system ay isang web-based portal na mayroong real-time updating at ID verification.

Habang nasa proseso ng paglikha ng naturang sistema, hinimok naman ni DSWD Secretary Rex Gatchalian ang publiko na i-report ang mga insidente na may kinalaman sa pagbebenta ng pekeng PWD IDs sa National Council on Disability Affairs (NCDA), isang attached agency ng DSWD, sa Persons with Disability Affairs Office (PDAO), o anumang law enforcement agency. 

Matatandaang ang Bureau of Internal Revenue (BIR) ay naglunsad na rin ng national crackdown laban sa pagbebenta at paggamit ng pekeng PWD IDs dahil ang revenue losses o pagkalugi ng kita mula sa ganitong uri ng tax evasion scheme ay umabot na sa P88 bilyon.

Sa ilalim ng batas, kasama sa mga benepisyo ng mga PWD ang 20 percent discount at exemption sa value-added tax (VAT) sa ilang mga produkto at serbisyo.

Panahon na marahil para mapigilan natin ang pagkalat ng mga pekeng PWD ID na ginagamit ng kung sinu-sino lamang at hindi talaga karapat-dapat.

Nagiging uri na rin kasi ito ng panloloko ng marami sa atin, na gustong magkaroon ng discount ng napakalaki kahit na hindi naman sila totoong kuwalipikadong magbenepisyo.

Sana lang ay agad na matapos at makumpleto ng kinauukulan ang unified ID system nang sa gayon ay maipatupad na ito sa buong bansa at hindi na dumami pa ang mga malolokong kababayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagbabakuna ng mga batang babae vs. cervical cancer

ni Ryan Sison @Boses | Dec. 19, 2024

Isa sa mabisang proteksyon upang hindi tamaan ng anumang sakit, partikular na sa mga kababaihan, ay ang pagpapabakuna kontra rito.

Kaya naman inanunsyo ng Department of Health (DOH) para sa lahat ng 9-anyos na batang babae na gustong tumanggap o magpaturok ng human papillomavirus (HPV) vaccine na maaaring gawin ito at libre sa 2025, kasunod ng pag-apruba ng pondo mula sa ating gobyerno.

Kinumpirma ito ni DOH Secretary Ted Herbosa, kung saan hiniling niya at tumanggap din siya ng approval mula kay Pangulong Ferdinand “Bongbong” Marcos Jr. upang tustusan ang parehong doses ng HPV vaccine, na tumutulong sa pagprotekta sa mga kababaihan mula sa cervical cancer.

Ayon kay Herbosa, ang isang hiningi niya sa Pangulo ay pondohan ang HPV vaccination para sa lahat ng 9-taong gulang na babae. Aniya, nagkakahalaga ng P4,000 ang isang dose nito, at may dalawang doses na kailangan, at pumayag naman si PBBM.

Sinabi rin ng kalihim na sa ngayon ay pinopondohan na nila ito para sa susunod na taon (2025), lahat ng mga batang babae na gusto ng HPV vaccination ay makatanggap nito.

Ang naturang funding ay batay sa inisyatiba ng Bakuna-Eskwela, isang school-based nationwide vaccination program na inilunsad noong October 7 ng DOH at ng Department of Education (DepEd).

Ang programa ay naglalayon na mabakunahan ang mga school-age children o mga batang nag-aaral laban sa vaccine-preventable diseases (VPDs), kabilang na ang tigdas o measles, rubella, diphtheria, tetanus, at cervical cancer (sa pamamagitan ng HPV vaccine para sa mga kababaihan).

Gayundin, plano nilang maturukan ang hindi bababa sa 3.8 milyong mga mag-aaral sa Grade 1 at Grade 7 sa mga pampublikong paaralan ng measles-rubella at tetanus-diphtheria vaccines. Nasa higit 900,000 babaeng Grade 4 students naman sa mga piling pampublikong eskwelahan ang target din nilang makatanggap ng HPV vaccine.

Mas mainam na pangalagaan natin ang kalusugan ng ating mga anak at proteksyunan sila laban sa mga nagkalat na sakit, lalo na ang cancer.

Habang maaga pa ay gawin nating pabakunahan sila kung mayroon din lang naman na libreng vaccination na isinasagawa ang ating gobyerno.

Hindi kasi biro ang magkaroon ng cervical cancer dahil marami na rin ang namatay na kababaihan sa sakit na ito, kung saan kadalasan bago ma-detect ay nasa malala na palang kalagayan at napakahirap nang gamutin. 

Kaya payo natin sa mga magulang na huwag nang mag-atubili o magdalawang-isip pa sakaling simulan na ang pagpapatupad ng free HPV vaccination ay paturukan ang ating mga anak na babae nang sa gayon ay lumaki silang malusog, masigla at malayo sa sakit.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mas maraming inmates ang magiging happy ngayong Pasko at Bagong Taon

ni Ryan Sison @Boses | Dec. 18, 2024

Siguradong mas maraming inmates ay magiging masaya na ipagdiriwang ang Kapaskuhan at pagsalubong sa Bagong Taon.

Kinumpirma kasi ng pamunuan ng Department of Justice (DOJ) na posibleng umabot sa mahigit siyam na libong persons deprived of liberty (PDL) ang mapalaya dahil sa bagong Implementing Rules and Regulations (IRR) ng Revised Penal Code.

Ito ay matapos na pirmahan ng DOJ at ng Department of the Interior and Local Government (DILG) ang IRR.

Ayon sa DOJ, layunin nito na mabigyan ng mas masusing pagrebyu sa lahat ng mga datos o profile ng PDLs upang magawaran naman sila ng maagang paglaya. 

Base sa nilalaman ng bagong IRR, maaari nang mabigyan ng maikli o pinaigsing sentensya ang mga bilanggo sa ilalim ng pagpapatupad ng Good Conduct Time Allowance.

Sa pagtaya naman ng DOJ, Bureau of Corrections (BuCor), at Bureau of Jail Management and Penology (BJMP), ang nasabing bilang ng mga inmate ang maaaring magawaran ng parole dahil sa kabutihang asal na ipinakita ng mga ito sa loob ng piitan. 

Batay sa datos, pumalo na sa 350 porsyento ang bilang ng nabawas sa jail congestion nationwide dahil sa mga programang ipinatupad ng gobyerno para mapaluwag ang mga bilangguan sa bansa.

Mainam at binigyang pansin din ng pamahalaan ang ating mga kababayang inmates para tingnan ang kanilang kalagayan, kung sila ba ay pupuwede nang palayain. 

Marami sa kanila ang napagsilbihan na rin naman ang kanilang sentensya mula sa nagawang pagkakasala habang ang iba ay nagpakabuti sa loob ng piitan at nagbagong buhay, kaya marapat na bigyan sila ng pagkakataon na lumaya at makapiling ang kanilang pamilya lalo na ngayong Kapaskuhan.

Hiling lang natin sa mga kababayang inmate na magtuluy-tuloy na sana ang kanilang pagbabago at iwasan ang anumang masamang gawain, habang pairalin ang kabutihan sa puso at isip, maging kagandahang asal nang sa gayon ay hindi na sila bumalik pa sa kulungan.

Alalahanin din lagi na mas mabuting malaya tayo at nakakasama ang pamilya kaysa mabilanggo ng ilang taon at pagdusahan ang nagawang kasalanan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com