Mga anak, dapat pabakunahan para iwas-sakit

ni Ryan Sison @Boses | Nov. 7, 2024

Matapos na mabigong maabot ang mga target na inoculation o pagbabakuna noong September, mas palalakasin ng gobyerno ang pagsisikap na pataasin ang immunization rate ng mga bata sa Metro Manila.

Ayon sa Department of Health-Metro Manila Center for Health Development (DOH-MMCHD), magsasagawa sila ng catch-up immunization simula ngayong buwan hanggang sa kalagitnaan ng December dahil ang isinagawa nilang school-based nationwide vaccination program ay mas mababa pa sa kanilang target.

Ayon kay National Capital Region national immunization program coordinator Arnold Louie Alina, layon nilang mabakunahan ang 167,260 Grade 1 students at 180,563 Grade 7 students laban sa tigdas-rubella (MR) at tetanus-diphtheria (TD) sa mahigit 800 paaralan sa Metro Manila.

Tinitingnan din ng kagawaran ang 83,857 Grade 4 female students na makakuha ng human papillomavirus (HPV) vaccine.

Nitong October 25, binanggit naman ni Alina na para sa Grade 1, nasa 23,263 na mag-aaral lamang ang nakatanggap ng MR vaccine habang 23,276 ang nakakuha ng TD vaccine. Para sa Grade 7, nasa 10,402 ang nakakuha ng MR vaccine at 10,372 ang nakatanggap ng TD jab.

Mayroon ding 9,738 Grade 4 na babaeng mag-aaral na nakatanggap ng HPV vaccine.

Binigyang-diin din ni Alina na kailangan pa nilang pataasin ang kanilang accomplishment o ang bilang na nabakunahan pagdating sa school-based immunization, kaya sa ngayon, ay nagpaplano silang magsagawa ng kanilang malakihang catch-up immunization sa NCR.

Sa ilalim ng catch-up immunization na magsisimula sa November 18 hanggang December 16, 2024, dadalhin ng mga health worker ang mga bakuna sa mga bahay upang hikayatin ang mas maraming bata na magpabakuna. Magkakaroon din ng mga fixed posts sa health facilities, gayundin ang mga temporary posts, gaya ng mga malls at train stations, na tutukuyin ng local government units (LGUs).

Dapat talagang mapabakunahan na ang ating mga anak para mayroon silang proteksyon laban sa anumang sakit.

Marahil, ang mga bakuna naman na ituturok ng mga health worker na mula sa kagawaran ay siguradong base sa mga nakaiskedyul na immunization na hindi agad naibigay sa mga bata.

Kaya payo natin sa mga magulang na huwag nating palampasin ang pagpapabakuna sa ating mga anak dahil makabubuti ito sa kanilang kalusugan.

Alalahanin sana natin na mas maganda na lumalaki silang matalino, malusog, malakas at masigla.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga programa para sa mga estudyante vs. learning loss

ni Ryan Sison @Boses | Nov. 6, 2024

Upang maiwasan ang tinatawag na learning loss, matapos ang mga nakalipas na mga bagyo, naglatag na ng mga bagong learning program ang Department of Education (DepEd).

Ito ang Dynamic Learning Program (DLP) na layuning matugunan ang pagkaantala ng mga klase dulot ng mga kalamidad at iba pang mga hamon, kung saan ilulunsad ng kagawaran ngayong buwan.

Sa isang pahayag, sinabi ni DepEd Secretary Sonny Angara na dadalhin nila ang resilience o katatagan sa puso ng pag-aaral, upang walang student’s education ang kailangang huminto kapag may mga hamong dumating.

Sa ilalim ng DLP, magbibigay sa mga apektadong paaralan ng kinakailangang flexibility para sa make-up classes, kabilang ang paggamit ng “simple at targeted” na mga activity sheet, pati na rin ang mga temporary learning spaces.

Gayundin, magsasagawa ng mga feature ng parallel classes, activity-based engagement, at students’ portfolios na may minimal homework loads.

Hinihikayat din ng naturang programa ang mga estudyante na pag-aralang mabuti ang mga aralin at hubugin ang kanilang essential skills tulad ng pagsusulat, problem-solving, at critical thinking.

Sisimulan naman ng DepEd ang pilot implementation ng DLP ngayong November sa mga iskul na naapektuhan ng bagyo gaya ng Ilocos Region, Cagayan Valley, Central Luzon, Calabarzon (Cavite, Laguna, Batangas, Rizal, Quezon) Bicol Region at Cordillera Administrative Region (CAR).

Ginawa ng kagawaran ang inisyatibang ito matapos ang ilang linggong class suspension sa iba’t ibang bahagi ng bansa dahil sa mga magkakasunod na bagyo.

Sa naging pinsala naman sa imprastruktura nasa P396 milyong halaga ang kailangan para sa reconstruction at major repairs ng hindi bababa sa 113 totally damaged classrooms at 227 partially damaged classrooms, hindi pa kasama ang mga nasirang palikuran, wash facilities, furniture, at computer equipment, at iba pa, batay sa mga report.

Tama lang ang desisyon ng kinauukulan na magkaroon ng mga programa na makakatulong sa mga mag-aaral para makabawi sa mga nawalang oras ng kanilang pag-aaral.

Marami kasi ang nasayang na panahon nila na hindi naman natin masisisi, na ang tanging dahilan ay ang mga nagdaang bagyo.

Pero kung isasagawa ang bagong learning program na ito, pasasaan ba at madaling makakasunod ang mga estudyante, kung saan mapupunan ang gap sa kanilang pag-aaral.

Kumbaga, agad silang makakabangon sa krisis na ito na dumaan dahil sa kalamidad.

Hiling lang natin sa kinauukulan na sana ay mag-isip pa ng mga paraan na makatutugon sa anumang hamon na dumating sa ating mga estudyante para naman magtuluy-tuloy na talaga ang kanilang pagkatuto at hindi sila mapag-iwanan sa pag-aaral.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Sangkot sa online sexual abuses, dapat parusahan

ni Ryan Sison @Boses | Nov. 5, 2024

Dapat na parusahan ang masasangkot sa insidente ng tinatawag na online sexual abuse and exploitation of children na nangyayari sa bansa. 

Kaya naman ipinangako ng Department of Justice (DOJ) na kanilang papanagutin sa batas ang sinumang may kinalaman sa OSAEC na itinuturing na krimen.

Ayon kay National Prosecution Service Officer-In-Charge Richard Anthony D. Fadullon, titiyakin ng kagawaran na makukulong ang lahat ng mga may sala sa ganitong uri ng mga aktibidad.

Aniya, sasailalim sa mga pagdinig sa korte ang mga mahuhuli habang papatawan ng mga kaukulang kaso ang mga ito sa ilalim ng Department Circular 15 at 20.

Nitong nakaraang linggo, isang foreigner graphic artist ang hinatulan ng French court ng 25 taon pagkakakulong dahil sa pag-order nito ng livestream rape o panggagahasa sa mga batang babae sa Pilipinas.

Napag-alaman ng mga otoridad na binayaran nito ang mga salarin na siyang manghahalay sa mga batang babae na may edad 5 hanggang 10, at saka ipapalabas sa mga manonood.

Hindi dapat ipagsawalang-bahala ang mga kaso ng online sexual abuse and exploitation lalo na kung ang sangkot dito ay mga batang babae.

Kaya tama lamang ang desisyon ng DOJ na parusahan agad ang sinumang mahuhuling salarin. 

Kung tutuusin ay may batas na tayo patungkol sa ganitong uri ng krimen, ang kailangan lamang ay matiyak na maipatupad ito nang tama ng mga kinauukulan.

Marahil, kailangan din ng pakikiisa ng publiko sa ating pamahalaan sa paglaban sa naturang krimen dahil sa ganitong paraan ng pagtutulungan, hindi man agad natin masugpo ay mababawasan ang magiging biktima ng pang-aabuso sa mga kabataan.

Paalala sa mga magulang na dapat nating alagaan, bantayan at protektahan ang ating mga anak upang hindi sila mapahamak.

Alalahanin natin lagi na walang magmamalasakit sa kanila kundi tayo lang na kanilang labis naman na inaasahan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com