Publiko, mag-ingat sa sakit na dulot ng ashfall

ni Ryan Sison @Boses | Nov. 10, 2024

Dahil sa nag-aalburotong Mt. Kanlaon, dapat na mag-ingat ang mga kababayan nating residente sa Negros Occidental at Negros Oriental sa posibleng ashfall at iwasan din ang matagal na pagkaka-expose sa sulfur dioxide na mula sa naturang bulkan. 

Pahayag ng National Disaster Risk Reduction and Management Council (NDRRMC), inaasahang tutumbukin ng ashfall ang hilagang-kanlurang bahagi ng Bulkang Kanlaon.

Batay naman sa monitoring ng Philippine Institute of Volcanology and Seismology (PHIVOLCS) ay nakapagtala ng pagsingaw na may panaka-nakang ashfall ang Mt. Kanlaon habang tinatayang 7,378 tonelada ng asupre ang ibinuga nito na may taas na 750 metro.

Ayon sa PHIVOLCS, maaaring mairita ang mga mata, lalamunan, at respiratory tract dahil sa exposure o pagkalantad dito kaya mahigpit na pinag-iingat ang mga indibidwal

na may mga health condition sa paghinga.

At kung magkaroon na ng ashfall na maaaring makaapekto sa mga komunidad, dapat takpan ng malinis na basahan o dust mask ang ilong at bibig kapag tuluyang nalanghap ito. 

Pinaalalahanan na rin ang civil aviation authorities na mag-abiso sa mga piloto na huwag munang magpalipad ng aircraft malapit sa tuktok ng bulkan upang makaiwas sa panganib na dulot ng ashfall at sulfur dioxide at sa posibleng biglaang pagputok nito.  

Ayon sa PHIVOLCS, nananatiling nakataas sa Alert Level 2 ang Bulkang Kanlaon dahil sa “increased unrest” nito kasunod ng naging pagsabog noong June.

Kailangang maging alerto ng ating mga kababayan sa mga lugar na malapit sa Bulkang Kanlaon dahil anumang oras ay maaaring sumabog ito. 

Walang iniwan iyan sa nangyaring pagsabog noon ng Bulkang Taal, kung saan napakaraming mamamayan ang labis na naapektuhan. 

Ang masaklap pa nagkasakit-sakit na ang mga residente dahil sa mga naibugang abo at sulfur dioxide na talagang mapanganib sa ating kalusugan.

Kaya naman payo natin sa mga kababayan doon na sakaling magpatupad na ng force evacuation ang kinauukulan ay agad na sumunod upang hindi na umabot na masakripisyo pa ang inyong buhay at pamilya. 

Gayundin, palaging bantayan ang mga anunsyo ng pamahalaan upang malaman ang sitwasyon sa lugar at lagay ng nasabing bulkan. Maging mapagmatyag at maingat tayo upang hindi mapahamak.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Good news sa lahat ng kasambahay sa NCR

ni Ryan Sison @Boses | Nov. 9, 2024

Siguradong labis na kasiyahan ang maidudulot ng magandang balitang ito para sa lahat ng kasambahay sa National Capital Region (NCR). 

Dahil inaasahang tataas ang sahod ng mga kasambahay sa naturang rehiyon.

Ayon sa Regional Tripartite Wages and Productivity Board (RTWPB), nakatakda silang magsagawa ng public hearing hinggil sa wage adjustment ng mga domestic worker, na gaganapin sa November 25 sa Philippine Trade Training Center sa Pasay City.

Sinabi ng RTWPB na inimbitahan nila ang mga stakeholder na makiisa sa nasabing hearing dahil ang kanilang mga input ay itinuturing na mahalaga sa pagbalangkas ng isang bagong wage order.

Hinikayat din nila na magsumite ang mga ito ng mga position paper sa RTWPB patungkol sa nasabing panukala.

Matatandaang noong January ay inaprubahan ng RTWPB ang umento na P500, kaya naging P6,500 kada buwan ang sahod ng mga kasambahay sa Metro Manila.

Iniutos naman ng wage boards sa ibang mga rehiyon ang salary adjustments para sa mga kasambahay.

Kapag natapos na ang naturang pagdinig at naibaba ang kautusan, tiyak makakatanggap ang ating mga kasambahay na nasa NCR ng dagdag sa kanilang sahod.

Ang ibibigay kasing umento para sa mga kasambahay ay malaking tulong hindi lamang para sa kanila kundi maging sa kanilang pamilya.

Sa taas ba naman ng bilihin, gastusin at mga bayarin ay talagang kulang na kulang na pantustos para sa kanilang mga pangangailangan.

Kaya tama lang na bigyan sila ng increase para kahit paano ay matumbasan naman natin ang ginagawa nilang pag-aasikaso at pag-aalaga sa atin.

Marahil, sa ganyang paraan ay mas sisipagin sila sa paglilingkod at pag-alalay sa ating kailangan habang hindi na sila makakaisip pa na umalis sa atin. 

Hiling natin sa kinauukulan na huwag na sanang patagalin pa at agad na maaprubahan ang dagdag-sahod para sa ating mga kasambahay.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Ilegal na nabiling lupain ng dayuhan, dapat bawiin

ni Ryan Sison @Boses | Nov. 8, 2024

Ang malawak na mga lupain sa bansa na minana pa ng iba sa atin mula sa mga ninuno ay walang ibang dapat na magmay-ari kundi tayong mga Pilipino. 

Kaya naman inihain ng mga kongresista ang panukalang batas na nagbibigay awtorisasyon sa gobyerno na bawiin ang mga real estate na ilegal na nabili ng mga dayuhan sa Pilipinas, partikular na ang mga estate o lupain na may kaugnayan sa ilegal na operasyon ng Philippine Offshore Gaming Operators (POGO).

Iniakda ang House Bill No. 11043 o ang “Civil Forfeiture Act” nina Senior Deputy Speaker Rep. Aurelio Gonzalez, Jr., Deputy Speaker Jayjay Suarez, Reps. Robert Barbers, Dan Fernandez, Bienvenido Abante, Jr. at Joseph Stephen Paduano.

Ayon sa mga may-akda, layunin umano ng bill na palakasin ang constitutional ban sa tinatawag na foreign land ownership na itinatag sa 1935 Constitution.

Paliwanag pa nila na sa Saligang Batas ng Pilipinas ay ipinagbabawal sa mga dayuhan na magmay-ari ng lupa maliban sa mga kaso ng hereditary succession o namamana.

Batay sa Artikulo XII, Seksyon 7 at 8 ng 1987 Constitution ay partikular na naghihigpit sa pagmamay-ari ng pribadong lupa sa mga Pilipino o mga korporasyong may hindi bababa sa 60% na pagmamay-ari ng mga Pilipino.

Pahayag pa nila, resulta ang naturang panukala sa nagpapatuloy na pagdinig ng Quad Committee tungkol sa extra-judicial killings, ilegal na operasyon ng POGO at ilegal na droga.

Nararapat lamang na ang talagang nagmamay-ari ng mga lupain sa atin bansa ay tayong mga Pinoy.

Hindi makatarungan na ang mga dayuhan pa ang nagtataglay ng malawak na mga real estate, habang maraming mga mamamayan ay nananatiling nangungupahan at walang sariling lupa.

Kaya naman tama lang ang nais ng mga mambabatas na dapat bawiin ng gobyerno ang mga lupang ilegal na nakuha ng mga banyaga, ito man ay may kaugnayan sa POGO o wala.

Sa kinauukulan, huwag sana nating hayaan na patuloy na kamkamin ng mga dayuhan ang ating mga lupain, sa halip ay protektahan natin ang lahat ng ating mga pag-aari.  

Sana lang ay maging ganap na batas na ito sa lalong madaling panahon, nang sa gayon ay maibalik na sa atin ang pagmamay-ari, at hindi na dumami pa ang ilegal na makakakuha na mga dayuhan ng ating mga lupain.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com