Pagkain, paglaanan kaysa mga pandekorasyon

ni Ryan Sison @Boses | Nov. 13, 2024

Mahigit isang buwan pa bago mag-Pasko, at marami sa atin ang bumibili pa rin ng mga pandekorasyon sa bahay at kung anu-ano pang mga abubot. Pero alam ba nating posibleng magdulot ang mga ito ng pinsala sa atin?

Ayon sa Ecowaste Coalition, dapat na mag-ingat ang publiko sa pagbili ng mga Christmas tree ornaments dahil natuklasan nila na may mga harmful substance o nakapipinsalang sangkap ang mga plastic balls na ginagamit na dekorasyon, bukod pa sa walang labeling information at warning.

Ito ang napatunayan ng toxic watch group sa kanilang nabiling 60 Christmas plastic balls na may mga iba’t ibang kulay, design, at sukat, sa mga retail store sa Divisoria sa Manila, gayundin sa Cubao sa Quezon City.

Sinabi ng Ecowaste, na sa 60 nasuri gamit ang kanilang handheld X-Ray Fluorescence Analyzer, nasa 57 ang nakitaan ng mataas na level ng Bromine, na isang elemento ng kemikal. 

Kaya naman payo ng naturang grupo sa lahat ng konsyumer na sa mga awtorisadong pamilihan na lamang mag-purchase ng mga nais na Christmas decorations para maiwasan ang anumang sakuna at disgrasya. Gayundin anila, kailangang mag-ingat at i-check munang mabuti ang label ng mga makikinang at makukulay na pandekorasyon bago ito bilhin.

Mas mainam siguro na bumili na lamang tayo ng mga gusto nating Christmas decor sa mga legit store para hindi na tayo kakaba-kaba na makapinsala sa atin.

Kahit medyo mahal ang presyo kumpara sa mga nabibili lamang sa tabi-tabi na mura ay nakatitiyak naman tayong safe at maayos dahil may mga trademark at label ang mga ito.

Maaari rin kasing pagmulan ang mga dekorasyong ito ng aksidente, bukod pa sa nakitaan ng kemikal na sadyang delikado para sa atin.

Marahil, mas makabubuti rin kung ibibili na lamang natin ng mga pagkain na mas may pakinabang para sa atin at pamilya kaysa bumili tayo ng mga pandekorasyon. 

O kaya naman ay gumawa na lang tayo ng mga naturang decor, iyon bang tinatawag na DIY o do it yourself para mapaganda ang ating mga tahanan.

Isipin sana natin na may mga materyal na bagay na ‘di ganu’n kaimportante at hindi kailangang pagkagastusan dahil ang mahalaga ay ang pagsasama-sama ng buong pamilya nang ligtas at puno ng kasiyahan ngayong Kapaskuhan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Gobyerno, dpat paghandaan ang posibleng pagbabago sa US policy

ni Ryan Sison @Boses | Nov. 12, 2024

Dapat sigurong maghanda na ng ating gobyerno para sa posibleng pagbabago sa mga polisiya ng United States sa ilalim ng administrasyon ni President-elect Donald Trump.

Ito ang panawagan ni Senadora Imee Marcos, partikular aniya na kailangang paghandaan ang mga maaaring makaapekto sa immigration, defense at geopolitical interests. 

Binigyang-diin ni Sen. Imee ang pangangailangang maprotektahan ang humigit-kumulang 200,000 undocumented Filipinos sa Amerika na nanganganib sa potensyal na mass deportations sa pamamagitan ng pagpapalawak ng mga reintegration program, kabilang ang skills training, livelihood support, at direct assistance para sa mga deportees mula sa Department of Social Welfare and Development (DSWD), Department of Labor and Employment (DOLE) at Department of Foreign Affairs (DFA).

Aniya, kailangan ng plano para sa mga naturang pamilya na maaaring mapilitang umuwi sa ating bansa. 

Ganito rin ang naging pahayag ni Senate President Francis “Chiz” Escudero, kung saan sinabi niyang si Donald Trump ay isang pangunahing macroeconomic assumption, mula sa trade hanggang sa security hanggang sa immigration. Kung ano ang sinabi niyang planong gawin, ang ilan sa unang araw ng kanyang administrasyon, ay tiyak na makakaapekto naman sa atin.

At kung itutuloy ni Trump ang kanyang deklarasyon na magsagawa ng mass deportations, ayon kay Senate President Chiz, maaaring maapektuhan ang tinatayang 300,000 Pinoy sa US.

Ipinaliwanag pa ng senador na mangangailangan ng napakaraming malalaking eroplano para mailabas ang 1 porsyento ng mga kababayan natin mula sa Amerika.

Batay sa datos na nakalap ng GMA Integrated News ay nagpapakita na mayroong 4,640,313 Pinoy sa US noong nakaraang taon, ayon ito sa latest figures ng US Census Bureau.

Habang maaga pa at kakaupo ni Trump, kailangang umaksyon na ang pamahalaan para ma-secure ang mga kababayan natin sa Amerika, palakasin ang ating depensa at tiyaking preparado tayo para sa anumang pandaigdigang pagbabago.

Kumbaga, kumilos na ngayon para hindi tayo nagkukumahog sa maaaring maging bagong polisiya ng US. 

Alalahanin sana natin na malaking bansa ang Amerika at itinuturing na isa rin sa mga mayayamang bansa sa buong mundo, at anumang patakaran na ibababa nito sa ilalim ng pamamahala kanilang bagong pangulo ay tiyak naman na labis tayong maapektuhan, kaya kailangang maghanda na tayo bago pa mahuli ang lahat.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga kandidatong walang “K”, out

ni Ryan Sison @Boses | Nov. 11, 2024

Mas mainam na sigurong mga kandidatong may kakayahan at kaalaman sa batas ang makilahok sa eleksyon sa susunod na taon.

Nasa 47 indibidwal kasi ang idineklara ng Commission on Elections (Comelec) na nuisance candidate para sa 2025 senatorial polls. Ipinost naman ng poll body ang listahan sa kanilang social media account.

Matatandaang noong nakaraang buwan ay nakatanggap ang Comelec ng 183 certificates of candidacy (COCs). 

Pagkatapos ay naglabas ito ng paunang listahan ng 66 indibidwal na ang mga pangalan

ay maaaring maisama sa official ballot.

Ayon sa Comelec, ito’y “walang pagkiling sa desisyon ng Division o En Banc sa mga petisyon na ideklara bilang mga nuisance candidate na inihain ng Law Department.”

Gayundin, nalutas ng komisyon, “na kumpirmahin ang awtoridad ng Law Department na simulan sa ngalan ng Commission ang motu proprio na paghahain ng mga petisyon para ideklara bilang mga nuisance candidate laban sa mga pinangalanang 117 aspirante”.

Batay naman sa Omnibus Election Code, ang Comelec ay maaaring magdeklara ng isang aspirante bilang isang nuisance candidate kung ang COC ay naihain, “to put the election process in mockery or disrepute or to cause confusion among the voters by the similarity of the names of the registered candidates or by other circumstances or acts [that] clearly demonstrate that the candidate has no bona fide intention to run.”

Nauna na ring ipinahayag ni Comelec Chairman George Garcia na plano nilang resolbahin ang lahat ng nuisance candidate petitions sa katapusan ng November. 

Mabuti at naglabas na rin ng listahan ang kinauukulan ng mga idineklarang nuisance candidate para maging mas maayos ang ating halalan.

Batid naman natin na hindi lahat ng mga naghain ng COC ay itinuturing na bonafide o tunay ang kanilang intensyon na tumakbo sa eleksyon, kung saan posibleng malagay lamang sa kasiraan o kaya ay maging sanhi ng kalituhan sa mga botante.

Kumbaga, nagiging ‘panggulo’ lang ang mga ito para sa mga totoo at nais na kumandidato na may kakayahan, marunong sa batas, at may alam sa pamamahala ng nasasakupan. 

Kaya tama lamang na pakasalain maigi ang mga aspiranteng gustong maupo sa gobyerno. Iyon bang mga walang kakayahan o kaalaman talaga ay huwag ng payagan pa na makapuwesto.

Paalala lang natin lagi sa mga kababayan na maging matalino sa pagpili ng ating magiging lider. Huwag mapagdalus-dalos at isiping mabuti ang ibobotong kandidato na may puso at tapat na maglingkod sa mga mamamayan at sa bayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com