Centralized national 911 system, tugon sa mga emergency

ni Ryan Sison @Boses | Nov. 23, 2024

Sa hangaring mapabuti ang koordinasyon at ginagawang pagtugon ng iba’t ibang ahensya ng gobyerno para sa parehong krimen at disaster emergencies o mga kalamidad, planong itatag ang isang centralized national 911 system sa Pilipinas.

Ito ang isinusulong ni Office of Civil Defense (OCD) Administrator, Undersecretary Ariel Nepomuceno, kung saan tinalakay din niya ito sa kalihim ng Department of the Interior and Local Government (DILG), na layong makaresponde sa mga oras sa panahon ng krisis sa buong bansa.  

Sa inisyal na plano, ayon kay Nepumuceno, posibleng pagsama-samahin na ang lahat ng sistema at protocol na nakapaloob sa crime emergency at disaster emergency response, habang bubuo ng isang national protocol na magagamit at susundin para sa episyenteng pagtugon dito.

Binigyang halimbawa naman ng opisyal ang kumplikado umanong sistema sa disaster management structure na sinusunod sa bansa at ang posibilidad ng pagkalito ng publiko sa paggamit nito.

Giit ni Nepomuceno, ang epektibong emergency management ay nakasalalay sa maayos na pagsasama-sama ng bawat kagawaran ng pamahalaan na may kani-kanyang papel na gagampanan.

Sinabi niya na ang Department of Science and Technology (DOST) ay pangunahing responsable para sa mitigation, na nakatuon sa pagpapahusay sa katatagan ng komunidad upang mabawasan ang potensyal na pinsala.

Ang DILG ay mangunguna sa mga paghahanda para sa mga disaster o sakuna at titiyak sa mga hakbang na isasagawa bago pa tumama ang mga kalamidad. Habang ang Department of Social Welfare and Development (DSWD) ay siyang lead sa mga response effort.

Nagsisilbi namang forefront ang National Economic and Development Authority (NEDA) sa pagbuo ng mga long-term solution sa mga kalamidad gaya ng pagsasaayos at muling pagtatayo ng mga imprastraktura.

Sa kasalukuyan aniya, ang National Disaster Risk Reduction and Management Council (NDRRMC) ay binubuo ng 45 member agencies, kabilang ang mga kinatawan mula sa private sector, upang matiyak ang isang coordinated response, base sa partikular na estado ng isang emergency.

At bilang secretariat ng NDRRMC aniya, ang OCD ay gumaganap ng mahalagang papel sa pagpapadali ng komunikasyon at koordinasyon sa pagitan ng mga ahensya ng gobyerno.

Panahon na rin sigurong magkaroon tayo ng sentralisadong sistema ng emergency na tutugon sa pangangailangan ng ating mga kababayan.

Kung titingnan kasi sa ibang mga bansa, mabilis ang pagresponde ng mga otoridad nila sa anumang emergency dahil sa naturang integration ng kanilang government agencies, kaya naman nagagawa masagip agad at ma-secure ang mga mamamayan nila sa tiyak na kapahamakan.

Sana nga ay hindi lamang ito isang pangarap kundi matupad at mangyari para sa ikabubuti ng taumbayan at ng ating bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Malaking pabuya para sa mga informant, dapat lang

ni Ryan Sison @Boses | Nov. 22, 2024

Nakaututuwang mabatid na marami pala sa mga kababayan ang nagiging instrumento at katuwang ng mga otoridad para tuluyang madakip ang mga kriminal. 

Mayroon kasing siyam na informants na maghahati-hati sa P1.8 milyon reward mula sa Philippine National Police (PNP) dahil sa pagbibigay nila ng mga impormasyon na humantong sa pagkakaaresto sa siyam na tinaguriang most wanted criminals.

Tinanggap ng mga impormante ang naturang pabuya sa simpleng seremonya na ginanap sa PNP Intelligence Training Group sa Camp Crame, Quezon City, kamakailan. 

Ayon kay PNP Director for Intelligence Brig. Gen. Westrimundo Obinque, ang impormasyon na ibinigay ng mga tipsters ay nagresulta sa pagkakahuli sa mga pugante na sangkot sa mga serious crime tulad ng pagpatay, panggagahasa, homicide at illegal possession of firearms.

Sinabi ng opisyal na nahaharap naman sa legal proceedings ang mga nahuling kriminal, na matagal nang pinaghahanap ng batas.

Nauna nang ipinahayag ni PNP chief Gen. Rommel Francisco Marbil ang kahalagahan ng pagtutulungan ng komunidad para sa pagpapatupad ng ating batas.

Aniya, ang monetary reward system ng PNP ay isang mahalagang bahagi ng kanilang estratehiya upang hikayatin ang publiko na makilahok sa pagtugon sa mga banta na may kinalaman sa ating seguridad.

May punto naman ang kinauukulan na dapat makiisa ng taumbayan sa pagsugpo ng kriminalidad na nagiging talamak sa ating mga komunidad.

Halos araw-araw kasi ay may mga report ng patayan, rape at kung anu-ano pang karumal-dumal na krimen na kahit mismong mga otoridad ay nahihirapang madakip ang mga halang ang kaluluwang mga ito.

Kaya tama lamang na mayroong tutulong sa kanila na mga informant o tipsters para mabawas-bawasan din ang mga wanted criminal.

Hiling lang natin sa kinauukulan na sana ay mas malaking pabuya ang ibigay sa mga impormante para lalong sipagin sa pagre-report sa kanila, habang dapat ay turuan din sila ng mga kinakailangang self-defense sakaling masuong man o manganib ang kanilang buhay. 

Sa ating mga informant, sana ay hindi kayo mapagod sa inyong ginagawa na makabubuti sa kapwa at sa komunidad, at sana ay mas dumami pa ang mga tulad n’yong aalalay sa ating kapulisan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Cellphone sa mga kulungan, dapat lang ipagbawal

ni Ryan Sison @Boses | Nov. 21, 2024

Bilang bahagi ng pinaigting na security protocols, bawal na ang mga cellphone sa mga bilangguan sa bansa. 

Ito ang ipinag-utos ni Bureau of Corrections (BuCor) Director General Gregorio Catapang Jr., ang pagpapatupad ng “no cellphone policy” sa lahat ng operating prisons at penal farms (OPPFs) sa buong bansa, dahil na rin aniya sa mga report na nananatiling source ng drug trade ay galing sa New Bilibid Prison (NBP).

Ayon kay Catapang, sakop ng naturang polisiya ang mga bisita, commissioned officer, non-commissioned officer, civilian personnel at iba pang indibidwal na pumapasok sa bisinidad ng mga opisina ng BuCor, NBP camps at lahat ng kulungan.

Binigyang-diin din ng opisyal na anumang mga cellphone o kaugnay na device na matuklasan ay kukumpiskahin nila para sa wastong dokumentasyon at disposisyon.

Habang maaari namang mapatawan ng administrative at criminal sanctions ang sinumang personnel na sangkot sa hindi awtorisadong pagpasok o paggamit ng mga cellphone.

Sinabi ni Catapang na alam niyang maraming magrereklamo na mga personnel sa bagong polisiya pero kailangang gawin ito para talagang wala ng makagamit ng cellphone sa loob ng bilangguan. 

Inatasan na rin niya ang lahat ng superintendents hinggil sa pagpapaigting ng security screening at mahigpit na inspeksyon sa lahat ng entry at exit points para maiwasan ang pagpupuslit ng cellphones. 

Iniutos na rin niya ang pagbili ng mga two-way radios bilang alternatibong paraan ng komunikasyon para sa mga tauhan.

Aniya pa, magkakaroon naman ng random inspections sa mga prison dormitory at work areas ng BuCor personnel para sa naturang devices.

Mas makabubuti na ngang ipagbawal ang mga cellphone sa mga kulungan dahil madalas na pinagmumulan at humahantong ang mga ito sa masamang gawain.

Sa halip kasi na gamitin bilang komunikasyon sa pagitan ng mga preso at pamilya, mga opisyal, kawani at iba pa, ay nagiging tulay pa ang mga cellphone sa mga ilegal na transaksyon, halimbawa na rito ang matinding kalakalan ng droga.

Hindi rin naman siguro kalabisan para sa mga personnel at opisyal ng mga prison at penal farms na wala muna silang cellphone habang nasa loob ng mga bilangguan at nagtatrabaho, at nang sa gayon ay gawin din silang ehemplo mismo ng mga preso, bisita, at kanilang mga tauhan.

Marahil sa ganitong paraan, magiging mas maayos at kahit paano ay makakaiwas sila sa mga ilegal na aktibidad sa ating mga bilangguan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com