Dagdag sa flag-down rate ng taxi, pag-aralang mabuti

ni Ryan Sison @Boses | Nov. 26, 2024

Bagama’t maaaring ilan sa mga taxi rider o komyuter ang hindi nakakaalam na P50 na ang flag-down rate, may mga taxi driver na nagsasabing kulang pa rin ito at umaasa silang maitaas sana ng P60.

Ayon sa isang taxi driver, may mga pasahero siyang naisakay na hindi batid ang bagong flag-down rate sa taxi batay sa order ng Land Transportation Franchising and Regulatory Board (LTFRB) Central Office nitong unang bahagi ng taon, para sa parehong air-conditioned at non-airconditioned taxi, subalit hindi kasama rito ang mga airport taxi services.

Ito ay bilang tugon ng kagawaran sa petisyon ng taas-pasahe ng mga taxi driver noong 2022.

Sinabi naman ng isa pang taxi driver na may ibang pasahero na nagagalit, at ang iba ay bumababa na lamang dahil sa nagugulat ang mga ito sa P50 na flag-down rate. 

Gayunman, may mga taxi rider naman na kapag ipinaliwanag nang maayos at naintindihan ito ay pumapayag na magpahatid at walang nagiging problema sa kanila.

Pahayag ng nasabing taxi driver, ang kanyang operator ay maagap naman sa pag-calibrate ng kanyang taxi meter.

Matatandaang base sa polisiya ng LTFRB, tanging ang mga taxi na may re-calibrated meters ang maaaring maningil ng bagong flag-down rate. Subalit, may ilang mga taxi driver na pinipiling huwag gawin ito dahil anila karagdagang gastusin pa ito para sa kanila.

Para sa ilang mga may-ari o operator ng taxi, ayaw nilang pa-resealing ang kanilang mga taxi dahil mahal ang bayad sa rami ng kanilang mga unit habang P50 lamang ang dagdag, kung saan lumalabas na lugi naman sila rito.

Ayon sa presidente ng Philippine National Taxi Operators Association, nagpapasalamat sila sa ginawang pagtaas ng flag-down rate, pero hindi pa rin ito sapat sa kanilang kinikita. Giit nila na dapat ang ibigay sa kanila ay ang kanilang orihinal na petisyon na P60 flag-down rate. Paliwanag nila, maganda ito dahil dagdag sa kanilang kita, pero kulang ito dahil sa tumataas din ang gasolina, at parang parehas lang ang nangyayari.

Pero para sa mga komyuter, ang pagtaas pa ng taxi fare ay wala na sa kanilang budget, habang ang iba ay mas pinipili na lamang ang mga transport network vehicle services.

Marahil, dapat na pag-aralan munang mabuti ang hirit ng mga taxi driver na P60 flag-down rate sa taxi bago ito ipatupad.

Tiyak na maraming mga kababayan ang mag-aatubiling sumakay ng taxi at gagawing mag-book na lamang sa mga motorcycle taxi na mabilis na ay mura pa, o kaya naman ay magtiis sa jeep o e-jeep at bus makarating lamang sa kanilang mga pupuntahan.

Batid natin ang hinaing ng mga taxi driver na kapos talaga ang kanilang kinikita dahil sa walang humpay na taas-presyo ng langis na ang kasunod siyempre ang pagtaas ng mga bilihin at bayarin, subalit, kailangan ding isipin ang mga komyuter na nagbabadyet naman sa araw-araw at pinagkakasya ang kanilang mga kita. Kumbaga, dapat timbangin muna at tiyaking patas ang magiging desisyon upang walang madehado.

Hiling natin sa kinauukulan na mag-isip ng magandang paraan para talagang masolusyunan ang hindi matapos-tapos na problema sa oil price hike nang sa gayon ay magbigay ng kaluwagan sa halip na pasanin sa lahat ng mamamayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pinamumugaran ng mga lamok, linisin para iwas-dengue

ni Ryan Sison @Boses | Nov. 25, 2024

Matapos ang anim na magkakasunod na tropical cyclone na tumama sa ating bansa, posible ang pagtaas ng mga kaso ng dengue gayundin ng leptospirosis.

Ito ang naging babala ng Department of Health (DOH), kung saan maaaring mas dumami ang mga breeding area ng lamok na nagdadala ng dengue virus. 

Kaya naman pinaalalahanan ng kagawaran ang publiko na alisin ang mga stagnant water sa kanilang lugar dahil sa ganito namumugad ang mga lamok na posibleng may dalang dengue habang kumonsulta nang maaga sa mga doktor o healthcare workers sakaling makaranas sila ng sintomas ng nasabing sakit, partikular na sa mga rehiyong apektado ng Bagyong Kristine, Leon, Marce, Nika, Ofel, at Pepito.

Sinabi ng DOH na may 17,033 kaso ng dengue ang naitala mula October 20 hanggang November 2 na mas mababa ng 17 porsyento kumpara sa 20,498 cases mula October 6 hanggang 19, 2024. Gayundin anang kagawaran, walang report na pagtaas ng mga bagong kaso ng dengue sa mga nabanggit na rehiyon sa nakalipas na anim na linggo. 

Subalit, tinitingnan din ng DOH ang mga datos kaugnay ng epekto ng bagyo na maaaring hindi pa naitatala sa ngayon. 

Ayon sa DOH chief, tumaas talaga ang mga kaso ng dengue sa ating bansa kaya may ilang mga lokal na pamahalaan na nagdedeklara na ng outbreaks at sinusuportahan naman nila ito dahil sa ipinapakita ng mga datos. Mayroong 340,860 dengue cases na naitala mula sa simula ng 2024 hanggang November 16, mas mataas ng 81 porsyento kumpara sa 188,574 kaso na naiulat sa parehong panahon noong 2023.

Sa mga kaso naman ng leptospirosis ay naitala sa northern regions matapos ang isang linggo o higit pang mga pagbaha, kung saan naghahanda na rin ang DOH para sa karagdagang dialysis units partikular na sa mga apektadong lugar. Payo ng kagawaran sa mga lumusong sa baha, na kung magsimulang makaranas ng mga sintomas ng leptos gaya ng lagnat at muscle pain, agad na magpakonsulta sa doktor. 

Dapat na sigurong simulan nating lahat ang paglilinis ng ating mga kabahayan at kapaligiran para na rin sa ating kalusugan.

Huwag nating hayaan na mamahay o pamugaran ng mga lamok ang mga daluyan ng ating tubig o mga lalagyan ng tubig gaya ng drum, container at iba pa, kung saan kailangan na panatilihin nating bago at malinis ang mga ito araw-araw.

Gayundin, dapat na mag-request na tayo ngayon sa ating mga barangay official na magkaroon ng fogging sa ating mga lugar upang tuluyan nang mamatay ang mga pesteng lamok na ito may dala man ng dengue o wala.

At para sa mga hindi naiwasang lumusong sa baha ay agad na maligo at maglinis ng katawan, at gawing buhusan ng alcohol ang ating mga paa upang kahit paano ay hindi tumalab o kumapit sa atin ang anumang impeksyon na dulot ng maruming tubig-baha. 

Lagi nating alalahanin na mahalagang alagaan ang ating katawan at kalusugan dahil walang ibang gagawa nito kundi tayo rin lang.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Responsableng tulong ‘di limos para sa mga taong lansangan

ni Ryan Sison @Boses | Nov. 24, 2024

Kung minsan sa kagustuhan natin na makatulong sa kapwa ay agad tayong nagbibigay ng kahit na konting barya sa mga nanghihingi sa atin. 

Kaya naman muling nanawagan ang Department of Social Welfare and Development (DSWD) sa publiko na huwag magbigay ng limos sa mga batang lansangan, mga homeless o taong walang tirahan at mga miyembro ng Indigenous Peoples’ (IP) groups, na kadalasang dumarami ang bilang tuwing holiday season.

Ayon kay DSWD Assistant Secretary Irene Dumlao, hindi nais ng kagawaran na mabalewala ang diwa ng Pasko. Gusto pa rin nilang magbahagi ng tulong lalung-lalo na sa mga bata, subalit ang responsableng paraan ng paggawa nito ay ang abutin sila, at alisin sila sa mga lansangan.

Ang apelang ito ng DSWD ay alinsunod sa Presidential Decree (PD) No. 1563, kilala rin bilang Anti-Mendicancy Law, na nagbabawal sa pamamalimos at paghingi ng mga charitable donation sa mga lansangan ng mga indibidwal o religious organizations.

Upang maiwasan ang tinatawag na mendicant activities o pagbibigay sa mga nanlilimos, hinimok ni Dumlao ang publiko na magkaloob ng iba pang uri ng tulong, gaya ng pagsasagawa ng organized activities sa pamamagitan ng gift-giving, feeding sessions, medical missions, storytelling sessions at group caroling sa pakikipag-ugnayan sa mga local government units (LGUs).

Sinabi ng opisyal na nais nilang matiyak ang isang ligtas na Christmas experience para sa lahat ng mga bata. Kaya aniya, mahalaga ang paggabay ng mga magulang o guardian sa mga bata na nakikilahok sa mga caroling para masigurong safe at malayo sila sa kapahamakan.

At para sa mga grupo o organisasyong nagsasagawa ng fundraising activities sa pamamagitan ng caroling, hinikayat naman niyang kumuha ng solicitation permits mula sa DSWD kung ang saklaw nito ay sa buong rehiyon o sa buong bansa.

Sinabi niya na ang permit ay dapat makuha mula sa mga concerned LGU para sa fundraising na limitado sa loob ng isang komunidad, lungsod o munisipalidad.

May punto naman ang kinauukulan sa panawagan nilang hindi na dapat tayo magbigay ng limos sa mga kababayan nating homeless, street children, IP groups o katutubo na nagkakalat na rin sa mga lansangan lalo na ngayong nalalapit na ang Kapaskuhan.

Kung minsan ay nagiging hanapbuhay na rin nila na mangatok sa bintana ng mga sasakyang nakahinto sa trapik at nanghihingi ng barya, o sumasampa sa mga bus, jeep at iba pang uri ng public transport at namamalimos sa mga pasahero. Sa halip kasi na matulungan natin sila para matuto na magbanat ng buto ay nagiging tamad at umaasa na lamang sa ating mga limos.

Marahil, mas makabubuting huwag na nga tayong magbigay ng kahit na anong limos bagkus maging responsable tayo sa pagtulong sa kanila.

Kumbaga, gawin natin ang tamang paraan ng pagtulong at pagsuporta sa mga kababayang nangangailangan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com