Tourist arrival sa Boracay, bumaba sa pagbabalik ng RT-PCR test requirement

ni Jasmin Joy Evangelista | January 11, 2022

Malaki ang ibinaba ng bilang ng tourist arrival sa Boracay sa unang araw pa lang ng pagbabalik ng RT-PCR test requirement. 

Mula 2,500 arrivals noong araw bago ibalik ang requirement, bumagsak agad nang kalahati ang bilang ng mga turista noong Linggo.

Ayon kay Malay Mayor Frolibar Bautista, malaki man ang epekto sa turismo, makatutulong naman umano ang polisiya para mapabagal o mapigilan ang pagdami ng COVID-19 cases sa isla.

"This is a very good step in order to stop the spread since noong nag-start itong nagka-COVID is from tourist from Metro Manila," ani Bautista.

Sa ngayon, 44 kaso ng COVID-19 ang naitala sa Boracay, kung saan 17 ang tourism workers habang 27 ang turista.

Wala pang kasiguraduhan kung hanggang kailan magtatagal ang paghingi ng negative RT-PCR test result bilang requiremen pero ayon sa lokal na pamahalaan, malinaw na hanggang mataas ang banta ng pagkakaroon ng sakit sa mga lugar gaya ng Metro Manila, magiging tuloy-tuloy ang requirement na ito.

Sen. Lito Lapid, nagpositibo sa COVID-19

ni Ronalyn Seminiano Reonico | August 23, 2021

Nagpositibo sa COVID-19 si Sen. Lito Lapid, ayon sa kanyang staff ngayong Lunes.

Saad ni Atty. Jericho U. Acedera, chief of staff ni Lapid, "We wish to confirm that unfortunately, Pinuno tested positive in his COVID-19 RT-PCR test.

"He is currently undergoing treatment at the Medical City Clark where his doctors consider his case as mild to moderate."

Samantala, sumailalim na rin umano sa tests ang mga nagkaroon ng close contact sa senador at ayon kay Acedera, nagnegatibo naman ang mga close-in employees ni Lapid sa isinagawang antigen test at wala ring nakitaan ng sintomas ng COVID-19.

Saad pa ni Acedera, "We shall be reporting progress of his recovery when needed and as we get the news from his doctors.

"We enjoin everyone to pray that his health and of all those infected continue to improve, and more importantly, for this pandemic to soon be over.”

Magulang, negative sa test… Beybi, patay sa COVID-19 sa Cagayan

ni Lolet Abania | August 17, 2021

Isang 11-buwang gulang na sanggol ang namatay dahil sa COVID-19 sa bayan ng Santa Praxedes, Cagayan.

Ayon sa Santa Praxedes Rural Health Unit and Birthing Center, ito ang unang kaso ng nasawi dahil sa COVID-19 sa nasabing bayan.

Batay sa nai-post sa Facebook ng SPRHU, nasawi ang beybi nito lamang Sabado, Agosto 14.

Unang isinugod ang sanggol noong Agosto 3 sa Northern Cagayan District Hospital matapos na makaranas ng pag-ubo, sipon at hirap sa paghinga.

Noong Agosto 6, isinailalim ang beybi sa RT-PCR test at makalipas ang tatlong araw, lumabas ang resulta nito na positibo sa COVID-19.

Nitong Sabado, tuluyang namatay ang sanggol habang ginagamot sa naturang ospital.

Patuloy naman ang ginagawang contact tracing ng municipal health office ng Cagayan para matukoy ang mga posibleng nakasalamuha pa ng beybi.

Gayunman, lumabas sa mga swab tests na negatibo sa COVID-19 ang pamilya, kaanak at mga close contact ng sanggol kaya palaisipan pa rin kung paano nito nakuha ang nakamamatay na sakit.

Pinayuhan naman ng lokal na pamahalaan ng Cagayan ang mga residente lalo na ang mga authorized person outside residence o APOR na dobleng ingat ang kanilang gawin kontra-COVID-19.

Samantala, hanggang nitong Linggo, Agosto 15, nakapagtala ng 23 bagong kaso ng COVID-19 sa Santa Praxedes kung saan umakyat na sa 38 ang aktibong kaso ng sakit.