DBM OIC Canda, nagpositibo sa COVID-19

ni Lolet Abania | August 23, 2021

Kinumpirma ni Department of Budget and Management (DBM) Officer-in-Charge Undersecretary Tina Rose Marie Canda ngayong Lunes na nagpositibo siya sa test sa COVID-19 subalit nananatiling asymptomatic.

Ayon kay Canda, isinailalim siya sa test sa COVID-19 nitong Linggo, Agosto 22, bilang preparasyon para sa pagsusumite ng proposed 2022 national budget sa Congress ngayong Lunes.

“Our routine exam before going to those events, usually we have an antigen. I wanted to have an RT-PCR, so the RT-PCR came out positive. I’ve had a history of false positives, so I just had myself re-swabbed. Apparently, I’m asymptomatic but I hope it stays that way,” sabi ni Canda sa isang phone interview.

Sinabi rin ng opisyal na naka-quarantine siya sa kanyang tirahan habang patuloy sa kanyang trabaho bilang DBM OIC lalo na’t nananatili siya sa ganoong kondisyon.

“I’m in quarantine right now. I’m not even getting out of my room. I still function, I still do my work here inside my room in my house,” aniya.

Matatandaang si Canda ay itinalagang DBM OIC noong Agosto 2, 2021, matapos na ang dating Budget Secretary na si Wendel Avisado ay nag-medical leave dahil sa pakikipaglaban nito sa COVID-19.

Noong Agosto 13, inianunsiyo ang resignation ni Avisado makaraang ma-admit sa ospital ng walong araw at ma-quarantine nang halos isang buwan.

Taga-Bohol at Negros, kailangan ng swab test sa pagpasok sa Cebu

ni Ronalyn Seminiano Reonico | June 14, 2021

Kailangang magpakita ng negatibong resulta ng RT-PCR o antigen test ang mga biyahero mula sa Bohol at Negros Oriental at Occidental na pupuntang Cebu simula ngayong araw, Hunyo 14 hanggang sa July 24, ayon sa lokal na pamahalaan.

Ayon sa Cebu Provincial Government, kailangang isagawa ang RT-PCR test sa loob ng 72 oras bago ang biyahe papuntang Cebu at ang rapid antigen test naman ay kailangang isagawa 48 hours bago bumiyahe.

Ayon naman kay Cebu Governor Gwendolyn Garcia, ito ay ipinatupad bilang pag-iingat dahil sa pagdami ng kaso ng COVID-19 sa Bohol at Negros.

Pasyente at dalaw, dapat magpa-swab test

ni Mary Gutierrez Almirañez | March 27, 2021

Mandatoryo na ring isasailalim sa RT-PCR swab tests ang lahat ng pasyente at kasama nito sa ospital simula sa Lunes, ika-29 ng Marso, batay sa bagong guidelines na inilabas ng St. Luke's Medical Center (SLMC).

Anila, “This will help us ensure thorough screening of all people going inside our hospitals. At the same time, it serves as an added protection that gives further assurance that SLMC is a safe place for all.”

Sa ilalim ng bagong guidelines ay isang companion na lamang ang pinapayagang sumama at bumisita sa pasyenteng naka-admit sa ospital.

Kailangan din nitong magpakita ng negatibong resulta ng swab test na hindi hihigit sa tatlong araw. Kapag nagpositibo naman sa test ay kaagad itong dadalhin sa COVID operating rooms upang mabigyan ng paunang lunas at para hindi na makahawa.

“We request all to adhere to these guidelines temporarily set for the safety and protection of everyone. Be assured that we will inform the public when we are ready to implement the normal admission process again,” pahayag pa ng SLMC.

Ipinatupad ang bagong guidelines dahil sa paglobo ng kaso ng COVID-19, partikular na sa Metro Manila kung saan tinatayang 9,838 ang nadagdag na positibo kahapon.