Manila Bay rehab, binatikos… DENR sa UP experts: bayaran kayo

ni Ronalyn Seminiano Reonico | October 14, 2020

Sinopla ni Department of Environment and Natural Resources (DENR) Spokesperson Benny Antiporda nitong Miyerkules ang mga eksperto ng University of the Philippines (UP) na pumupuna sa Manila Bay beautification project.

Sa ginanap na televised briefing, nanawagan din si Antiporda sa Commission on Audit (COA) upang i-audit ang pondo na ibinibigay umano ng DENR sa UP Marine Science Institute.

Aniya, “Base po sa pag-aaral ng inyong lingkod, kalahating bilyon po ang binayaran namin sa kanila simula 2016 hanggang taong ito. Kalahating bilyon na puro lang po konsultasyon, wala pong infrastructure, walang lahat. ‘Yan ‘yung binayaran natin sa UP [experts] na ‘yan.

“We are now calling the attention of the Commission on Audit to conduct an audit against the UP, especially UP Marine Science Institute.”

Pahayag pa ni Antiporda, “Ang UP po sa buong pagkakaalam natin ay libre dapat ‘yan, ano po? Bakit kayo naniningil sa gobyerno? Matapos kayong pag-aralin ng taumbayan, pagkatapos kayong maging scholar ng taumbayan, sisipsipin n’yo ang dugo ng taumbayan sa dami ng kinuha ninyong pondo?

“Tapos ngayon, gumagawa kami ng maganda, kailangang magbayad kami sa inyo? ‘Wag naman. Hindi n’yo karapatang batikusin ito dahil bayaran kayo. ‘Yun lang po ang masasabi ko sa UP. Uulitin ko, bayaran kayo.”

Iminumungkahi rin umano ng UP Diliman Institute of Biology na imbes na crushed dolomite ang ilagay sa Manila Bay ay mga mangroves na lamang ngunit ni-reject ito ng DENR dahil makasisira umano ito sa “landscape” ng tourist spot.

Saad ni Antiporda, “You cannot put it in the middle of baywalk area where it will destroy the landscape, hindi po magandang tingnan. And at the same time, hindi po mabubuhay sa lugar na ito ‘yung mangrove.”

DENR, binuweltahan… Dolomite sand sa Manila Bay, sablay! — UP-MSI

ni Ronalyn Seminiano Reonico | October 14, 2020

Nagsalita na ang head ng University of the Philippines Marine Science Institute (UP-MSI) sa naging pahayag ni Department of Environment and Natural Resources (DENR) Spokesperson Benny Antiporda nitong Miyerkules sa kalahating bilyong binayaran umano ng ahensiya sa kanila simula 2016.

Matatandaang sinabi ni Antiporda na ang kalahating bilyong pisong ibinayad umano ng DENR sa UP-MSI mula noong 2016 ay puro sa konsultasyon lamang daw napunta at wala pang infrastructure.

Saad naman ni Dr. Laura David, director ng UP-MSI, "Malamang po, hindi familiar si Usec. sa contract service ng UP. Sa tingin niya, consultancy ito. Ang katotohanan ay service contract po.

"Ibig sabihin noon, karamihan ng pera na naipadala ng DENR ay para sa pananaliksik, field work, laboratory work na kinailangan naming gawin para matugunan ang mga katanungan ng DENR."

Depensa pa ni David, "Kahit na anong ginagawang paglalagay ng lupa sa tabing-dagat, dapat maagap ang pananaliksik dahil puwedeng may maling puwesto, puwedeng maling materyal na ginagamit. Ang nangyayari, kapag ganoon, nagiging magastos ang pag-a-upkeep ng isang lugar.”

Inayunan din nito na hindi akma ang dolomite sand sa Manila Bay.

Saad ni David, "Ang puwesto na pinili na paglagyan ng dolomite o extension ng beach, isa po itong lugar kung saan nagsasalpukan ang dalawang current o dalawang daloy ng tubig sa Manila Bay. "'Pag ganito pong lugar, mas madali siyang masira... 'Pag pumunta kayo sa bawat beach, mari-realize n'yo na iba't ibang klaseng sand ang nakalagay.

Kagaya ng Boracay sand, pino; Batanes beach, mabato. Kasi po, bawat isang lugar, iba ang lakas ng alon na humahampas. Kapag mali ang sand na inilagay, madali siyang mae-erode. Sayang lang ang investment kapag ganoon."

Dagdag pa niya, "Magastos po iyang location pong iyan... Typically po na ang ganito pong type ng projects, matagal na po ang limang taon bago ma-wash out. Kung minsan, isang bagyo lang bago siya ma-wash out.”

Pahayag din ni David, "Ayaw po naming masira ang aming relationship na matagal na sa DENR. We really think it's just a misunderstanding on his part... Hindi lang niya alam ‘yung mga kontrata, and I think we can clear this out."

J&J COVID-19 vaccine trials, inihinto

ni Ronalyn Seminiano Reonico | October 13, 2020

Inanunsiyo ng Johnson & Johnson ang pansamantalang paghinto ng kanilang COVID-19 vaccine candidate clinical trials matapos magkaroon ng “unexplained illness” ang isang study participant.

Pahayag ng J&J, "We have temporarily paused further dosing in all our COVID-19 vaccine candidate clinical trials, including the Phase 3 ENSEMBLE trial, due to an unexplained illness in a study participant."

Ayon sa J&J, ang serious adverse events (SAEs) ay "an expected part of any clinical study, especially large studies."

Inihinto ng naturang kumpanya ang trial upang alamin kung ang SAE ay may kaugnayan sa ginamit na COVID-19 vaccine.

Pansamantala ring itinigil ang online enrollment system para sa J&J Phase 3 trial na nagsimulang kumalap ng mga participants noong Setyembre. Layunin ng J&J na magkaroon ng 60,000 volunteers para sa naturang clinical trial.