PhilHealth, nagbayad na ng P700M sa Red Cross, utang, halos P4M na lang

ni Ronalyn Seminiano Reonico | November 8, 2020

Nagbayad ang Philippine Health Insurance Corporation (PhilHealth) ng P700 million sa utang nito sa Philippine Red Cross (PRC) at P377 million na lamang ang balanse.

Saad ni PhilHealth spokesperson Rey Baleña, “Ang atin pong naibayad na sa kabuuan sa Red Cross ay P700 million. Lalabas po sa huling pronouncement ng Red Cross ang balanse pa natin ay mga P377 million pa.”

Matatandaang inihinto ng PRC ang pagsasagawa ng COVID-19 swab testing dahil sa P930 million utang ng PhilHealth.

Nagpapasalamat naman si Baleña na itinuloy na ng PRC ang COVID-19 testing operations matapos makapagbayad ng PhilHealth ng tinatayang P500 million noong October 27.

Duterte, binati si Joe Biden sa pagkapanalo bilang US President

ni Ronalyn Seminiano Reonico | November 8, 2020

Binati ni Pangulong Rodrigo Duterte si Joe Biden sa pagkapanalo nito sa United States presidential election noong Sabado, ayon kay Presidential Spokesperson Harry Roque.

Saad ni Roque, "On behalf of the Filipino nation, President Rodrigo Roa Duterte wishes to extend his warm congratulations to former Vice President Joseph 'Joe' Biden on his election as the new President of the United States of America.”

Aniya, pagtitibayin pa ng Pilipinas at United States ang bilateral relations sa ilalim ng administrasyon ni Biden.

Aniya, "The Philippines and the United States have long-standing bilateral relations and we are committed to further enhancing the relations with the United States under the Biden administration.

"We look forward to working closely with the new administration of President-elect Biden anchored on mutual respect, mutual benefit, and shared commitment to democracy, freedom and the rule of law.

"Congratulations and we wish him all the best.”

Pekeng gamot, kalat na

ni Ronalyn Seminiano Reonico | November 8, 2020

Nagbabala ang Food and Drug Administration (FDA) sa publiko sa pagdami ng mga pekeng over-the-counter na gamot na maaaring magdulot ng masamang epekto sa kalusugan.

Paalala ni FDA Director General Eric Domingo, bumili ng gamot sa mga lisensiyadong establisimyento lamang matapos makumpirma na may mga pekeng gamot na gumagamit ng pangalan ng apat na popular brands.

Ang mga ito ay ang Ponstan (mefenamic acid, 500 mg tablet), Diatabs (loperamide, 2 mg capsule), Solmux (carbocisteine, 500 mg capsule) at Neozep Forte (phenylephrine HCl/chlorphenamine maleate/paracetamol, 2 mg/10 mg/500 mg tablet).

Ang lot numbers ng mga pekeng gamot ay: 429-30228A (na may expiration date na September 2024) sa Ponstan; U018407 sa Diatabs; U089493 sa Solmux; at U261217 sa Neozep Forte.

Ayon sa FDA, hindi akma ang logo at security mark ng mga pekeng gamot sa mga authentic drug na rehistrado.

Saad ni Domingo, “All health-care professionals and the public are being warned against the proliferation of these fake medicines in the market which may cause adverse health effects to its users. All establishments are likewise being warned not to sell these counterfeit medicines.”

Nanawagan din si Domingo sa mga local official at law enforcement agencies na kumpiskahin ang mga pekeng gamot.