Paglabag sa health protocols, maliit na bagay daw... PDu30: Sinas, pardon na!

ni Ronalyn Seminiano Reonico | November 14, 2020

Dinepensahan ni Pangulong Rodrigo Duterte si Philippine National Police (PNP) Chief Police General Debold Sinas sa kontrobersiyal nitong mañanita sa kaarawan nito noong Mayo dahil sa alegasyong paglabag nito sa mass gatherings at social distancing rules.

Sa isang video clip na inilabas ng Palasyo, saad ni P-Duterte, “Alam mo kasi ‘yang mañanita, it’s a religious, almost a religious ritual. Nakaugalian na talaga ng mga Pilipino. Hindi kasalanan ng pobreng Sinas na ‘yan na pumunta sila roon, hindi naman niya alam.

“At kung may kasalanan siya roon, pardon na siya. Wala akong nakitang kasalanan na masama na may moral implications, may kasamang malisya, wala.”

Depensa pa ni P-Duterte, “Hindi naman kailangang maglabas siya roon ng mga mask. It happened. Well, it was bad na ‘yung mga pumunta roon, hindi nila inisip. But dahil naman sumusunod lang sila sa almost religious practice of mañanita.

“We sing a person a happy birthday and wishing para naman i-endear ng tao sa trabaho niya at sa buhay niya. Maliit na bagay ‘yun.”

Nag-b-day party nu'ng lockdown... Sinas, 'di lusot sa kaso kahit PNP Chief na

ni Ronalyn Seminiano Reonico | November 10, 2020

Itinalaga bilang bagong Philippine National Police (PNP) Chief si Police Major General Debold Sinas noong Lunes ngunit hindi umano ito ligtas sa isinampang kasong kriminal laban sa kanya sa alegasyong paglabag sa quarantine protocols, ayon sa Malacañang.

Kinasuhan si Sinas sa Taguig City Prosecutor’s Office dahil sa naganap na mass gathering noong Mayo sa kanyang kaarawan kahit na ipinagbabawal pa ito dahil sa COVID-19 pandemic.

Saad ni Presidential Spokesperson Harry Roque, “The appointment of course will have no bearing on the decision of the Taguig Prosecutor’s Office.”

Nilinaw din ni Roque na hindi ibinasura ang kasong administratibo laban kay Sinas.

Ayon din kay Roque, itinalaga ni Pangulong Rodrigo Duterte si Sinas bilang PNP Chief dahil umano sa kontribusyon nito sa giyera kontra-droga.

Saad pa ni Roque, “And let’s see after six months [if] he will inspire people.”

Si Police General Camilo Cascolan ang pinalitan ni Sinas sa puwesto.

4 patay sa riot sa Bilibid

ni Ronalyn Seminiano Reonico | November 10, 2020

Umakyat na sa apat ang bilang ng mga namatay sa naganap na riot sa loob ng New Bilibid Prison noong Lunes, ayon sa Department of Justice (DOJ).

Ayon kay Undersecretary Emmeline Aglipay-Villar, hindi pa pinapayagang lumabas sa kani-kanyang dorm ang mga preso.

Aniya, "Only orderlies are allowed to roam.”

Unang iniulat ng awtoridad ang 3 bilang ng mga namatay at 64 ang sugatan sa riot sa pagitan ng Sputnik at Commando gangs noong Lunes nang umaga, isang buwan matapos ang riot ng dalawang grupo na ikinamatay ng siyam na preso.

Samantala, pinaiimbestigahan na ni Justice Secretary Menardo Guevarra ang naturang insidente upang malaman kung mayroong pagkukulang ang mga opisyal ng Bureau of Corrections.