Mga pasaway na tiangge, ipapasara — M'cañang

ni Ronalyn Seminiano Reonico | November 24, 2020

Binantaang ipasasara ng Malacañang ang mga tiangge na hindi susunod sa minimum public health standards ngayong patuloy ang paglaban ng bansa sa COVID-19.

Nagbabala si Presidential Spokesperson Harry Roque matapos magkumpulan ang mga mamimili sa Divisoria, Manila at Baclaran dahil sa Christmas rush at karamihan umano ay hindi sumusunod sa physical distancing.

Aniya, “Pupuwede naman pong limitahan iyong mga pumapasok sa mga tiangge, kinakailangan lang magkaroon ng special entry at exit point. “Kapag hindi po kayo nag-control ng crowd, baka maipasara kayo, lalo kayong mawawalan ng negosyo.”

Paalala naman ni Roque sa mga mamimili, “Alam nating kinakailangang mamili para sa Pasko pero ingatan naman natin ang ating mga sarili hindi lang para sa hanapbuhay kung hindi para tayo ay magkaroon ng maligayang Pasko dahil kapag kayo ay nagkasakit, nasaan ang Merry Christmas?”

Poultry products mula sa Kagawa, Japan, banned sa ‘Pinas

ni Ronalyn Seminiano Reonico | November 23, 2020

Pansamantalang ipinagbawal ng Department of Agriculture ang importasyon ng poultry products mula sa Mitoyo City, Kagawa, Japan dahil sa H5N8 highly pathogenic avian influenza (HPAI) outbreak.

Ipinag-utos ni Agriculture Secretary William Dar ang pagbabawal sa importasyon ng domestic at wild birds at poultry meat, mga sisiw, at itlog.

Suspendido rin ang processing at evaluation ng application at issuance ng sanitary and phytosanitary (SPS) import clearance sa Japan.

2 construction workers, patay, 1 sugatan sa nalaglag na metal beams sa QC

ni Ronalyn Seminiano Reonico | November 23, 2020

Patay ang dalawang construction workers at isa ang sugatan matapos malaglagan ng metal beams sa isang construction site ngayong Lunes nang umaga sa Calamba St., Brgy. Sto Domingo, Quezon City.

Kinilala ng QC Police District (QCPD) Station 1 ang mga nasawing trabahador na sina Arnel Esquitado at Rex Dela Rosa at si Richard Gregorio naman ang sugatan sa insidente.

Ayon sa nakasaksi sa insidente, na-dislocate umano ang equipment na nagbubuhat sa metal beams.

Agad na isinugod sa ospital ang mga biktima ngunit idineklarang dead on arrival.

Patuloy pa ring iniimbestigahan ng awtoridad ang insidente.