Panelo, kinuhang adviser... "Kailangan ko ng pambato sa usapin ng batas" – Robin

ni Zel Fernandez | May 13, 2022

Kasabay ng napipintong pagkahalal ng nangunguna sa bilangan sa pagka-senador na si Robin Padilla, kinuha nito si Atty. Salvador Panelo na maging legislative assistant, adviser, at mentor sa oras na maupo na ang aktor-pulitiko sa Senado.

Sa Facebook post ni Padilla, aminado itong hindi magiging madali ang pagpapalit ng Saligang Batas kaya kailangan umano niya ng pambato sa usapin ng batas.

Pahayag ni Padilla, "Bismillah. Kailangan ko ng pambato sa usapin ng batas pagdating sa senado. Ang pagpapalit ng saligang batas ay hindi magiging madali sapagkat ang babanggain nito ay ang kasalukuyang naghaharing mga oligarko nakakubli sa 1987 constitution. Hindi man kami nagtagumpay ni idol Salvador Panelo na maging magkasama sa senado, isa lang ang sinigurado namin dalawa: Walang mababago sa aming adhikaing pagbabago. Walang makakapigil sa rebolusyon”.

Karugtong ng naturang post ay, “Si SALVADOR PANELO ang aking legislative consultant, adviser at mentor. Walang tatalo kay sal panalo panelo! Mabuhay ang parliamentaryo. Mabuhay ang Federalismo. Mabuhay ang PDP laban. Mabuhay ang Pilipino. Mabuhay ang inangbayan Pilipinas".

Agad namang tumugon si Panelo sa naturang Facebook post ni Padilla at nagpahayag ng pagtanggap sa alok ng mauupong senador na maging katuwang nito sa pagsusulong ng mga adhikain at iba pang plataporma sa Senado.

Ani Panelo sa kanyang FB comment, “Maraming salamat Sen. Robin Padilla! Isang karangalan na patuloy na maglingkod sa bayan bilang katuwang mo na pinagkatiwalaan ng 26 milyong Pilipino! Makaasa ka na ibubuhos ko ang aking sarili para tulungan kang palitan ang Saligang Batas para wakasan na ang bulok na sistema na bumibilanggo sa ating bansa."

“Marami ding salamat sa pangako mo na pagsulong sa mga panukalang batas para sa children with special needs/ disabilities. Dahil dyan ay parang nanalo na din ako!” pagtatapos ni Panelo.

Samantala, nauna nang nabanggit ni Binoe sa mga naging panayam sa kanya na isa sa mga platapormang nais nitong isulong kapag ganap nang senador ay ang Federalismo.

Kung si Mariel, branded lahat… ROBIN, WA' PAKI KAHIT CHEAP ANG SAPATOS AT DAMIT

ni Erlinda Rapadas - @Teka Nga | April 23, 2022

Hats-off kay Robin Padilla ang comedian-financial adviser-vlogger na si Chinkee Tan. Bilib na bilib si Chinkee sa pagiging simple at kuripot ni Binoe. Napanood kasi niya ang vlog ni Mariel Padilla kung saan binanggit nito na hindi brand conscious si Robin pagdating sa kanyang mga gamit.

Kahit na anong klaseng brand ng t-shirt, kahit na mumurahin at sa palengke lang binili ay isinusuot ng kanyang mister.

Maging sa mga sapatos ay hindi rin mapili si Robin. Basta komportable siya sa suot na sapatos ay hindi mahalaga kung locally made ito.

Ganu'n kasimpleng mamuhay si Binoe at hindi siya ang tipo na gagastos nang malaki para lang sa mga branded t-shirts at sapatos.

Para kay Chinkee Tan, maganda ang attitude na ito ni Robin Padilla sa kanyang buhay. Hindi siya maluho at hindi katulad ng ibang sikat na artista na ipinagyayabang na puro imported at branded ang mga gamit.

At maging sa pagkain ay simple lang ang gusto ni Robin Padilla. Masang-masa pa rin siya.

Kaya tiyak na malaking impluwensiya siya kay Mariel na mahilig magbibili noon ng mga branded na gamit, bagama't hindi naman pinipigilan ni Robin ang misis na mag-shopping ng mga bagay na gusto nito.

Kaya may "K" daw mag-senador… ROBIN, IPINAGMALAKING GALING SA ANGKAN NG MGA PULITIKO

ni Erlinda Rapadas - @Teka Nga | April 19, 2022

Ilang beses nang tumanggi si Robin Padilla na pumasok sa political arena at tumakbo sa anumang posisyon. Ilang eleksiyon na ang nagdaan na inaalok siya ng malalaking grupo upang kumandidato.

Ramdam kasi ng lahat ang lakas ng karisma sa tao ng tinaguriang 'Bad Boy' ng Philippine Cinema. Maraming kalalakihan ang umiidolo kay Robin dahil sa kanyang superhero image.

Likas na mabait, humble at matulungin sa kapwa si Binoe. Bukas-palad siya kung mag-share. Tumutulong siya nang walang hinihinging kapalit.

Marami ang natuwa nang tanggapin ni Robin ang alok upang mapasama siya sa line-up ng mga senatoriables ng BBM-Sara Duterte UniTeam. Pero, kaliwa't kanan ang banat sa kanya ng mga bashers. Nilalait siya at pinagtatawanan. Wala raw “K” maging senador si Robin dahil wala naman siyang natapos na kurso at kapos sa kaalaman.

Well, sa halip na magalit at mapikon ay naglitanya si Robin sa background ng angkang Padilla. Ang kanyang yumaong ama na si Roy Padilla ay naging gobernador ng Camarines Norte. Mahal na mahal ng kanyang mga kapwa Bikolano si Roy Padilla.

Kamag-anak din nina Robin ang dating senador na si Ambrocio Padilla. Tubong-Nueva Ecija ang mga Padilla, pero ang iba ay nasa Baguio at Bikol.

Related din sina Robin sa aktor na si Jose Padilla, Jr.. Sa mga artista, kamag-anak nina Robin sina Rudy Fernandez, Zsa Zsa Padilla, Amy Perez at Daniel Padilla.

Marami ang nagsasabing ang destiny sa pulitika ni Binoe ay nakatakda at nakaguhit sa kanyang kapalaran. Siya ang magtutuloy ng legacy ng mga Padilla sa political arena.