Pagmumulta sa motoristang walang RFID at load sa Oct. 1 pa

ni Ryan Sison @Boses | August 28, 2024

Matagal-tagal pang makakahinga ng maluwag ang mga motoristang walang RFID stickers o walang sapat na load sa toll gates dahil hindi pa sila pagmumultahin ngayong katapusan ng buwan. 

Ayon kay Department of Transportation (DOTr) Secretary Jaime Bautista, ipinagpaliban niya ang pagpapatupad ng revised guidelines sa mga toll expressway sa October 1 sa halip na sa August 31. 

Ang revised guidelines, na nakasaad sa Joint Memorandum Circular (JMC) 2024-01, ay nilagdaan nina Bautista, Land Transportation Office (LTO) Assistant Secretary Vigor Mendoza II, at Toll Regulatory Board (TRB) Executive Director Alvin Carullo noong August 1.

Sinabi ni Bautista na ang pagpapaliban sa pagpapatupad ng naturang memorandum ay makakatulong sa pagbibigay ng mas maraming oras sa mga tollway para ipaalam sa taumbayan ang bagong guidelines.

Gayundin aniya, umaasa sila na gagamitin ng mga kinauukulang ahensya at mga tollway operator ang 30-araw na pagpapaliban para maisaayos ang mga operasyon ng expressway at higit pang paigtingin ang public information campaign upang bigyang-daan ang mga tollway users na sumunod sa mga bagong alituntunin.

Nakasaad din sa naturang memo na ang mga motorista ay dapat mag-apply para sa isang electronic toll collection device gaya ng isang RFID tag, na ikakabit ito sa kanilang mga sasakyan, at tiyakin na ang kanilang mga account ay may sapat na balance para pambayad sa kanilang mga toll fee. 

Ang pagpasok sa isang tollway na walang RFID sticker ay pagmumultahin ng P1,000 para sa first offense, P2,000 para sa second offense, at P5,000 para sa mga sumunod na paglabag. 

Habang ang paglabas sa toll expressway na walang sapat na balance o load para ipambayad dito ay pagmumultahin ng P500 para sa first offense, P1,000 para sa second offense, at P2,500 para sa mga susunod na paglabag. 

Sinabi naman ng TRB na dahil dito ay umaasa silang mapapabuti ang daloy ng trapiko sa mga toll plaza, at bilang paghahanda na rin sa kanilang transition para sa cashless transactions.

Marahil, mahaba-haba na rin ang isang buwan na palugit para magawa ng maraming motorista na magkaroon ng sariling RFID at malagyan din ng load kung wala pa sila nito hanggang ngayon.

Hindi naman kasi libre ang pagpasok sa mga expressway na talagang mabilis ang mga biyahe.

Sadyang lang may mga makukulit na mga motorista na nagpapatay-malisya at ayaw agad kumilos, na gusto pa atang magmulta nang magmulta.

Kaya sana dahil sa na-postpone na ang pagpapatupad ng nasabing guidelines, samantalahin na lang natin na maisaayos ang kinakailangan sa pagpasok natin sa mga toll expressway para hindi na rin tayo magkaroon pa ng anumang problema.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

MPTC, umapela kay Gatchalian sa suspensiyon ng RFID system

ni Thea Janica Teh | December 7, 2020

Umapela ngayong Lunes ang Metro Pacific Tollways Corp. (MPTC) kay Valenzuela City Mayor Rex Gatchalian na i-reconsider ang suspensiyon ng implementasyon ng RFID system na naging sanhi ng matinding traffic sa lungsod.

Nitong Biyernes, binigyan ni Gatchalian ang NLEX Corp. ng 24 oras upang makapagpasa ng action plan at 72 oras para maipaliwanag kung bakit hindi dapat suspendihin ang kanilang business permit.

Nag-request ang NLEX Corp. na gawin itong 15 araw ngunit hindi ito tinanggap ni Gatchalian.

Ayon kay MPTC Chief Communication Officer Junji Quimbo, iginagalang umano nila ang karapatan ng pamahalaang lokal at tinitingnan na nila kung paano makakasunod.

Bukod pa rito, humingi na rin ng pasensiya ang NLEX Corp. sa mga residente ng Valenzuela at sinabing bukod sa RFID system, dahilan din ng matinding traffic ang papalapit na Kapaskuhan.

Sa ngayon, inaayos na at pinaplano na ng NLEX Corp at San Miguel Corp na siyang nag-o-operate sa South Luzon Expressway ang implementasyon ng RFID system.

RFID, binantaang ayusin, dahil sa traffic... Gatchalian sa NLEX: Bawal maningil!

ni Lolet Abania | December 7, 2020

Pinagsabihan ni Valenzuela City Mayor Rex Gatchalian ang pamunuan ng North Luzon Expressway (NLEX) na dapat humingi ng paumanhin o magdeklara na lamang ng isang toll holiday ang kumpanya dahil sa kaguluhang idinulot ng pagpapatupad ng kanilang RFID cashless payment system.

"The least NLEX can do is one, publicly apologize to the riding general public. Two, while fixing its RFID system --- toll holiday muna," post sa Facebook ni Gatchalian ngayong Linggo. "Walang singilan hanggang mai-deliver nila ang maayos na service sa mga toll plaza nila," sabi pa ng alkalde.

Matinding traffic ang nangyari sa mga toll plazas sa NLEX simula nang ipinatupad ang cashless payment system noong December 1 kasabay ng ibinigay na mandato ng Department of Transportation (DOTr). Punumpuno ng mga sasakyan at napakahabang traffic sa mga lugar na malapit sa Karuhatan sa Valenzuela City dahil sa RFID sa toll gate ng lungsod.

Ayon naman sa Toll Regulatory Board, ang dami ng mga sasakyan na naipon sa expressway ay tinatawag nilang “birth pain.” Anila, ang ilang lanes ng NLEX toll plaza ay para sa mga sasakyang mayroon nang RFID, habang ang iba ay sa installation ng RFID stickers.

Gayunman, noong Biyernes, nagpadala ng sulat si Gatchalian sa NLEX Corporation chief operating officer na si Raul Ignacio, kung saan binibigyan ng lokal na pamahalaan ng Valenzuela ang kumpanya ng 24-oras matapos na matanggap nila ang sulat, upang magsumite ng kopya ng kanilang gagawing plano para agad na malutas ang kaguluhan sa RFID.

Nakasaad din sa sulat na hinihingan ang NLEX Corp. ng 72-oras pagkatanggap nito ng paliwanag kung bakit ang kanilang business permit ay hindi dapat suspendihin. Sinagot naman ng kumpanya kahapon, December 5, ang sulat na pinirmahan ng presidente at general manager na si J. Luigi Bautista, kung saan humihingi ito ng 15-araw upang matugunan ang hinihiling na ito ni Gatchalian.

Ayon kay Bautista, nagtalaga na sila ng grupo na magsusumite ng rekomendasyon para maisaayos ang problema sa RFID sa lungsod. Inimbitahan din ng kumpanya si Gatchalian sa isang structured observation at bibisita sa toll plazas sa NLEX kasama ang mga TRB representatives.