Itinaas sa Alert Level 4.. Mandatory repatriation ng mga Pinoy sa Ukraine, ipapatupad — DFA

ni Lolet Abania | March 7, 2022

Itinaas na ng Department of Foreign Affairs (DFA) ngayong Lunes ang crisis alert level sa Ukraine sa Alert Level 4 habang tumitindi ang pananakop ng Russia sa naturang bansa.

Sa ilalim ng Alert Level 4, ipapatupad ng DFA ang mandatory evacuation ng mga Pilipino sa Ukraine, kung saan gastos ito ng gobyerno.

“Due to the rapidly deteriorating security situation in Ukraine, the Department of Foreign Affairs has raised the crisis alert level for all areas in Ukraine to Alert Level 4 (Mandatory Repatriation),” batay sa inilabas na pahayag ng DFA ngayong Lunes.

Gayundin, ang mga Pinoy sa Ukraine ay aasistihan ng Philippine Embassy in Poland.

“Filipinos in Ukraine will be assisted by the Philippine Embassy in Poland and the Rapid Response Team, which are currently assisting Filipino nationals for repatriation and relocation,” ayon sa DFA. Marami na ring Pilipino ang nakabalik na ng bansa habang ang iba ay nakuhang makatakas doon patungo sa kalapit na mga bansa.

Una nang sinabi ng DFA na may nananatili pa na tinatayang 116 Pinoy sa Ukraine. Ayon kay DFA Undersecretary Sarah Arriola, hanggang nitong Huwebes, 93 Pilipino na ang umalis ng Ukraine mula sa 209 na naitalang bilang ng ahensiya. Aniya, may 45 Pinoy pa ang nananatili naman sa Kiev.

Repatriation ng OFWs mula sa Ukraine, naghihintay pa — OWWA

ni Lolet Abania | February 22, 2022

Sa kabila ng umiinit na tensyon sa pagitan ng Russia at Ukraine, hindi pa rin nagpapatupad ng mandatory repatriation ang pamahalaan para sa mga overseas Filipino workers (OFWs) na nasa Ukraine, ayon sa Overseas Workers Welfare Administration (OWWA).

Sa isang interview ngayong Martes kay OWWA Administrator Hans Cacdac, tinatayang may 380 Pilipino ang nasa Ukraine, kung saan marami sa kanila ang naninirahan sa kapitolyo ng Kyiv.

Una nang naiulat na limang Pinoy na, kabilang ang isang sanggol, ang dumating sa bansa na mula sa Ukraine.

Gayunman, ayon kay Cacdac, hindi pa inilalagay ng pamahalaan sa Alert Level 4 ang sitwasyon sa Ukraine, kaya wala pang ipinatutupad na mandatory repatriation o evacuation para sa mga OFWs.

“Sa ngayon, ang approach ay tila wait and see. Tingnan kung ano ang mangyayari. Hindi pa nakataas ang highest alert level sa panig ng pamahalaan natin, sa side ng DFA (Department of Foreign Affairs) at POEA (Philippine Overseas Employment Administration), so wala pang mandatory repatriation,” paliwanag ni Cacdac.

Subalit, sinabi ng opisyal na handa namang tulungan ng Philippine Embassy sa Warsaw ang mga Pinoy sa Ukraine na nagnanais nang umuwi ng bansa.

“Sa huling pagkakaulat sa atin, ay may dalawa na nag-express ng interest na makauwi. Other than that, hindi pa natin nakikita ‘yung tinatawag na mass repatriation dito sa Ukraine,” sabi ni Cacdac.

Samantala, patuloy ang babala ng United States na posibleng salakayin ng Russia ang kalapit na bansa nitong Ukraine.

Batay sa report nitong Lunes (oras sa Russia), inatasan na ni Russian President Vladimir Putin ang kanyang militar na magtungo sa Donetsk at Lugansk, dalawang breakaway regions sa eastern Ukraine, makaraang kilalanin nito ang pagiging “independent” ng mga naturang lugar mula sa Ukraine.

Tiniyak naman ni Cacdac sa publiko na handa ang gobyerno sakaling isagawa na ang evacuation o repatriation para sa mga OFWs na nasa Ukraine.

“We will be ready. We stand ready, of course. This is not the first time that we will be doing this. Meron na ‘yang mga identified relocation points, exit points,” sabi pa ni Cacdac.

Nanawagan din ang opisyal na dapat na magtiwala sa political at security assessment na isinasagawa ng Philippine Embassy sa Warsaw patungkol sa estado ng mga Pinoy sa Ukraine.

“Kaya sila ang nandodoon para sila ang sumuri para sa atin. Siyempre iba pa ‘yung nasasagap natin sa balita, but our people on the ground will make the final call as to whether itataas ‘yung alert level. So far, ang assessment is hindi pa sapat para magkaroon ng Alert Level 4, ‘yung pinakamataas,” giit ni Cacdac.

32 Pinoy sa Afghanistan, pauuwiin na — DFA

ni Ronalyn Seminiano Reonico | August 16, 2021

Inilikas ang 32 Pilipino sa Afghanistan dahil sa lumalalang tensiyon matapos pasukin ng militanteng grupong Taliban ang capital city ng naturang bansa na Kabul.

Ayon sa Department of Foreign Affairs (DFA), inaayos at pinoproseso na ang pagpapauwi sa mga Pinoy na nananatili pa sa Kabul, Afghanistan.

Saad pa ng DFA, “The Department and its Foreign Service Posts in the region and beyond are exploring all avenues of cooperation and are closely coordinating with governments and international partners to guarantee their immediate and safe passage.”

Ang mga inilikas na 32 Pinoy ay kasalukuyan na umanong nasa Doha at naghihintay ng flights pauwi sa Pilipinas at mayroon pang 19 Pilipino na nakatakda nang umalis ng Afghanistan.

Una nang itinaas ng DFA ang Alert Level 4 sa Afghanistan dahil sa walang katiyakang seguridad sa bansa.

Samantala, nananawagan ang DFA sa iba pang mga Pinoy sa Afghanistan na makiisa sa isinasagawang repatriation effort ng ahensiya.

Saad pa ng DFA, kontakin lamang ang +923335244762 sa Whatsapp/Viber sa mga Pilipino na nangangailangan ng tulong.

Maaari rin umanong kontakin o i-message ang facebook.com/atnofficers.islamabadpe o facebook.com/OFWHelpPH at ang email na isbpeatn@gmail.com.