P2M halaga ng Remdesivir, nasamsam, 4 arestado

ni Lolet Abania | June 16, 2021

Arestado ng National Bureau of Investigation (NBI) ang apat katao dahil sa ilegal na pagbebenta ng tinatayang P2 milyong halaga ng Remdesivir, isang experimental drug para labanan ang COVID-19.

Kinilala ng NBI ang mga suspek na sina Maria Christina Manaig, Christopher Boydon, Philip Bales, at Bernard Tommy Bunyi. Ayon kay NBI officer-in-charge Eric Distor, nadakip ang mga suspek matapos makatanggap ang ahensiya ng impormasyon hinggil sa “laganap” na bentahan ng Remdesivir online.

Ang naturang gamot ay walang certificate of product registration sa Pilipinas kaya hindi dapat ito komersiyal na ibinebenta. Matatandaang pinayagan ang paggamit ng Remdesivir sa pamamagitan ng isang compassionate special permit (CSP) na inisyu ng Food and Drug Administration (FDA).

Ang CSP ay maaari lamang i-request ng mga doktor na in-charge o ng institusyon kung saan ang pasyente ay ginagamot, at siya ring may responsibilidad sa paggamit at pagbibigay ng Remdesivir dito.

Sinabi ni Distor, nagawang makipagtransaksiyon ng NBI Special Task Force sa mga suspek at maka-order sa kanila ng isang vial na nasa halagang P4,500 hanggang P5,000.

Agad na nagsagawa ang NBI-STF ng magkasabay na entrapment operations kahapon na nagresulta sa pagkakadakip sa apat na suspek sa West Avenue, Quezon City at Bunyi sa Timog Avenue, Quezon City.

Nakumpiska sa mga suspek ang nasa P1.8 milyong halaga ng Remdesivir. Sumailalim ang mga suspek sa inquest proceedings bago sampahan ng kaso sa Quezon City Prosecutor’s Office dahil sa paglabag sa Food and Drug Administration Act of 2009 at Philippine Pharmacy Act.

P1,500 na gamot kontra Covid, for sale ng P27 K, mga ospital iimbestigahan

ni Mary Gutierrez Almirañez | June 2, 2021

Iimbestigahan ng Department of Health (DOH) ang diumano’y overpricing ng gamot kontra COVID-19 na Remdesivir, ayon sa Chief ng DOH Pharmaceutical Division na si Dr. Anna Guerrero.

Aniya, "Meron pong resibo na ganu’n po ang nakasaad, minsan P15,000, P20,000, ang pinakamataas ata, P27,000."

Kaugnay ito sa reklamo ng mga pasyente na nagbayad ng mahigit P27,000, gayung nagkakahalaga lamang ng P1,500 hanggang P8,200 ang presyo ng Remdesivir.

Matatandaan namang ipinagbawal ng India kamakailan ang pag-e-export ng Remdesivir dahil sa lumalaganap na Indian variant sa kanilang bansa.

Paliwanag pa ni Dr. Guerrero, "Mahirap din kasi ang supply ngayon ng Remdesivir. Mayroon ding pandemic sa India. Mataas din ang kaso nila. In fact, mas mataas kaya nagkaroon ng export ban at nahihirapan din silang mag-sort ngayon."

Samantala, itinanggi naman ng DOH na maglalaan sila ng pondong P1 billion para ibili ng Remdesivir.

Sa ngayon ay nakikipag-ugnayan na rin ang DOH sa Department of Trade and Industry (DTI) upang imbestigahan ang overpricing ng gamot sa ilang ospital.

“Kasi imported po ito from India, hindi po ganu’n kataas. So, mukhang ang patong po talaga, mga ospital," dagdag pa ni Dr. Guerrero.

Remdesivir vs. COVID-19, wa' epek - WHO

ni Mary Gutierrez Almirañez | May 09, 2021

Maituturing na paglabag kung patuloy pa ring bibili ng Remdesivir ang Department of Health (DOH) sa kabila ng pagbabawal ng World Health Organization (WHO) na gamitin iyon kontra COVID-19 dahil sa lumabas na adverse events at limitadong bisa nito laban sa virus.

Ayon kay Representative Michael Defensor, “All further purchases of Remdesivir after the WHO came out with its adverse recommendation may be deemed as transactions highly detrimental to the government under the Anti-Graft and Corrupt Practices Act.”

Aniya, sa halip na bumili ng Remdesivir ay idagdag na lamang ang pondo nito sa pambili ng COVID-19 vaccines.

Paliwanag pa niya, “The problem with Remdesivir is its outrageous price, and yet, based on the findings of the WHO, the drug offers no significant relief to patients.”

Maaari ring masampahan ng criminal charges ang DOH officials o 10 taon na pagkakakulong kung patuloy pa rin silang bibili ng Remdesivir.