Pope Francis, nagbigay ng 100,000 euros para sa Odette relief operation — Vatican

ni Lolet Abania | January 19, 2022

Ipinahayag ng Vatican nitong Martes na nag-pledge si Pope Francis ng halagang 100,000 ($114,000) euros para sa relief efforts na isinasagawa ng Pilipinas, matapos ang hagupit ng Bagyong Odette noong Disyembre 2021.

Batay sa situation report ng National Disaster Risk Reduction and Management Council (NDRRMC), umabot na sa 406 ang nasawi dahil kay ‘Odette’ habang 65 na mga indibidwal ang nananatiling nawawala at 1,265 naman ang mga nasaktan.

Nagdulot ang Bagyong Odette ng malawakang pinsala sa mga probinsiyang dinaanan nito, gaya ng Surigao del Norte, Dinagat Islands, Cebu, at Palawan.

Ayon din sa NDRRMC, 2,335,757 pamilya ang apektado ng bagyo mula sa 11 rehiyon at 38 na lalawigan.

Matatandaan noong Disyembre, nagpahayag ng pagkabahala si Pope Francis sa mga Pilipino matapos bayuhin ng Bagyong Odette.

Isang mensahe ang ibinigay ng Santo Papa sa Twitter para sa mga apektado ng bagyo, na may nakalagay pang hashtag #PrayTogether.

“I express my closeness to the population of the Philippines, struck by a strong typhoon that has caused many deaths and destroyed so many homes,” post ni Pope Francis.

“May the ‘Santo Niño’ bring consolation and hope to the families of those most affected,” sabi pa niya.

Ayon pa anunsiyo ng Vatican, si Pope Francis ay nag-pledge rin ng 100,000 euros upang makatulong naman sa mga migrante na naharang sa mga border sa pagitan ng Poland at Belarus.

Kasama sa naipagkaloob na pera ang suporta para sa Catholic charity Caritas Poland, anila, “to deal with the migration emergency on the border between the two countries.”

Para sa mga binayo ni ‘Odette‘.. P8M halaga ng food packages, ibibigay ng China

ni Lolet Abania | December 21, 2021

Inanunsiyo ng gobyerno ng China ngayong Martes na magpapadala sila ng 20,000 food packages na nagkakahalaga ng P8 milyon para sa mga apektado ng Bagyong Odette.

Ayon sa Chinese Embassy, bawat package ay naglalaman ng 5 kilograms ng bigas, 10 canned food at 10 noodles packs, kung saan patungo na ang mga ito sa Cebu, Leyte, Negros Occidental, Bohol, Cagayan de Oro City, Surigao City, at Negros Oriental.

“Our hearts go out to all the Filipino families who were devastated by Typhoon Odette which has caused massive casualties as well as property loss,” batay sa isang statement.

“China will do its utmost to continue its firm support to the disaster relief efforts of the Philippine government and the Filipino people.”

May karagdagang 4.725 million kilograms ng Chinese government-donated rice ang kanila ring ipapadala sa mga lugar na labis na hinagupit ng bagyo.

Tinatayang nasa 1.5 million kilograms ang inilaan para sa Cebu, habang 3.225 million kilograms na nasa Manila ay nakatakdang i-transport sa iba pang apektadong lugar sa Visayas at Mindanao.

Bukod sa China, marami ring mga bansa gaya ng United States, France at Australia, ang nangako na magbibigay ng assistance para sa disaster relief operations ng gobyerno ng Pilipinas.

Bulok na bigas sa relief goods sa Catanduanes, inireklamo

ni Thea Janica Teh | November 17, 2020

Inulan ng reklamo ang Barangay Igang sa Catanduanes matapos makatanggap ang mga residente ng relief goods na puno ng bulok na bigas.

Ayon kay Igang Barangay Chairman Ronnie Clemente, noong ipinamimigay nila ang sako-sakong bigas, may bumalik na mga residente at ipinakita ang mga natanggap na relief goods.

Nakitang may amag na ang bigas, maitim na at mabaho kaya hindi na puwedeng kainin. Inipon umano ni Clemente ang lahat ng bigas at halos 40 plastic ang ibinalik sa kanila.

Agad namang itinanggi ni Virac Mayor Sinforoso Sarmiento na sa kanila galing ang bulok na bigas. Aniya, “Hindi po galing sa amin iyon kasi ang ipinamimigay namin ay puti ang balot hindi yellow. Tapos wala po kaming old stock, nawawalan nga kami ng stock eh… Sa amin po yung mga nagpa-pack, inaano namin na mag-check ng quality.”

Samantala, sinabi naman ng National Food Authority sa Catanduanes na mayroon umano itong ilang toneladang bigas na ipamimigay sana sa mga nasalanta ng bagyo ngunit nabasa ng ulan. Sa ngayon ay iimbestigahan na ng mga lokal na awtoridad ang nangyaring insidente.