Red tide alert

ni Mai Ancheta @News | August 28, 2023

Pinag-iingat ang mga mamamayan sa pitong lugar sa Western Visayas sa pagkain ng shellfish dahil sa red tide toxin.

Nagpositibo sa paralytic shellfish poison (PSP) o red tide toxin ang sample ng shellfish na kinuha sa pitong lugar.

Kabilang sa mga nakitaan ng red tide toxin batay sa inilabas na abiso ng Bureau of Fisheries and Aquatic Resources (BFAR) nitong August 26, ang Saplan Bay at Mambuquiao at Camanci sa Capiz at Aklan; baybayin ng Panay; Pilar; President Roxas; Roxas City; Gigantes Islands sa Iloilo; at karagatang sakop ng Altavas, Batan at New Washington sa Batan Bay, Aklan.

Nananatili pa ring kontaminado ng red tide toxin ang mga karagatan ng Dauis at Tagbilaran City sa Bohol na naunang idineklara ng BFAR, gayundin sa Dumanquilas Bay sa Zamboanga del Sur.

Nagbabala ang BFAR na hindi ligtas kainin ang lahat ng uri ng shellfish at alamang sa mga nabanggit na lugar.

Ang maaari lamang kainin ay ang isda, squid, hipon at talangka subalit kailangang hugasang mabuti ang mga ito, alisin ang mga lamanloob at hasang bago lutuing mabuti.

Red Tide Alert

ni Mai Ancheta @News | July 13, 2023

Binalaan ang publiko laban sa epekto ng red tide sa karagatang sakop ng Bohol at Zamboanga del Sur.

Naglabas ng red tide warning ang Bureau of Fisheries and Aquatic Resources nitong Miyerkules matapos magpositibo sa red tide ang water sample na kinuha sa karagatang sakop ng Dauis at Tagbilaran City sa Bohol gayundin sa Dumanquillas Bay sa Zamboanga del Sur.

Ang water sample ay nagtataglay ng Paralytic Shellfish Poison (PSP) o red tide toxin na lagpas sa pamantayan ng BFAR.

Hindi ligtas kainin ang lahat ng shellfish at alamang na nakukuha sa nabanggit na mga lugar dahil posibleng malagay sa panganib ang kalusugan.

Ang mga maaari lamang kainin habang may red tide ay isda, squid, hipon at alimasag subalit kailangang linisin at lutuing mabuti

Red Tide Alert

ni BRT| June 4, 2023

Nagbabala ang Bureau of Fisheries and Aquatic Resources (BFAR) na nakataas pa rin ang red tide warning sa 5 baybayin sa bansa.

Sa inisyung shellfish bulletin no.14 ng ahensya, ipinagbabawal ang pagkolekta at pagkain ng mga shellfish mula sa mga baybayin ng Dauis at Tagbilaran City sa Bohol, San Pedro Bay sa Samar, Dumanquilas Bay sa Zamboanga del Sur at Lianga Bay sa Surigao del Sur.

Ito ay matapos na lumabas na positibo sa paralytic shellfish poison (PSP) o nakalalasong red tide na lagpas sa regulatory limits ang samples mula sa nasabing mga baybayin.

Lahat ng shellfish at alamang na makukuha mula sa mga baybayin na ito ay hindi ligtas para sa human consumption.

Gayunman, ang ibang marine species gaya ng isda, pusit, hipon at alimango ay ligtas na kainin basta hugasang maigi at tanggalin ang hasang at bituka bago lutuin.