Quiapo church dinagsa sa unang araw ng Alert Level 2

ni Jasmin Joy Evangelista | November 5, 2021

Dumagsa ang mga magsisimba sa Quiapo Church ngayong unang araw ng alert level 2 sa Metro Manila.

Nataon ding Quiapo Day at unang Biyernes ng buwan ngayong araw.

Pinapayagan na ang hanggang 500 katao na fully vaccinated sa loob ng Quiapo Church dahil hanggang 50% na ang pinapayagan sa mga religious gathering sa Metro Manila.

Halos umabot hanggang Rizal Avenue ang pila ng mga tao sa lugar.

Mayroon namang distancing marks upang masunod pa rin ang minimum public health protocols.

Ngayong nasa Alert Level 4… Ilang paalala para sa magsisimba sa Quiapo ngayong Linggo

ni Jasmin Joy Evangelista | September 18, 2021

Nagpaalala ang pamunuan ng Quiapo Church para sa mga nais magsimba sa unang Sunday Mass habang nasa Alert Level 4 pa rin ang NCR.

Ayon kay Rev. Fr. Douglas Badong, parochial vicar ng Minor Basilica of the Black Nazarene, dapat ipakita ang vaccination card kung nais pumasok sa simbahan.

Mainam daw na may kopya ng retrato ng vaccine card sa cellphone. pero mas maganda anila kung nakalagay ito sa ID lace at nakasabit sa leeg.

Kung walang vaccination card ay maaaring tumayo sa gilid ng simbahan.

Mayroon din daw volunteers na hijos at iba pang nagsisilbi sa simbahan na katuwang nila sa pag-check ng pagsunod sa health protocols.

5 pasaway na deboto sa Quiapo, inaresto

ni Lolet Abania | June 4, 2021

Dinakip ng mga awtoridad ang limang deboto ng Itim na Poong Nazareno matapos ang ginawang paglabag ng mga ito sa health protocols sa Quiapo Church sa Maynila ngayong Biyernes.

Sa ulat, dumagsa ang mga deboto na nais makapasok ng simbahan dahil ngayong araw ang First Friday Mass.

Ayon kay Police Lieutenant Colonel John Guiagui ng Manila Police District, sabay-sabay ang pagdating ng mga mananampalataya mula sa iba’t ibang lungsod sa Metro Manila at karatig-lalawigan.

Agad namang binuwag ng mga operatiba ng Manila City Police ang pila ng mga ito kasabay ng paalala sa kanila na limitado lamang ang maaaring makapasok sa simbahan.

Subalit, may ilan pa rin na pasaway sa mga ito na nagresulta sa pagkakahuli sa limang deboto na hindi na binanggit ang pagkakakilanlan.

Ikinainis naman ni Police Major Aldin Balagat, commander ng Plaza Miranda Precinct, ang pagbabalewala umano ng mga deboto sa paulit-ulit nilang pakiusap na sumunod sa protocols, kung saan marami sa kanila ay nasa baba na ang face mask.

Paliwanag sa kanila ni Guiagui, ibinalik na nila ang sistemang “first come, first serve” kaya aarestuhin ang mga pasaway.

Hindi naman ikinulong ang limang deboto, subalit binigyan sila ng lecture sa pagsunod sa protocols at pinagsabihan ng mga awtoridad, habang ipina-blotter muna sila bago pinauwi.