Traslacion 2022, kanselado; online mass isasagawa — Mayor Isko

ni Jasmin Joy Evangelista | January 5, 2022

Walang Traslacion 2022 at walang pisikal na misa sa Pista ng Itim na Nazareno sa Enero 9, 2022 sa Quiapo Church, Manila, ayon kay Mayor Isko Moreno.

Magkakaroon lamang ng online mass para sa nasabing kapistahan.

Sa isang press conference, sinabi ni Moreno na pumabor ang management ng Quiapo Church sa pangunguna ni Monsignor Hernando Coronel na online masses lamang ang isasagawa.

"Ako po’y nagpapasalamat sa ating Monsignor Coronel ng Quiapo sa pagtugon nila sa pakiusap ng pamahalaang lungsod na wala muna tayong Traslacion ngayong taon na ito, at wala rin tayong physical mass, online mass lang tayo,” ani Moreno.

“Mabigat po sa kalooban ko na hindi tayo magmisa ng pisikal, alam natin nakagawian na natin ‘yan. Ipagpapasesnya po ninyo, ito’y para rin naman sa kaligtasan ninyo at ninyong mga anak o pamilya. Maraming salamat sa kaparian ng Quiapo. Uulitin natin, walang traslacion, walang physical mass, online mass tayo,” dagdag niya.

Nakiusap din ang alkalde sa mga deboto ng Itim na Nazareno, kabilang ang Hijos del Nazareno, na sana ay maintindihan ang sitwasyon ngayong taon dahil sa patuloy na pagtaas ng bilang ng kaso ng COVID-19 sa bansa.

Dahil sa restrictions, ipinagbabawal din ang pagdadala ng replica statues.

“Nauunawaan ko ang damdamin ng ating mga hijos, kahit ho kami, sa Bangkusay, meron din kaming Nazareno, nalulungkot ako na hindi natin magagawa ‘yong dati nating ginagawa,” pahayag pa ni Mayor Isko.

“Nakikisuyo ako, wag po ninyong dadalhin, mahigpit pong ipatutupad ang mga pag-iingat,” aniya pa.

Samantala, sinabi rin ni Moreno na magpapatupad ng liquor ban ang Manila City government mula 6:00 p.m. ng Jan. 8 hanggang 6:00 a.m. ng Jan. 10.

Quiapo Church, pansamantalang isasara mula Enero 3-6, 2022

ni Jasmin Joy Evangelista | January 3, 2022

Pansamantalang isasara sa publiko ang Minor Basilica of the Black Nazarene o mas kilalang Quiapo Church, mula Enero 3 hanggang 6, 2022.

Ito ay dahil sa muling pagsipa ng bilang ng kaso ng COVID-19 sa bansa.

Sa isang video advisory na ibinahagi ni Rev. Fr. Douglas Badong sa Facebook, hinikayat niya ang mga deboto na huwag muna pumunta sa simbahan sa nasabing mga araw.

"Mula January 3 hanggang January 6 ay hindi po muna natin pahihintulutan ang pagpasok sa loob ng simbahan ang mga deboto. Kung maari ay huwag na munang pumunta sa simbahan ng Quiapo," ani Badong.

Muling magbubukas ang simbahan sa Enero 7.

Ang three-day closure ng simbahan ay upang magsagawa ng disinfection bilang paghahanda sa nalalapit na kapistahan ng Itim na Nazareno.

"Ito ay pakikiisa ng Simbahan para maiwasan ang paglaganap ng hawaan ng COVID at makapagbigay-daan po tayo para sa paglilinis, pagdi-disinfect ng simbahan at ng paligid nito bilang paghahanda na rin natin sa napakahalagang araw para sa ating mga deboto," pahayag pa ni Badong.

Isinailalim ng gobyerno ang Metro Manila sa Alert Level 3 mula Enero 3 hanggang 15, 2022 dahil sa muling pagtaas ng bilang ng kaso ng COVID-19

Pagbabasbas ng mga replica ng Itim na Nazareno, sinimulan na

ni Jasmin Joy Evangelista | December 28, 2021

Sinimulan na kahapon ang taunang pagbabasbas sa mga replica ng Itim na Nazareno sa Minor Basilica of the Black Nazarene (Quiapo Church) sa Maynila.

Ayon kay Quiapo Church parochial vicar Fr. Douglas Badong, ginawang 3 araw ang pagbabasbas upang maiwasan ang dagsa ng mga deboto.

"Iyong dating 1 araw lang natin ginagawa, para maiwasan ang ating pagdidikit-dikit at masunod pa rin natin ang physical distancing, ay ginawa nating 3 araw," ani Badong.

Samantala, sinimulan na rin kahapon ang paglabas sa mga imahen ng Nazareno sa Quiapo Church para dalhin sa mga probinsiya.

"Nasa Atimonan, Quezon... at bukas naman ay bibiyahe iyong isang pa-north, papunta naman ng Baguio Cathedral," ani Badong.

Sa Disyembre 30 naman magkakaroon ng thanksgiving procession ang Nazareno sa rutang dinadaanan ng Traslacion.

Sa Disyembre 31, magsisimula naman ng alas-5 ng madaling araw ang mga Misa na idaraos kada oras hanggang alas-6 ng gabi.

Alas-8 ng gabi naman isasagawa ang Misa para sa bisperas ng Bagong Taon sa Quiapo Church.