Matapos ang 2 linggo… Quiapo Church muling binuksan sa publiko

ni Jasmin Joy Evangelista | January 30, 2022

Matapos ang dalawang linggong pagsasara dahil sa COVID-19, muling binuksan sa publiko ang Minor Basilica of the Black Nazarene o Quiapo Church sa Maynila.

Nasa 30% capacity lamang ang papayagan sa loob ng simbahan habang 50% naman sa labas.

Tuloy pa rin ang online mass na mapapanood ng mga deboto sa Facebook account ng simbahan.

"Patuloy pa rin na pinapaalala namin sa mga pupunta dito sa Quiapo na meron pa ring virus. Patuloy pa rin tayong dapat makiisa at mag-ingat. 'Yung mga basic protocols ay huwag kakalimutan... kahit anong alert level," ani Fr. Douglas Badong, parochial vicar ng Quiapo Church sa isang panayam.

Matatandaang halos buong buwan ng Enero ay sarado ang simbahan dahil ipinagbawal rin ang mga prusisyon at iba pang aktibidad nitong Traslacion ng Poong Nazareno dahil sa dami ng mga nagkakasakit ng COVID-19.

Quiapo Church mananatiling sarado hanggang Jan. 26

ni Jasmin Joy Evangelista | January 15, 2022

Mananatiling nakasara ang Minor Basilica of the Black Nazarene o mas kilalang Quiapo Church hanggang Jan. 26, 2022 dahil sa patuloy na pagtaas ng bilang ng kaso ng COVID-19 sa bansa.

Muling isinara ang Quiapo Church noong Jan. 13, ayon kay Quiapo parish priest Msgr. Hernando Coronel.

Ayon kay Coronel, ang mga misa at devotions ay mapapanood via Facebook live.

Sinabi naman ni Douglas Badong, ang parochial vicar ng Quiapo Church, na isinara ang simbahan para sa disinfection matapos magpositibo sa Covid ng mga staff members nito.

“For sanitation, and for sensitivity na din dahil sa pagtaas ng cases, inaalala din namin ang staff at volunteers namin ang nagkaka-COVID,” pahayag ni Badong.

“Pwede naman pong mas iklian kapag bumaba pa ang kaso sa mga susunod na araw,” dagdag niya.

Ngayong Traslacion 2022… Mga deboto, hindi dumagsa sa Quiapo Church

ni Jasmin Joy Evangelista | January 8, 2022

Sa pambihirang pagkakataon, walang mga deboto sa Quiapo Church para sa Pista ng Itim na Nazareno ngayong Linggo.

Matatandaang sinuspende ang pagdaraos ng mga pisikal na aktibidad, kabilang ang mga misa, sa Quiapo Church bilang pag-iingat ngayong tumaas na naman ang bilang ng kaso ng COVID-19 sa bansa.

Bagaman may ilang debotong nagtangkang lumapit sa simbahan, pinauwi rin sila ng mga nakabantay na pulis.

Ayon kay Manila Archbishop Jose Cardinal Advincula sa misa na kanyang pinangunahan nitong Linggo ng madaling araw, sinabi niyang si Hesus ang lumalapit sa mga deboto, sa kanilang mga pamilya at tahanan kaya hindi kailangang lumapit ng mga deboto sa imahe ng Nazareno.

Naiintindihan umano ni Hesus ang pinagdadaanan ng mga Pilipino ngayong panahon ng pandemya.

Samantala, tuloy-tuloy ang online mass kada oras hanggang mamayang 9:00 p.m.