Black Nazarene, ipuprusisyon sa Biyernes Santo — Quiapo Church

ni Lolet Abania | April 10, 2022

Isasagawa ang prusisyon ng Itim na Nazareno sa Biyernes Santo, Abril 15, sa pamamagitan ng isang motorcade na susundan ng parehong mga ruta sa Traslacion, ayon sa opisyal ng Quiapo Church ngayong Linggo.

“Lalabas ang Nazareno sa Biyernes Santo pero motorcade ang Nazareno. Hindi po ito hihilahin o maglulubid. Hindi ito sasampahan ng mga hijos o ng mga deboto. Sana maintindihan ng mga deboto na pupunta sa Biyernes,” sabi ni Quiapo Church parochial vicar Fr. Douglas Badong sa isang interview.

Binanggit ni Fr. Badong na ang magiging mga ruta ng Black Nazarene motorcade ay katulad sa normal na ruta na ginagawa sa panahon ng Traslacion.

Ang Traslacion ay isang taunang religious event ng mga debotong Katoliko kaugnay sa tradisyunal na prusisyon ng Itim na Nazareno mula sa Quirino Grandstand pabalik ng Quiapo Church.

“12 midnight ang alis sa Quiapo Church. Lahat ay dapat naka-face mask na sasama sa motorcade at dini-discourage natin ‘yung naka-paa,” paalala ni Fr. Badong.

Matatandaang ang tradisyunal na Traslacion ay muling nakansela, kung saan ikalawang magkasunod na taon ito na hindi isinagawa dahil sa pandemya ng COVID-19.

Sinabi naman ni Fr. Badong na ipinagpatuloy na ng Simbahan ng Quiapo ang karamihan sa kanilang mga aktibidad, partikular na ang Semana Santa. Ang aktibidad na ito ay natigil ng mahigit sa dalawang taon dahil sa panganib ng COVID-19.

“Magkakaro’n ng Senakulo ang mga kabataan. Sa muling pagkakataon, makakapagpalabas na sila ulit under the new normal kasi nga tinitiyak natin ‘yung kaligtasan nila,” saad ni Fr. Badong.

Gayunman, sa kabilang na ang National Capital Region (NCR) ay isinailalim na sa Alert Level 1, aniya, hindi pa rin ipinatutupad ng Quiapo Church sa Manila ang 100% capacity sa loob ng simbahan.

Siksikan at mahaba ang pila… Mga magsisimba sa Quiapo dagsa ngayong first Friday ng Marso

ni Jasmin Joy Evangelista | March 4, 2022

Dumagsa ang mga nagsimba sa Quiapo Church ngayong unang Biyernes ng Marso.

Siksikan at mahaba ang pila sa bahagi ng Villalobos Street ng mga nais makadalo ng misa sa loob ng Quiapo Church.

Ayon sa Plaza Miranda Police Community Precint (PCP) ng Manila Police District (MPD), tinatayang nasa dalawang libo ang bilang ng mga tao kaninang 7:00 a.m. sa loob at paligid ng simbahan.

Matatandaan na una nang ipinatupad ngayong linggo ang Alert Level 1 sa Metro Manila.

Basta naka-facemask… Mga bata puwede na sa loob ng Quiapo Church

ni Jasmin Joy Evangelista | February 18, 2022

Halos balik na sa normal ang pagsisimba ng mga mananampalataya ng Minor Basilica of the Black Nazarene sa dami ng mga debotong nagsisimba ngayong Biyernes.

Fully vaccinated lamang ang pinapayagang pumasok sa simbahan at 700 na tao pa rin ang capacity sa loob nito.

Pinapayagan na rin ang mga bata basta naka-face mask at may kasamang fully vaccinated adult.

Kung sanggol naman ang isasama, kailangang naka-face mask din ito.

Ayon sa mga hijos, nagluwag na ang restrictions pero kailangan pa rin na lahat ay sumusunod sa pagsusuot ng face mask para maiwasang magkahawaan ng COVID-19.

Bukod sa physical mass, may mga online mass pa rin na mapanonood sa Facebook page ng Quiapo Church.