Pag-akyat sa poon at punas-panyo, bawal na... Traslacion ng Nazareno, ibabalik na

ni Eli San Miguel - Trainee @News | December 11, 2023

Ibabalik muli ng pamunuan ng Simbahan ng Quiapo o Minor Basilica of the Black Nazarene, ang Traslacion ng Poong Nazareno sa darating na Enero.

"Meron tayong prusisyon ng Nazareno, gagawin 'yan January 9 ng umaga," ayon kay Rev. Fr. Hans Magdurulang, tagapagsalita ng Nazareno 2024.

Dagdag niya pa, magkakaroon ng mga pagbabago sa Traslacion para "maging banal, maging ligtas at maging maayos ang ating pagdiriwang."

Ipinagbabawal na ang pag-akyat sa Nazareno pati na rin ang paghahagis ng mga panyo.

Maglalakad pa rin nang may hatak na lubid ang mga deboto, at susundan ang ruta na ginamit noong 2022.

Magkakaroon din ng mga prayer station at mananatili ang dungaw sa San Sebastian Church at Plaza del Carmen.

Traslacion 2024, pinag-aaralan na

ni Mylene Alfonso | April 19, 2023

Pinag-aaralan na ng lokal na pamahalaan ng Maynila ang muling pagdaraos ng tradisyunal na Traslacion sa 2024.

Ito ay makaraan ang naging matagumpay na motorcade para sa Itim na Nazareno na idinaos noong Biyernes Santo.

Unang pinayagan ni Manila Mayor Honey Lacuna sa Quiapo Church authorities at Hijos Del Nazareno ang pagdaraos ng motorcade sa halip ang nakagawiang prusisyon tuwing Biyernes Santo.

Matatandaang inihayag ng alkalde na ang magiging resulta ng motorcade ang siyang pagbabasehan ng lokal na pamahalaan kung papayagan na ang Traslacion sa Enero 9, 2024.

2023 Traslacion, suspendido uli — Fr. Valdez

ni Lolet Abania | November 10, 2022

Muling isususpinde ang tradisyunal na Traslacion sa Enero 2023, kung saan ikatlong magkakasunod na taon ng taunang pagdiriwang ng Pista ng Poong Itim na Nazareno na kinansela dahil sa COVID-19 pandemic.

Sa isang interview, sinabi ng Quiapo Church Attached Priest na si Fr. Earl Allyson Valdez na ang lahat ng aktibidad kaugnay sa Pista ay magpapatuloy.

Kabilang dito ang paghawak sa imahe ng Black Nazarene kapalit ito ng “Pahalik,” na gaganapin sa Quirino Grandstand.

“Bagama’t walang tradisyunal na prusisyon, ay ang lahat ng ating nakagawiang aktibidades na may kinalaman sa Kapistahan ng Itim na Nazareno ay matutuloy po,” pahayag ni Fr. Valdez.

Isasagawa rin ang hourly masses sa Quiapo Church simula alas-12:00 ng hatinggabi ng Enero 9, na pangungunahan ni Manila Archbishop Jose Cardinal Advincula.

Magkakaroon naman ng mga misa sa iba pang mga simbahan sa Metro Manila at mga lalawigan sa Luzon para sa mga hindi makakapunta sa selebrasyon sa Quiapo Church.

“Ang aming layunin ay kung hindi makapupunta para sa Traslacion, ay ang Nazareno na mismo ang tutungo sa kani-kanilang lugar at simbahan,” saad ni Fr. Valdez.

Paliwanag ng pari, nagdesisyon ang Quiapo Church na isuspinde uli ang Traslacion upang maiwasan ang pagdagsa ng mga tao mula sa iba’t ibang bahagi ng bansa sa Quiapo Church habang nananatili pa rin ang COVID-19.

Aniya pa, kinokonsidera rin nila ang kalusugan at kaligtasan ng mga matatanda at mga indibidwal na may comorbidities na silang mga vulnerable sa COVID-19 na posibleng dumalo sa pagdiriwang.

Ang Traslacion ay prusisyon na dala ang imahe ng Poong Itim na Nazareno mula Quirino Grandstand pabalik sa Quiapo Church at taunang isinasagawa ito ng Enero 9.

At bilang pagsunod sa health protocols sa Quiapo Church, ayon kay Fr. Valdez ang mga deboto ay pinapayuhan pa ring magsuot ng kanilang face masks sa loob ng simbahan, habang mayroon ding hiwalay na entry at exit points para mapanatili ang physical distancing.