Mas pagagandahin at pasasayahin... Quezon Memorial Circle redevelopment – LGU

ni Zel Fernandez | April 28, 2022

Nais ng Quezon City local government na isailalim sa redevelopment ang sikat na national park and shrine na Quezon Memorial Circle sa Elliptical Road, Diliman, Quezon City.

Sa plano ng lokal na pamahalaan ng QC, ang nasabing redevelopment ay bahagi ng kanilang proyekto na may layuning maibalik ang mga luntiang espasyo sa lungsod, kasabay ang hangarin na mas pagandahin pa ang lugar para sa sports and recreational activities ng mga susunod pang henerasyon.

Pagbabahagi ng QC LGU, batay sa master redevelopment plan, 70% ng QMC ay nakadisenyo para sa malawak na berdeng espasyo ng pook-pasyalan tulad ng picnic grounds, children’s playground, garden, at mga lugar para sa urban farming.

Gayundin, kasama rin umano sa nais pagandahin at isaayos sa Circle ang skate trail, basketball, volleyball, tennis court, at cultural amphitheater. Habang magkakabit din ng mga CCTV cameras para sa mas tiyak na seguridad ng mga namamasyal sa parke.

Samantala, kasama rin sa ikinokonsidera ang itinatayong MRT-7 station sa loob mismo ng Quezon Memorial Circle na maging bahagi ng redevelopment nito.

300 pasaway sa pagsusuot ng face mask at lumabag sa curfew, hinuli na, multa pa

ni Mary Gutierrez Almirañez | May 12, 2021

Hinuli at pinagmulta ang mga residenteng lumabag sa health protocols, partikular na ang mga walang suot na face mask at mga lumagpas sa curfew hours, batay sa isinagawang operasyon ng mga awtoridad sa ilang lugar sa NCR Plus.

Ayon sa ulat, inilunsad ang one time, big time operation sa Quezon City ngayong umaga, kung saan hindi pa matukoy kung ilang violators na ang mga nahuli at dinala sa Quezon Memorial Circle upang doon i-orient at isyuhan ng tiket.

Pinagmulta naman ng P300 hanggang P350 ang mga nahuli.

Samantala, mahigit 300 residente mula sa iba't ibang lugar sa San Pedro, Laguna ang dinampot ng mga pulis kagabi dahil sa paglabag sa curfew hours at city ordinance.

Kabilang dito ang 145 na residenteng walang suot na face mask at hindi tama ang pagsusuot, habang 155 naman ang residenteng hinuli dahil sa curfew hours.

Sa ngayon ay patuloy pa rin ang pag-iikot ng mga awtoridad sa bawat barangay upang matiyak na nasusunod ang ipinatutupad na health protocols laban sa COVID-19.