3 bata edad 10, 12 at 14, inabuso ng lider ng kulto

ni Lolet Abania | May 30, 2021

Tatlong menor-de-edad na nasa 10, 12 at 14 ang inabuso umano ng sinasabing lider ng kulto sa Quezon City.

Kinilala ang suspek na si Romeo delos Reyes, isang janitor, lider ng isang religious group at isa rin umanong witch doctor.

Batay sa salaysay ng tatlong bata, minolestiya sila ni Delos Reyes habang hinahawakan nito ang maseselang bahagi ng kanilang katawan para tuluyan umanong gumaling sa kanilang sakit.

“Base dito sa isang nanay, ‘yung kanyang anak ay biktima ng panggagahasa kasama ‘yung dalawang bata. Biktima ng panggagahasa ng isang suspect na sinasabi nilang leader ng kulto,” ani Police Lieutenant Colonel Elizabeth Jasmin.

Ayon pa kay Jasmin, ang mga bata ay hini-hypnotize muna kaya pumapayag ang mga ito na hawak-hawakan ng suspek dahil parte umano ito ng mga blessings na matatanggap nila.

Nakadetine na si Delos Reyes habang itinanggi ang reklamong sexual assault o pang-aabuso sa mga bata subalit inamin nitong hinawakan niya ang dibdib ng isa sa kanila.

“Kasi minsan, may puyatan kami magdasal, so du'n na kami natutulog. May mga kasama kami so pa’no masasabing inaano sila kung meron akong mga kasama?” depensa ni Delos Reyes.

Nahaharap ang suspek sa kasong rape in relation to child abuse at illegal possession of ammunition matapos na makakuha ng mga bala sa bahay niya na kanya ring itinanggi. Agad namang ipinatigil ng Barangay Damayang Lagi ang naturang religious group.

300 walang face mask, hinuli sa QC

ni Mary Gutierrez Almirañez | March 12, 2021

Hinuli ang mga hindi sumusunod sa ipinatupad na health protocols kontra COVID-19 partikular na ang mga walang suot na face mask sa Quezon Ave. Memorial Circle, Quezon City ngayong umaga, Marso 12.

Batay sa ulat, patuloy na nagsasagawa ng operasyon sa lungsod ang Department of Public Order and Safety (DPOS), Quezon City Police District (QCPD) at Task-force Disiplina, gayunpaman, ngayong araw ang itinuturing nilang “one time, big time operation” mula noong ika-1 ng Marso kung saan umabot na sa mahigit 4,000 ang mga pasaway na nahuli.

Ayon pa kay DPOS Head Elmo San Diego, “Sobrang higpit natin kaya lang, ayaw makinig ‘yung mga mamamayan natin. Parang dinededma nila. Hindi sila seryoso at hindi nila alam na talagang delikado ang sitwasyon natin ngayon… Kaya ako nalulungkot, hindi nababawasan ‘yung huli. In fact, dumadami pa rin. Dapat ‘pag dumadami itong infection rate sa Quezon City, pababa nang pababa ‘yung mga violators natin.”

Tinatayang P300 ang multa sa mga nahuli sa first offense, habang P500 para sa second offense at P1,000 sa third offense. Aniya, hindi na nila titiketan ang mga aabot sa ika-apat na paglabag, bagkus ay ikukulong na nila ito sa presinto kung saan kailangan nang magpiyansa.

Dagdag pa niya, “After 7 days, idinedemanda na natin sila sa Fiscal’s office. Kaya kailangan ‘yan immediately, mabayaran nila. At eto, magkaka-warrant sila kapag hindi sila tinubos… Kapag may violation ka at hindi mo tinubos, hindi ka na makakakuha ng mga permit dito sa Quezon City. Walang maibibigay na services sa ‘yo dito sa Quezon City, unless mabayaran mo muna.”

Ngayong araw ay umabot na sa 300 katao ang mga nahuling lumabag sa lungsod. Karamihan sa kanila ay lumabas lamang sa bahay para bumili ng kape, shampoo at iba pa sa katabing tindahan nang hindi nakasuot ng face mask.

5 nangholdap ng gas station, patay, 1 nakatakas

ni Mary Gutierrez Almirañez | February 19, 2021

Patay ang umano'y limang holdaper at isa ang nakatakas matapos makaengkuwentro ang pinagsanib- puwersang mga pulis mula sa Camp Crame, Philippine National Police Highway Patrol Group (PNP HPG) at District Special Operation Unit (DSOU) sa Quezon City nitong Pebrero 18 nang gabi.

Ayon sa ulat, hinoldap ng anim ang gasoline station kung saan kasalukuyang nagpapakarga ng gasolina ang isang pulis na taga-Crame. Nang hulihin niya ang mga holdaper ay inagaw ng isa ang shotgun sa guwardiya at nagsimulang magpaputok.

Habang hinahabol ng pulis na taga-Crame ang mga tumatakas na holdaper ay nakita niyang nagpapatrolya ang mga tauhan ng PNP HPG. Kaagad tumulong ang grupo nang malamang mga holdaper ang hinahabol ng pulis.

Sakto rin namang nagsasagawa ng surveillance ang DSOU ng Quezon City Police District (QCPD) nang mangyari ang habulan.

Sa Barangay Pingkian, Pasong Tamo, Quezon City na-corner ang mga holdaper.

Sa ngayon ay patuloy na pinag-aaralan ng Scene Of Crime Operations (SOCO) ang engkuwentro sa pagitan ng DSOU ng QCPD, PNP HPG at mga hinihinalang holdaper.