Kaso sa mga nagpapakalat ng video ni Ronaldo Valdez, kasado na — QCPD

ni Angela Fernando - Trainee @News | January 16, 2024

Tinitingnan ng Quezon City Police District ang paggawa ng legal na aksyon laban sa mga sibilyang pinaghihinalaang nagpapakalat ng mga video kaugnay sa pagkamatay ng beteranong aktor na si Ronaldo Valdez. 

Nagpahayag si Police Colonel Jean Fajardo na sinabi ni QCPD Police BGen. Rederico Maranan na may ilang natukoy na sibilyan ang sangkot sa pagpapakalat ng nasabing video. 

Dagdag ni Fajardo, patuloy ang imbestigasyon sa insidente, at kahit na pangunahing layunin ang pagkuha ng mga video sa lugar at bahagi ng kanilang protocol, maliwanag na may pagkakamali sa naging proseso. 

"Hindi po natatapos sa public apology ang ginagawa ng QCPD," ani Fajardo.

Ayon sa ulat ng QCPD, limang pulis na sangkot sa imbestigasyon ay haharap sa administratibong kaso, kabilang ang neglect of duty, grave misconduct, at paglabag sa Cybercrime Law. 

Personal namang tumawag si Maranan sa aktor at singer na si Janno Gibbs pagkatapos ng kanyang press conference nu'ng Lunes upang opisyal na humingi ng paumanhin.

Pulis sa QC na sangkot hit-and-run at pagpapaputok ng baril, sibak na

ni Angela Fernando - Trainee @News | January 15, 2023

Tuluyan ng inalis sa trabaho si Police Lieutenant Colonel Mark Julio Abong na sangkot sa pagkasawi ng isang tricycle driver dahil sa nangyaring hit-and-run nu'ng 2022.

Nasangkot na naman ang pulis sa isang insidente sa bar sa Quezon City nu'ng Nobyembre matapos nitong magpaputok ng baril sa labas ng nasabing establisyimento.

Nagpahayag sa isang pulong balitaan nitong Lunes na ginanap sa Camp Crame si PNP chief Police General Benjamin Acorda Jr. na kanilang inaasahang naibigay na kay Abong ang dismissal order. 

Saad niya, "Based on our record, wala na siya."

Kinumpirma naman ni Police Colonel Jean Fajardo na nu'ng Disyembre 18, 2023 epektibo ang naging pagsibak kay Abong sa trabaho.

Matatandaang naaresto si Abong nu'ng Nobyembre matapos magpaputok ng baril sa labas ng isang bar sa Barangay Laging Handa sa Quezon City matapos na may makaalitang isa pang customer.

Estudyante, dedo sa hazing

ni Angela Fernando - Trainee @News | October 17, 2023

Matigas na at wala nang pulso ang isang 25-anyos na Criminology student na kinilalang si Ahldryn Bravante nang isugod sa ospital sa Quezon City nitong Lunes, Oktubre 16.

Pinaghihinalaang hazing ang ikinamatay ng biktima na ginawa sa isang abandonadong gusali sa Bgy. Sto. Domingo, Kyusi.

Lumabas sa imbestigasyong nawalan ng malay ang lalaki habang sumasabak sa matinding hazing ng fraternity group.

Nagbigay naman ng pahayag ang ama nito na si Alexander Bravante at sinabing Linggo pa ng gabi ang huling beses niyang nakausap ang anak at naghahangad ngayon ang kanilang pamilya na mabigyang-hustisya ang pagkawala ng binata.

Ngayon ay nasa poder ng Quezon City Police District ang dalawang nagsugod kay Bravante sa ospital at dalawa pang estudyanteng sumuko na sa batas.