Higit 1M COVID-19 vaccine, naiturok na sa QC

ni Ronalyn Seminiano Reonico | July 15, 2021

Umabot sa mahigit 1 million COVID-19 vaccine doses ang naiturok na sa Quezon City.

Ayon sa QC local government, umabot sa kabuuang bilang na 1,013,988 doses ang naibakuna na simula nang mag-umpisa ang vaccination rollout noong Marso hanggang noong July 13.

Sa naturang bilang, 686,311 o 40.37% ang nakatanggap ng unang dose ng bakuna habang 327,677 o 19.28% naman ang fully vaccinated na.

Samantala, paalala ng lokal na pamahalaan sa mga residenteng babakunahan ng kanilang second dose:

1. Sundin ang vaccination card para sa petsa ng second dose,

2. Bumalik sa parehong vaccination site,

3. Bumalik sa parehong oras at pumunta lang ng 15 minuto bago ang nakatakdang schedule.

Hindi na rin umano kailangang mag-book pa ng schedule para sa second dose at kailangan lamang dalhin ang vaccination card at Valid ID at sumunod sa mga ipinatutupad na health and safety protocols.

43 residente, positive sa COVID-19, dormitoryo sa Kyusi, ini-lockdown

ni Lolet Abania | March 18, 2021

Isang dormitoryo sa Quezon City na ginamit ng manning agency ang isinailalim sa special-concern lockdown matapos magpositibo sa COVID-19 test ang 43 residente nito.

Sa inisyal na report, anim na residente lamang na nasa Barangay Roxas District dormitory ang nagpositibo sa test sa coronavirus. Subalit nang magsagawa ang Quezon City health officials ng test sa lahat ng 130 dorm residents, lumabas na 36 na iba pa ang positive sa virus.

"Kung nagsabi sila agad sa atin, naipa-monitor agad natin ang mga tao doon, na bigyan sila ng karapatang paggagamot at saka ‘yung quarantine, nagawa natin agad," ani Bgy. Chairman Dr. Carmela Gotladera. "Ang dating, parang no intention of reporting," dagdag ng kapitana.

Gayunman, ang mga nadiskubreng bagong COVID-19 cases ay mga asymptomatic at nananatiling naka-quarantine sa dormitory. Ang mga nagpakita naman ng sintomas ay nai-transfer na sa quarantine facilities.

Habang naghihintay ang ibang residente ng resulta ng kanilang COVID-19 tests, pinag-aaralan na ng mga opisyal na palawigin ang lockdown sa dormitoryo hanggang 14 na araw.

"This could have been avoided kung nagpa-follow sila ng minimum health protocol na ipinapasunod sa ating lahat," ani QC Epidemiology and Surveillance Unit head na si Dr. Rolly Cruz.

"So, obviously, meron silang kapabayaan sa kanilang ginagawang set-up sa kanilang agency," dagdag ni Cruz.

Wala namang ibinigay na pahayag at komento ang manning agency.

35-anyos na may UK variant ng COVID-19, nakalabas ng hotel, nasa QC

ni Mary Gutierrez Almirañez | February 11, 2021

Kahapon lang napag-alaman ng Quezon City government na sa Riverside, Bgy. Commonwealth nanunuluyan ang 35-taong gulang na OFW na nagpositibo sa UK variant ng COVID-19 noong Enero 18 gayung Pebrero 5 pa natuklasan ng Philippine Genome Center na positibo ito at itinuturing na pang-walong kaso ng UK variant sa bansa.

Humihingi ng paliwanag si Mayor Joy Belmonte sa Bureau of Quarantine kung bakit pinayagang makalabas sa quarantine hotel ng Maynila ang lalaking OFW. Inaalam na rin ng pamahalaang lungsod ang pananagutan ng manning agency ng OFW sa hindi pagsunod sa quarantine protocol lalo’t ang agency pa mismo ang nag-book ng sasakyan nito papunta sa tinutuluyang apartment sa Riverside Commonwealth, Quezon City.

Ayon sa ulat, Agosto pa noong nakaraang taon nang dumating ang lalaki sa Liloan, Cebu galing abroad. Nu'ng Nobyembre ay bumiyahe na ito papuntang Maynila para asikasuhin ang mga papeles pabalik abroad.

Mula noon ay hindi na ito nakabalik sa Liloan. Matatandaang inihayag ng Department of Health na positibo sa UK variant ang dalawang residente ng Cebu. Naunang nagpositibo ang 54-taong gulang na lalaking balikbayan na residente ng Talisay City. Kalauna’y nakarekober din ito.

Samantala, nagpapagaling pa ang 35-taong gulang na taga-Liloan at ngayong araw ay nakatakdang ilipat sa home facility ng Quezon City upang doon sumailalim sa quarantine.

Sa ngayon ay puspusan na ang contact tracing at testing sa lungsod.