22 senador, pumirma sa pagsuspinde sa PUVMP

ni Angela Fernando @News | July 31, 2024

File Photo: Senate of the Philippines / MMDA

Pumirma ang 22 sa 23 senador sa resolusyong humihimok sa gobyerno na pansamantalang ipatigil ang pagpapatupad ng Public Utility Vehicle Modernization Program (PUVMP), na ngayon ay tinatawag na Public Transport Modernization Program (PTMP).

Lahat ng senador maliban kay Senador Risa Hontiveros ay pumirma at may-akda ng mungkahing Senate Resolution 1096. Hindi pa ipinaliliwanag ni Hontiveros kung bakit hindi pa niya pinipirmahan ang panukala.

Sinabi ng mga senador sa PSR 1096 na ang programa ay dapat pansamantalang isuspinde habang hindi pa nareresolba ang mga lehitimo at agarang suliranin na inihain ng mga apektadong driver, grupo, union, at transport cooperatives, na may layuning masiguro ang mas epektibo at inklusibong pagpapatupad ng PTMP.

Binigyang-prayoridad ng mga mambabatas ang mga alalahaning inihain ng iba't ibang transport groups na kanilang tinutukoy na kakulangan sa PTMP na hindi pa natutugunan ng Department of Transportation (DOTr).

Mga driver at operator ng jeep, sinimulan ang 3-araw na strike

ni Angela Fernando @News | April 29, 2024

Sinimulan ng mga driver at operator ng jeepney na kumukontra sa Public Utility Vehicle (PUV) Modernization Program ng pamahalaan ang kanilang tatlong-araw na malawakang tigil-pasada at strike nitong Lunes.

Maraming mga komyuter ang apektado at nahirapang sumakay ng mga jeep dahil sa nasabing strike.

Umaabot sa 50 na driver na kasapi ng Pagkakaisa ng mga Samahan ng Tsuper at Opereytor Nationwide (PISTON) ang nag-park ng kanilang mga jeep sa Service Road ng Roxas Boulevard malapit sa Baclaran Church.

Iginiit nilang hindi nila tutumbukin ang kanilang ruta mula Baclaran patungong Divisoria at pabalik.

Samantala, nakaantabay ang miyembro ng Southern Police District sa lugar upang tiyakin ang kapayapaan at kaayusan ng protesta.

P6K fuel subsidy sa PUVs, tuloy

ni Mai Ancheta @News | August 4, 2023

Pinanatili ng Department of Budget and Management (DBM) ang alokasyon ng fuel subsidy para sa transport at agriculture sector sa susunod na taon.

Ayon kay Budget Sec. Amenah Pangandaman, pinaglaanan ng P2.5 bilyong pondo ang subsidiya para sa nabanggit na sektor sa isinumiteng 2024 National Expenditure Program sa Kongreso.

Ang P 2.5B ay magiging tulong ng gobyerno sa mga tsuper at operator ng public utility vehicles (PUVs) na ilalagay sa pangangasiwa ng Department of Transportation (DOTr).

Hindi aniya binago ang halaga ng subsidiya kagaya ng pondo ngayong 2023.

Sa ilalim ng programa, binibigyan ng gobyerno ng P6,000 na halaga ng fuel vouchers ang mga kwalipikadong tsuper at operator ng PUV at iba pang delivery service upang maibsan ang pasanin sa epekto ng mataas na presyo ng produktong petrolyo.