- BULGAR
- Dec 28, 2024
ni Ryan Sison @Boses | Dec. 28, 2024
Dahil inaasahang marami ang magsisiuwian sa kanilang mga probinsya para salubungin ang BagongTaon, tiyak na dagsa rin ang mga sasakay sa mga public utility vehicles (PUVs) na posibleng makapanood ng kung anu-anong mga movie at shows.
Kaya naman pinaalalahanan ng Movie and Television Review and Classification Board (MTRCB) ang lahat ng operator at driver na tanging “G” o General Patronage at “PG” o Parental Guidance na rated content ang pinapayagang ipalabas sa loob ng PUVs habang nasa biyahe.
Batay sa MTRCB Memorandum Circular No. 09-2011, kinikilala bilang common carriers o isang “sinehan” ang mga PUV dahil nagpapalabas sila ng mga pelikula na sakop ng board.
Sa ilalim ng batas, dapat na angkop para sa lahat ng manonood, partikular sa mga bata, ang mga pelikulang ipinapalabas sa mga pampublikong transportasyon.
Gayundin, base sa Chapter 3, Section 1-3 ng naturang circular, ang mga PUV na nagpapakita ng motion pictures ay kinakailangang sumunod sa parehong regulasyon gaya ng mga sinehan.
Ito ay upang matiyak na ang mga pelikula ay nananatiling angkop para sa lahat ng pasahero at hindi magkakaroon ng negatibong epekto sa mga menor-de-edad na bumibiyahe kasama ang kanilang mga pamilya.
Hinikayat naman ng MTRCB ang publiko na i-report ang mga violator sa pamamagitan ng kanilang mga social media channel na @MTRCBGov o sa email sa complaints@mtrcb.gov.ph.
Binigyang-diin din nila para sa mga PUV operator ay dapat sumunod sa nasabing panuntunan o mahaharap sa parusa ang lalabag alinsunod sa Presidential Decree No. 1986 at Chapter XIII ng 2004 Revised Implementing Rules and Regulations.
Mas makabubuting tumalima na lamang ang ating mga kababayang driver at operator ng mga PUV upang hindi na sila umabot sa puntong maparusahan ayon sa nakasaad sa ating batas.
Hindi naman talaga maganda na makapanood ang mga biyahero, lalo na ang mga bata, ng mga itinuturing nating malalaswang movies at shows o ‘yung mga palabas na puno ng karahasan at patayan dahil tiyak na malaking epekto nito sa isipan ng lahat ng nakasakay sa mga public transport.
Kumbaga, may responsibilidad din sila na makapagserbisyo sa mga pasahero, hindi lang sa ligtas na pagbiyahe, kundi pati na rin para makapagbigay ng kaaya-ayang karanasan sa paglalakbay sa pamamagitan ng pagpapalabas ng nararapat lamang na mga panoorin.
Sa kinauukulan, sana ay tiyaking walang makakalusot na mga pasaway na driver at konduktor na magpapalabas ng mga x-rated movies at iba pang katulad nito habang bumibiyahe sa kanilang mga pampasaherong sasakyan.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com
