P-BBM, 'di aprub sa muling pagsasaayos ng PNP

ni Angela Fernando @News | July 12, 2024

Ipinawalang-bisa ni Pangulong Ferdinand Marcos Jr. ang iminungkahing batas na magre-reorganisa sa Philippine National Police (PNP) dahil sa mga probisyong hindi tugma sa mga patakaran at layunin ng kanyang administrasyon.

“While - this administration recognizes the laudable objectives of the bill, I cannot approve it because the provisions run counter to administrative policy and efficiency,” saad ni Marcos.

Binigyang-diin din ng Presidente na nais niyang masiguro na maghahatid ito ng kinakailangang mga reporma, sumusunod sa mga batas ng civil service, mga patakaran sa standardisasyon ng sahod, at mga schedule ng base pay.

Nilalayon ng panukalang amyendahan ang Republic Act No. 8551, o ang PNP Reform and Reorganization Act of 1998, at ang RA 6975, o ang Department of the Interior and Local Government (DILG) Act of 1990.

Armadong lalaki sa Maynila, nadakip

ni Eli San Miguel - Trainee @News | October 18, 2023

Dinakip ng Manila Police District (MPD) ang isang lalaki dahil sa pagdadala ng baril habang nakasakay sa motorsiklo sa Ermita, Maynila, nitong Miyerkules, Oktubre 18.

Kinilala ng MPD-Ermita Police Station (PS-5) ang suspek bilang si JV Rebuse.

Ayon sa paunang imbestigasyon ng pulisya, ang suspek ay sakay ng kanyang motorsiklo bandang alas-12:30 nang madaling araw at nagmamaneho sa kahabaan ng Sta. Monica Street, service road sa Barangay 668 sa Ermita.

Napansin ng mga awtoridad na nagpapatrol sa lugar ang suspek na may handle ng baril na nakalabas sa kanyang kanang baywang.

Kaagad nilang pinara ang suspek at inaresto ito dahil sa pagkakaroon ng .9 milimetrong baril na may magasin na naglalaman ng walong bala.

Idinagdag ng pulisya na hindi nagawa ng suspek na magpakita ng anumang dokumento ukol sa baril.

Nasa PS-5 na ngayon ang suspek at haharap ito sa mga kaso ng paglabag sa Republic Act 10591, o ang Comprehensive Firearms and Ammunition Regulation Act, at sa Batas Pambansa 881, Omnibus Election Code of the Philippines, ayon sa pulisya.

Sangkot sa katiwalian at pang-aabuso.. Sahod ng pulis, iipitin

ni Madel Moratillo @News | August 24, 2023

Paparusahan ng pamunuan ng Pambansang Pulisya ang mga pulis na masasangkot sa iregularidad.

Ayon kay Lt. Gen. Rhodel Sermonia, Deputy Chief for Administration ng Philippine National Police, iipitin ang sahod ng mga pulis na masasangkot sa iregularidad, katiwalian o pang-aabuso.

Ang pahayag ay ginawa ni Sermonia sa gitna ng pagdinig ng Senado sa pagkamatay ni Jemboy Baltazar kung saan sangkot ang 6 na Navotas police.

Ito ay para hindi na aniya pamarisan pa ang mga ito ng ibang pulis.

Rerepasuhin din umano ang kaso ng mga pulis na na-dismiss at muling nakabalik sa puwesto.

Aalamin aniya kung sino ang dapat na managot dito.

Nakakahiya aniya na kahit lumaki na ang sahod ng mga pulis ay mayroon pa ring nasasangkot sa iregularidad.