3.13 M tambay na Pinoy noong Pebrero – PSA

ni Lolet Abania | April 7, 2022

Tumaas pa ang bilang ng mga Pilipinong walang trabaho o unemployed nitong Pebrero, sa kabila ng pagluluwag ng mga restriksyon ng panahong iyon, kung saan marami ang naghahanap ng mapapasukan subalit bigong silang makapagtrabaho dahil sa limitado ang bilang naman ng mga negosyong nag-o-operate, batay sa report ng Philippine Statistics Authority (PSA) ngayong Huwebes.

Sa isang virtual conference, ayon kay PSA chief at National Statistician Claire Dennis Mapa, ang bilang ng mga unemployed adults o may mga edad 15 at pataas, nitong Pebrero ay umabot sa 3.13 milyon, na nagre-reflect o katumbas ng unemployment rate na 6.4%.

Mas mataas ito kumpara sa 2.93 milyong walang trabaho na mga indibidwal na nai-record noong Enero, na nagre-reflect naman sa parehong unemployment rate na 6.4% -- ang pinakamababa mula nang peak ng mga pandemic lockdowns noong Abril 2020, na nakapag-record ng all-time high unemployment rate ng 17.6% o 7.3 milyong walang trabaho.

Ang bilang nitong Pebrero ng mga jobless na Pinoy ay mas mababa naman kumpara sa 4.19 milyong unemployed na nai-record noong Pebrero 2021.

Ayon kay Mapa, ang pagluluwag ng mga restriksyon sa Alert Level 2 sa buong Pebrero ay nag-udyok sa marami para maghanap ng kanilang mapapasukan habang ang labor force participation rate – ang percentage ng mga indibidwal na aktibong naghahanap ng trabaho mula sa adult population – ay tumaas ng 63.8% mula sa 60.5% noong Enero.

“We can surmise that the opening of the economy, the easing of restrictions encouraged ang ating mga kababayan na maghanap ng trabaho,” sabi ni Mapa.

Gayunman, sinabi ni Mapa na hindi lahat ng naghanap ng mapapasukan ay nagkaroon ng trabaho.

“Marami ang naghahanap ng trabaho pero hindi sila nakakuha ng trabaho na gusto nila,” saad ni Mapa, kung saan aniya, ang mga naghahanap ng mapapasukan subalit unemployed ay tumaas mula 1.16 milyon noong Enero na naging 1.94 milyon nitong Pebrero.

“Possible reasons are not enough jobs or some are waiting for other opportunities,” dagdag ng opisyal.

Gayunman, ayon sa PSA chief, kabilang sa mga unemployed, na nagsasabing sila ay walang trabaho dahil sa tinatawag na mobility restrictions ay bumaba sa 385,000 nitong Pebrero kumpara sa 813,000 noong Enero.

Sa kabila naman ng pagtaas ng bilang ng mga unemployed Pinoy, ang bilang naman ng mga employed nitong Pebrero ay tumaas ng 45.48 milyon mula sa 43.02 milyon noong Enero, ayon pa kay Mapa.

55 M Pinoy, nakarehistro na sa national ID — PSA

ni Lolet Abania | February 10, 2022

Nasa tinatayang 55 milyong Pilipino na ang nakarehistro para sa National ID system ng bansa, ayon sa Philippine Statistics Authority (PSA).

“Meron na kaming nairehistro as of Feb. 4 na about 55 million na,” sabi ni PSA Assistant Secretary Rosalinda Bautista sa isang interview ngayong Huwebes.

Gayunman, batay sa latest data ng PSA ay nasa 6 milyon na mga Philippine Identification cards ang nai-release pa lang sa ngayon.

Ayon sa ahensiya, magkakaroon ng mga delays o pagkaantala sa delivery ng mga PhilID cards.

“’Yun po ngayon ang aming challenge. Right now, ang nakikita po namin na based du’n sa capacity ng PHLPost (Philippine Postal Corporation) ay minimum po ng 6 na buwan,” paliwanag ni Bautista, na isa ring deputy national statistician ng Philippine Identification System Registry Office.

Samantala, target ng PSA na makapagrehistro ng 90 milyong Pilipino para sa National ID system sa pagtatapos ng 2022.

Matatandaang noong Oktubre 2020, nagsimula ang 3-step PhilSys registration process ng national ID, kung saan prayoridad ang mga low-income households mula sa 32 mga lalawigan.

Ang Step 1 ay pagbibigay ng demographic information habang ang Step 2 ay pagba-validate ng mga supporting documents at pagkuha ng biometric information.

Ang huling step ay pag-iisyu na ng PhilSys Number at ang delivery ng PhilID cards.

Sa kabila ng mga lockdown… Bilang ng panganganak sa bansa, bumaba

ni Jasmin Joy Evangelista | January 28, 2022

Patuloy na bumababa ang bilang ng panganganak sa bansa kung saan nagtala ng biggest drop noong 2020 sa kabila ng milyun-milyong mamamayan ang isinailalim sa lockdown dahil sa COVID-19 pandemic.

Sa report noonb Jan. 26, sinabi ng Philippine Statistics Authority (PSA) na1.53 million live births ang na-register noong 2020, mababa ng 8.7 percent mula sa 1.67 million noong 2019, pre-pandemic.

Noong nakalipas na dalawang taon, “on the average, 4,177 babies were born daily, which translates to 174 babies born per hour or approximately three babies born per minute,” pahayag ng PSA.

Ang pagbaba ng bilang ng 2020 births ang pinakamalaking naitala simula noong 2012.

Ang bilang ng panganganak ay bumaba mula 1.79 million noong 2012 at naging 1.76 noong 2013, 1.75 million noong 2014, 1.74 million noong 2015, 1.73 million noong 2016, 1.7 million noong 2017, at 1.66 million noong 2018.

Noong 2019 ay bahagya itong umakyat ngunit bigla rin ang pagbaba noong 2020.