Para raw madaling maintindihan…PH entrepreneurship adviser: Gawing simple ang quarantine protocol

ni Jasmin Joy Evangelista | September 10, 2021

Marami ang nadismaya nang biglang bawiin ang desisyon na ilagay na sa GCQ ang Metro Manila at panatilihin sa MECQ.

Kabilang na rito ang mga may trabaho at negosyo dahil sa pag-aakalang luluwag na ang community quarantine status at makapagbubukas o makapagtatrabaho na nang mas maluwag.

Dapat kasi'y ilalagay na noong Miyerkoles ang Metro Manila sa general community quarantine (GCQ) with alert level system pero binawi ito at pinalawig pa ang modified enhanced community quarantine (MECQ) sa capital region hanggang Setyembre 15.

Dahil dito, ipinanukala ni Presidential Adviser for Entrepreneurship Joey Concepcion sa Inter-Agency Task Force na simplehan na lang ang quarantine restrictions para madaling maintindihan at maipatupad.

"If you can keep it to GCQ 1 and GCQ 2, but if you really have to, then you limit to 3 [alert] levels... huwag muna ilagay 'yong 4," ani Concepcion.

"What will determine [a] restaurant to operate at 20 percent, at 40 percent? So I think let's simplify it," dagdag niya.

Iminungkahi rin ni Concepcion na subukan na ang "bakuna bubble" sa Metro Manila kahit pa palawigin ang MECQ hanggang katapusan ng Setyembre.

Sa ilalim ng "bakuna bubble," bibigyan ng pribilehiyo ang mga bakunadong indibidwal na makapasok sa ilang establisimyento at transportasyon.

Kahit puwede nang lumabas... Mga bata sa parke, lilimitahan pa rin

ni Lolet Abania | July 11, 2021

Bumuo ang Metro Manila Council (MMC) ng isang resolusyon na naglalaman ng mga guidelines para sa pagpapahintulot sa mga bata na nasa edad 5 at pataas sa maaari nilang puntahan na mga open areas.

Ayon kay Metro Manila Development Authority (MMDA) Chairman Benhur Abalos, Jr. sa ginanap na pulong ng MMC ngayong Linggo, napagkasunduan ng mga mayors na gumawa ng isang resolusyon na naglalaman ng listahan ng mga open spaces kung saan papayagang puntahan o pasyalan ng mga bata.

“What we are going to do, we will list down parks and open areas in Metro Manila these coming days [to guide] Metro Manilans on where to go,” ani Abalos sa isang phone interview ngayong araw.

Sinabi ni Abalos na nakapaloob din sa resolusyon ang pagkakaroon ng limitadong bilang ng mga indibidwal sa isang open area upang maiwasan ang overcrowding o pagsisiksikan.

“It would be a resolution na parang guide lang naman (a sort of a guide) for local government units. What's important is to prevent overcrowding,” dagdag ni Abalos. Gayundin, nakasaad sa resolusyon ang pagpapatupad ng minimum public health standards sa mga parke at iba pang open areas.

Ipinunto rin ni Abalos na kumonsulta na sila sa mga health experts para sa pagpapatupad ng ibinabang bagong polisiya ng Inter-Agency Task Force (IATF) sa mga bata. “This came from health experts. Ibig sabihin, talagang masusing pinag-aralan kung open space, ang level ng infection, hindi ganu’n kagrabe. This will be for social, mental, physical, and health of children,” sabi pa ng opisyal.

Samantala, ayon kay Abalos, ang nabuong resolusyon hinggil sa mga guidelines sa naturang polisiya ay ilalabas nila ngayong darating na linggo.

Resto sa QC, tumanggap nang 100% dine-in customer, ipasasara

ni Lolet Abania | June 13, 2021

Isang restoran sa Quezon City ang nahuling lumabag sa health safety protocols matapos na mag-operate ngayong Linggo ng full capacity ng kanilang indoor dining sa kabila ng mahigpit na ipinatutupad na quarantine restrictions sa NCR Plus.

Lumalabas na ang restoran ay nag-accommodate ng mga customers para sa kanilang indoor dining nang 100% at wala rin itong Mayor’s Permit na nakapaskil dapat sa dining area.

Sa ngayon, ang National Capital Region at karatig-probinsiya ay nasa ilalim ng general community quarantine (GCQ) with heightened restrictions nang hanggang Hunyo 30.

Sa ilalim ng GCQ with heightened restrictions, ang indoor dining ay nasa 20 porsiyentong kapasidad lamang habang ang outdoor o al fresco dining ay 50% capacity.

Ayon sa mga awtoridad, ang naturang restaurant ay posibleng ipasara dahil sa ginawang paglabag. Gayunman, wala namang naging pahayag ang may-ari ng restaurant habang wala ring binanggit na iba pang detalye ang pulisya.