Private sector ‘di puwedeng magtanggal ng hindi bakunadong empleyado

ni Jasmin Joy Evangelista | October 7, 2021

Kailangan umano ng batas para may basehang obligahin ang mga manggagawang magpabakuna, ayon kay Presidential Adviser Joey Concepcion.

Hindi rin daw magtatanggal ng empleyado ang pribadong sektor na tatangging kumuha ng mga bakuna, pero may mga industriya na kailangan talagang magpabakuna lalo na sa mga high risk na negosyo.

"The private sector will not fire for refusal to take the vaccines but there are high-risk businesses that really need to be vaccinated," ani Concepcion.

Ito ay inihayag matapos sabihin ni Pangulong Rodrigo Duterte na puwedeng gumamit ng police force para puwersahin ang mga tao na magpabakuna.

Ayon naman sa Commission on Human Rights, ang puwersahang mandatory vaccination ay labag sa karapatang pantao.

Matatandaang sinabi ng Department of Justice (DOJ) na kailangan ng batas para gawing mandatory ang pagbabakuna.

Supply ng gobyerno, ang bagal daw… Private sectors, hayaang bumili ng sariling bakuna — Gordon

ni Lolet Abania | June 25, 2021

Darating ang 1,500 doses ng Moderna vaccine kontra-COVID-19 na gawa ng Amerika na binili ng Philippine Red Cross (PRC) sa Sabado, June 26.

Sa forum ngayong Biyernes na inorganisa ng Ateneo de Manila University alumni association, sinabi ni Gordon na inaasahan nilang darating sa bansa ang Moderna doses bukas. “This weekend. Tomorrow. Certainly, I’m sure it’s gonna arrive, I have no reason to believe it’s not gonna arrive,” ani Gordon. Ipinunto niya na ang ginawa ng PRC na pagkuha ng COVID-19 vaccine ay dahil sa mabagal na delivery ng mga doses na inorder ng pamahalaan. “We ordered putting out our own money because hindi dumadating ‘yung mga vaccines. Nakitulong na kami," sabi ni Gordon.

Paliwanag pa ni Gordon, kung siya ang in-charge sa vaccine procurement, papayagan niya ang mga private sectors na bumili ng sarili nilang doses at isailalim ito sa superbisyon ng mga medical experts. “Our objective is to vaccinate as fast as we can and if people can afford to pay, we can recover our cost, we’d do that. We don’t charge extra, we just make sure we’re able to vaccinate a lot more people,” diin niya.

Matatandaang noong May, nabanggit ni Gordon na ang PRC ay mag-a-administer ng Moderna COVID-19 vaccine sa kanilang mga miyembro at donors.

Maaari aniyang pagbayarin ng PRC ang kanilang miyembro na handang pasanin ang gastos ng bakuna na halagang US$26.83 per dose at dagdag na administration fee, kabilang dito ang syringes, gloves, PPEs, pagkain at allowances ng mga doktor at nars, at iba pang essential expenses na may kaugnayan sa pagbabakuna.

Subalit nilinaw ng PRC na isa itong humanitarian organization at aniya, “Is not in the business of selling any vaccines. It does not charge for anything that it got free.”

COVID-19 vaccines sa mga private employees, dapat libre — DOLE

ni Lolet Abania | March 14, 2021

Hindi dapat pagbayarin ang mga manggagawa kapag nagpabakuna at wala rin dapat mangyaring diskriminasyon sa mga ito sakaling tumangging magpaturok ng COVID-19.

Ito ay ayon sa inisyung guidelines ng Department of Labor and Employment (DOLE) tungkol sa isasagawang vaccination sa mga kumpanya.

Sa Labor Advisory No. 3 Series of 2021 ng DOLE, nagtakda ang ahensiya ng guidelines para sa mga pribadong sektor sa pagpapatupad nito ng pagbabakuna kontra COVID-19 sa kanilang mga empleyado.

Nakasaad sa nasabing guidelines, na pirmado ni DOLE Secretary Silvestre Bello III, na ang mga kumpanya ay maaaring kumuha ng COVID-19 vaccines, supplies at iba pang kailangan para rito.

“Firms may seek the support of the appropriate government agencies in the procurement, storage, transport, deployment, and administration of COVID-19 vaccines,” ayon sa pahayag nito. Gayundin, hindi dapat bayaran ng mga empleyado ang gagawing vaccination.

“No cost of vaccination in the workplace shall be charged against or passed on, directly or indirectly to the employees,” ayon pa rito. Dagdag niya, ang mga private employers na kukuha ng COVID-19 vaccines ay hindi maaaring ipasa ang gastos ng vaccination sa kanilang mga empleyado.

"Ang gobyerno ni Pangulong (Rodrigo) Duterte ang mananagot sa lahat ng gastos sa pagbabakuna, maliwanag po ‘yan," ani Bello sa isang interview ngayong Sabado.

Ang mga may-ari naman ng kumpanya ay may mandato na himukin ang kanilang mga empleyado na magpabakuna laban sa coronavirus.

Gayunman, ayon pa sa DOLE, walang dapat na mangyaring diskriminasyon sa empleyadong tumangging magpabakuna o maturukan ng COVID-19 vaccines.

“Any employee who refuses or fails to be vaccinated shall not be discriminated against in the terms of tenure, promotion, training, pay, and other benefits, among others, or terminated from employment,” pahayag ng DOLE.

Matatandaang ipinaliwanag na ni DOLE Undersecretary Maria Teresita Cucueco ang tungkol sa mga empleyadong ayaw pang magpabakuna ng COVID-19 vaccines.

“Ang sinasabi, i-encourage na mapabakunahan ang empleyado pero kung hindi ho sila papayag, hindi po ito basehan ng termination, promotion, at iba pa na hindi papapasukin sa loob ng kumpanya. Discriminatory na po 'yan, hindi po 'yan sang-ayon sa mga issuance ng DOLE,” ani Cucueco.

Binanggit na rin ng DOLE noon na ang polisiya na "no vaccination, no work" ay ilegal.