Sakaling may ma-heat stroke, himatayin atbp... Private hospitals, to the rescue sa May 9 elections

ni Zel Fernandez | May 4, 2022

Nagpahayag ang mga pribadong ospital ng kahandaan sa pagbibigay ng tulong sa mga botanteng magkakasakit kasunod ng nalalapit na 2022 national at local elections sa Mayo 9.

Ayon kay Private Hospital Association of the Philippines (PHAPI) Pres. Dr. Jose De Grano, nakahanda aniya ang mga pribadong ospital na magpadala ng ambulansiya at medical personnel, bilang pagresponde sa mga botanteng posibleng ma-heat stroke, himatayin at makaranas ng iba pang uri ng emergency sa kasagsagan ng halalan.

Ani Dr. De Grano, inaasahang magiging siksikan at magkakaroon ng pila ng mga botante sa mga polling centers, na maaaring sumabay sa mainit na panahon.

Gayundin, ipinaalala ni Dr. De Grano sa mga botante na magsuot ng facemask at magbaon ng personal na alcohol at sanitizer.

Kaakibat nito, muling iginiit ng mga ospital na patuloy na mag-ingat at proteksiyunan ang kalusugan laban sa COVID-19 at sa iba pang mga nakahahawang sakit na maaaring makuha ngayong eleksiyon.

Mga ospital posibleng maparalisa sa pagre-resign ng mga nurse — PHAPI

ni Jasmin Joy Evangelista | October 21, 2021

Patuloy na dumarami ang bilang ng nurse na nagre-resign kaya nangangamba ang grupo ng mga pribadong ospital na maaaring kapusin sila sa manpower.

Umaalis daw ang mga ito dahil mas pinipiling magtrabaho abroad.

Ayon kay Dr. Jose Rene de Grano, pangulo ng Private Hospitals Association of the Philippines (PHAPI), posibleng maramdaman ang kabawasan sa mga umaalis na nurse sa loob ng 6 na buwan.

"For the past, siguro 2 or 3 weeks, nakita natin na medyo mga around 5 percent or more ng ating mga nurses... ay nagfa-file ng kanilang resignations dahil gusto ho nilang mag-work sa ibang bansa," ani De Grano.

Ayon sa grupo, hinihiling nila sa pamahalaan na matulungan ang malilit na ospital at mga private hospital na mabigyan ng subsidiya para maitaas ang sweldo ng mga nurses.

Sagot naman ng Department of Health, pinag-aaralan na nila kung ano ang susunod na hakbang, lalo't may mga bansa ring niluwagan ang requirements sa pagkuha ng mga Pinoy nurse.

"Kahit wala ka nang practice, eh kinukuha ka na nila dahil nangangailangan din sila ng health care workers. And that is why it is so unfair. Pero wala po tayong magagawa eh, kasi ang ating healthcare workers, they want a higher salary," ani Department of Health spokesperson Usec. Maria Rosario Vergeire.

Pribadong ospital, bibili ng sariling COVID-19 vaccine

ni Lolet Abania | February 13, 2021

Nagpahayag ng pagnanais ang ilang pribadong ospital na bumili ng sarili nilang COVID-19 vaccine sakaling hindi maging sapat ang alokasyon ng gobyerno para rito.

Sa isang interview kay Dr. Jose Rene De Grano, pangulo ng Private Hospitals Association of the Philippines (PHAP), sinabi niyang naghahanda na ang mga private hospitals para sa inaasahang vaccines habang may ilang ospital na nagsimula nang gumawa ng kanilang master list.

Gayundin, tumaas sa 70 porsiyento ang mga private health workers na nais magpabakuna. "Noong una, talagang merong hesitancy, even health workers. Pero ngayon po, medyo nadi-disseminate na po natin ang mga impormasyon na kailangan talaga natin ng bakuna at hindi talaga ito delikado, at mas makakatulong sa atin.

Ngayon po, mas marami na ang nag-a-agree na sila ay mabakunahan," sabi ni De Grano. Gayunman, tiniyak ni Vaccine Czar Carlito Galvez na sasagutin ng pamahalaan ang mangyayaring inoculation program para sa lahat ng Pinoy.